Longa aanona yoye

Gehasi okwa li e na olwiho

MBELA opu na ethimbo limwe wa li wa halelela oshinima shontumba?—a Ngele osho, hangoye awike. Ihe mbela owu na okukambadhala okumona shoka wa hala mokupopya iifundja?— Aawe, ku na oku shi ninga. Omuntu ngoka ha ningi ngaaka oku na olwiho. Natu tale nkene omulumentu gwedhina Gehasi a li a yonwa po kolwiho. Gehasi okwa li omukalele gwaElisa, omupolofeti gwaKalunga kashili, Jehova.

Elisa naGehasi oya li ko nalenale, oomvula eyuvi lwaampono manga Omwana gwaKalunga, Jesus, inee ya kombanda yevi. Jehova okwa li a longitha Elisa a longe iikumithalonga. Pashiholelwa, Ombiimbeli otayi popi kombinga yomulumentu a simana ngoka a li ondjayi yetangakwiita lyAasiria a li e niwe kuuvu woshilundu. Kapwa li ngoka a li ta vulu oku mu aludha, ihe Elisa okwa li e mu aludha.

Sho Elisa a li a longithwa kuKalunga a aludhe aantu, ka li nando ha taamba ofuto. Mbela owu shi kutya omolwashike?— Omolwaashoka Elisa okwa li a tseya kutya iikumithalonga ohe yi longo koonkondo dhaJehova, ihe hakuye mwene. Sho Naeman a aludhwa, okwa li a nyanyukwa nokwa li nokuli a hala okupa Elisa omagano goshingoli, oshisiliveli noonguwo oombwanawa. Elisa ka li e ga taamba, ihe Gehasi okwa li e ga hala noonkondo.

Sho Naeman a yi, Gehasi okwe mu landula noinee shi lombwela Elisa. Mbela owu shi kutya Gehasi sho a adha Naeman okwe mu lombwele shike?— Okwa ti: ‘Elisa okwa tumu ndje, ndi ku lombwele kutya opwe ya aayenda yaali. Okwa hala wu mu pe oohema mbali e ke dhi pe aalumentu mboka.’

Gehasi okwa li ta popi iifundja. Ehokololo kombinga yaayenda yaali mboka Gehasi a popi kalya li lyoshili. Okwe li toto owala, molwaashoka okwa li a hala iikutu mbyoka Naeman a li a hala okupa Elisa. Ihe Naeman ka li e shi shi. Onkee ano, okwa li a nyanyukwa okupa Gehasi omagano ngoka. Naeman okwa li nokuli a pe Gehasi iinima oyindji yi vulithe pwaambyoka a pula. Mbela owu shi kutya oshike sha ka ningwa po?—

Sho Gehasi a shuna kegumbo, Elisa okwe mu pula a ti: “Owa li peni?”

Gehasi okwa yamukula a ti: ‘Aaye, kandi na mpo nda li.’ Ihe nonando ongaaka, Jehova okwa lombwele Elisa shoka Gehasi a ningi. Opo ihe, Elisa okwe mu lombwele a ti: “Ethimbo ndika kali shi lyokutaamba iimaliwa nomizalo.”

Gehasi okwa taamba iimaliwa nomizalo ndhoka kaadhi shi dhe. Onkee ano, Kalunga okwe mu tumine uuvu waNaeman woshilundu. Oshike tatu ilongo moshinima shika?— Otatu ilongo mo kutya katu na okulombwela yalwe omahokololo ngoka kaage shi goshili.

Omolwashike Gehasi a li a hokolola ehokololo lyiifundja?— Omolwaashoka okwa li e na olwiho. Okwa li a hala iinima mbyoka kaayi shi ye nokwa li a kambadhala oku yi mona okupitila miifundja. Molwaashoka okwa li a ningi oshinima sha tya ngaaka, okwa li a hepekwa komukithi omunyanyalithi onkalamwenyo ye ayihe.

Kakele owala kuuvu woshilundu, Gehasi okwa li wo a kanitha oshinima shilwe. Mbela owu shi kutya okwa li a kanitha shike?— Kalunga ka li we e mu hokwa noka li we e mu hole. Inatu ninga nando oshinima tashi tu ningitha tu kale inaatu hokiwa kuKalunga. Pehala lyaashono, natu kale tu na olukeno nokutopola nayalwe shoka tu na.

Lesha mOmbiimbeli yoye

2 Aakwaniilwa 5:5, 20-27 Judas 21;

Johannes 15:10

[Enyolo lyopevi]