Omapulo Gopambiimbeli Taga Yamukulwa
Omolwashike ombili yuuyuni itaayi vulu okumonika?
Epangelo ndyoka tali vulu okulundulula omitima dhaantu olyo owala tali ke eta ombili muuyuni awuhe
Ombiimbeli otayi gandja omatompelo gaali ga simana. Lyotango, nonando aantu oya pondola okuninga iinima iikumithi, ihaya vulu okuukitha oonkantu dhawo yene. Etiyali, oompangela dhaantu ohadhi hulile muunyengwi, molwaashoka “uuyuni auhe ou li mepangelo lyomuhindadhi,” Satana Ondiapoli. Onkee ano, oonkambadhala ndhoka aantu haya ningi itadhi vulu okweeta ombili muuyuni.—Lesha Jeremia 10:23; 1 Johannes 5:19.
Okwiihola mwene kwaantu nesimano oya ningitha wo uuyuni wu kale kaawu na ombili. Epangelo ndyoka tali ke eta ombili muuyuni oondyoka tali ka pangela uuyuni awuhe notali vulu okulonga aantu ya kale ye hole shoka shu uka nokusilathana oshimpwiyu.—Lesha Jesaja 32:17; 48:18, 22.
Olye te ke eta ombili kombanda yevi?
Kalunga Omunankondoadhihe oku uvaneka okudhika po epangelo limwe alike li kale tali pangele aantu ayehe. Otali ka pingena po omapangelo gopantu. (Daniel 2:44) Omwana gwaKalunga, Jesus, ota ka pangela e li Omuwa gwOmbili nenge Omukwaniilwa gwOmbili. Ota ka kutha po uuwinayi awuhe kombanda yevi nota ka longa aantu okukala ye na ombili.—Lesha Jesaja 9:6, 7; 11:4, 9.
Aantu omamiliyona muuyuni awuhe oye li nale kohi yewiliko lyaJesus nohaya longitha Oohapu dhaKalunga, Ombiimbeli, ya longe aantu nkene taya vulu okukala nombili naantu ooyakwawo. Masiku muuyuni awuhe otamu ka kala ombili yashili.—Lesha Jesaja 2:3, 4; 54:13.