SHI IKOLELELA KOSHIPALANYOLO SHOKOMBANDA: UUNAKE MUUYUNI TAMU KA KALA KAAMU NA OKATONGO?
Okatongo nenge okayoya oke li uupyakadhi muuyuni auhe
JONATHAN ngoka a valelwa moAmerika kaavali Aakorea okwa li ha ningwa okatongo sho a li okanona. Sho a koko, okwa kala ha kongo ehala mpoka itaa kala ha ningwa okatongo omolwolupe lwe nenge omuhoko gwe. Okwa ningi ondohotola e ta ka longa mondoolopa yi li kuumbangalantu waAlaska, muAmerika, moka aantu oyendji ye mu fa. Okwa li i inekela kutya huka ko-Arctic Circle ita ka ningwa we okatongo.
Ihe okwa li a teka omukumo konima sho a li a panga omukiintu gwoomvula 25. Sho omukiintu ngoka a zi mo mokoma, okwa tala Jonathan koshipala e te mu tuku, oshoka okwa li a longwa okutonda Aakorea okuza kuugundjuka we. Oshinima shika osha li she mu uvitha nayi noshe mu ulukile kutya oonkambadhala adhihe ndhoka a ningi okutembukila hoka nokutaamba ko eputuko lyaantu yaahoka, inadhi mu kwathela sha.
Oshiholelwa shaJonathan otashi tsu omuthindo uushili kutya okatongo oke li apehe kombanda yevi. Osha fa shi li ngeyi kutya aantu shaa mpoka ye li ohaya ningathana okatongo.
Nonando okatongo oke li apuhe, aantu oyendji kaye ka hole. Shika osha fa owala tashi kondjithathana, oshoka oshinima otashi ka kala kaashi holike ngiini sho oshi li apuhe? Osha yela kutya oyendji mboka kaaye ka hole inaya dhimbulula kutya oye ka na. Mbela nangoye otashi vulika inoo shi dhimbulula?
OSHINIMA SHOPAUMWENE
Oshidhigu okumona ngele owu na okatongo momutima. Ombiimbeli otayi tu lombwele kutya omolwashike oshidhigu sho tayi ti: “Omwenyo ogwo omunamakoto kombanda yiinima ayihe.” (Jeremia 17:9) Onkee ano, otashi vulika twi ifundjaleke kutya otu hole aantu yomaludhi agehe. Nenge tashi vulika twi imbembeleke kutya otu na omatompelo omawanawa okukala hatu ningi aantu yontumba okatongo.
OTO KA KALA WU UVITE NGIINI NGELE OWI IYADHA MONKALO YA TYA NGEYI?
Opo tu shi thaneke kutya oshidhigu okumona ngele otu na okatongo ka holama, tala koshiholelwa tashi landula: Natu tye nduno oto ende mepandaanda kwa luudha ongoye awike. Ko otaku zi aalumentu yaali aagundjuka waa ya shi. Otaya monika ye na oonkondo, ye gumwe okwa a fa e na sha meke.
Mbela oto ka dhiladhila kutya aalumentu mbaka otashi vulika ye ku monithe oshiponga? Otashi vulika wa li nale monkalo ndjoka ye ku longa kutya owu na okukala wa kotokela oonkalo ndhoka. Ihe mbela shoka otashi ti owu li mondjila sho to dhiladhila kutya aalumentu mbaka otaya vulu oku ku etela oshiponga? Epulo ekwawo lya simana olyo: Mbela owa li to dhiladhila kutya aalumentu mbaka aakwashike? Eyamukulo lyoye kepulo ndika otali ke ku ulukila kutya oho kala lela wu uvite ngiini. Otashi vulika li ku hololele kutya nani okatongo oka mena nale omidhi mungoye.
Ngele otwi ikonakona nawa, otatu ka mona kutya otu na mo ngaa okatongo kasha momitima dhetu. Nokuli nOmbiimbeli otayi popi kutya aantu oye na okatongo sho tayi ti: “Ino tala koshuuluko she.” (1 Samuel 16:7) Molwaashoka atuhe otu na egamo lya tya ngaaka ndyoka hali etitha iizemo iiwinayi, mbela otatu vulu ngaa okusinda nenge okweetha po okatongo monkalamwenyo yetu? Mbela muuyuni onamu ka kale ngaa kaamu na okatongo?