Kala Wa Lenga Uukwatya Wajehova Pakuudha

1. (a) Uukwatya wuni waJehova Omukriste ta vulu okudhiladhila kuwo? (b) Otatu ka mona uuwanawa wuni mokukonakona uukwatya waKalunga?

UUKWATYA wuni hawu ya momadhiladhilo goye uuna to dhiladhila kombinga yaJehova? Oyendji yomutse ohatu dhiladhila kombinga yohole, yuuyuuki, yuunongo nosho wo yoonkondo. Ihe nonando ongawo, otu shi kutya Jehova oku na uukwatya owundji uuwanawa. Shoshili osho kutya, otapu vulu okuningwa omusholondondo gwuukwatya waJehova wa yoolokathana wu vulithe po 40, nuukwatya kehe mboka owa kundathanwa miileshomwa yetu. Ngele ohatu ningi ekonakono lyopaumwene nenge lyuukwanegumbo otatu ka mona eliko lyooshili dha dhenga mbanda kombinga yomaukwatya gaJehova. Omomikalo dhini tatu vulu okumona uuwanawa mekonakono lya tya ngaaka? Ekonakono otali vulu oku tu kwathela tu kale twa lenga noonkondo Tate yetu gwomegulu. Sha faathana, ngele otwa lenga Jehova noonkondo, nena otatu kala twa halelela okuhedha popepi naye noku mu holela. — Jos. 23:8; Eps. 73:28.

2. (a) Yelitha nkene tatu vulu okukala twa lenga noonkondo uukwatya waJehova. (b) Otatu ka konakona shike?

² Ihe mbela okukala wa “lenga” oshinima shontumba okwa hala okutya shike? Moshitopolwa shika, oshitya shoka otashi ku ulika kokudhimbulula ongushu yashili yoshinima. Okukala twa lenga oshinima momukalo gwa tya ngaaka ohaku koko mokweendela ko kwethimbo. Natu shi thaneke: Ohatu kala twa lenga notu na olupandu lwiikulya inaatu yi lya nale ngele tu uvu ezimba lyayo, tse tatu uvu omulyo gwayo nokonima tatu ke yi teleka nduno tse yene. Sha faathana, ngele otwa konakona uukwatya waJehova, twa tedhatedha ku wo, nokukala tatu wu ulike monkalamwenyo yetu, shika otashi ke tu kwathela tu kale twa lenga noonkondo uukwatya mboka. (Ef. 5:1) Elalakano lyoshitopolwa shika naambyoka iyali tayi landula ko olyo oku tu kwathela tu kale twa lenga noonkondo uukwatya waKalunga mboka ihaatu dhiladhila kuwo olundji oku wu yelekanitha naamboka we wa tongomana. Sho tatu ka konakona uukwatya kehe, otatu ka yamukula omapulo ngaashi: Uukwatya mboka otawu ti shike? Omomikalo dhini Jehova hu ulike uukwatya mboka? Nongiini tatu vulu okuholela Jehova mokuulika uukwatya mboka?

JEHOVA OKU SHI OKUPOPIWA NAYE NUUPU

3, 4. (a) Omuntu ngoka ha popiwa naye nuupu oku li ngiini? (b) Jehova ohe tu shilipaleke ngiini kutya oha vulu okupopiwa naye nuupu?

³ Tango natu konakoneni kutya okukala ho popiwa nangoye nuupu otaku ti shike. Omuntu ha popiwa naye nuupu oku li ngiini? Otashi vulika wu tye, ‘omuntu ngoka e na olukeno, noha kala e na ethimbo nayalwe.’ Olundji oto vulu okudhimbulula kutya omuntu oha popiwa naye nuupu nenge hasho mokupwilikina kwaashoka ta popi nosho wo kokutala komainyengo golutu ngaashi okuudhika, einyengo lyokoshipala nosho wo galwe.

⁴ Jehova ohu ulike ngiini kutya ota vulu okupopiwa naye nuupu? Nonando Jehova oku li Omushiti omunankondoadhihe gwuuyuni awuhe, ote tu shilipaleke kutya oku na ehalo nokwa halelela okupulakena komagalikano getu noku ga yamukala. (Lesha Episalomi 145:18; Jesaja 30:18, 19.) Otatu vulu okupopya naKalunga ethimbo ele pethimbo kehe nenge kehe mpoka tu li. Otatu vulu okupopya naye twa manguluka tu shi kutya ite ke tu nyenyetela nando. (Eps. 65:2; Jak. 1:5) Oohapu dhaKalunga otadhi popi Jehova momukalo gwentuupeko opo u ulike kutya okwa hala shi kale oshipu kaantu ya popye naye. Pashiholelwa, omupisalomi David okwa li a nyola kutya ‘omeho gOmuwa oge tu taalela’ nosho wo kutya ‘oshikaha she oshe tu gamena.’ (Eps. 34:16, OB-1954, 34:15, OB-1986; 63:8) Omupolofeti Jesaja okwa yelekanitha Jehova nomusita gwoonzi a ti: “Oonzigona ote dhi gongele pamwe noku dhi humbata momaako ge.” (Jes. 40:11) Dhiladhila owala kwaashoka! Jehova okwa hala tu kale popepi naye ngaashi okanzigona ku ukatwa momaako gomusita omunahole. Katu na tuu Tate yetu e shi okupopiwa naye nuupu! Ongiini tatu vulu oku mu holela?

UUKWATYA MBOKA HAWU KALA WA LENGWA KAANTU

5. Omolwashike sha simana aakuluntugongalo ya kale haya popiwa nayo nuupu?

⁵ Omathimbo hamale, aamwatate aalaadhi momanenevi gi ili nogi ili, oya li ya pulwa kutya, “uukwatya wuni wa lenga noonkondo momukuluntugongalo?” Odhindji odha li dha yamukula dha ti: “Okukala ha popiwa naye nuupu.” Dhoshili, Omukriste kehe okwa pumbwa okukala e na uukwatya mboka, ihe osha simanenena unene tuu aakuluntugongalo ya kale haya popiwa nayo nuupu. (Jes. 32:1, 2) Omumwameme gumwe okwa li a gandja etompelo kutya omolwashike uukwatya mboka wa simana a ti: “Otatu vulu owala okumona uuwanawa muukwatya wulwe womukuluntugongalo ngele oha popiwa naye nuupu.” Mbela owu wete kutya omolwashike a popile ngawo? Ihe mbela oshike hashi ningitha omuntu a kale ha vulu okupopiwa naye nuupu?

6. Oshinima shini sha simana tashi ke tu kwathela tu kale hatu popiwa natse nuupu?

⁶ Opo shi kale oshipu okupopiwa nangoye nuupu owu na okuulika kutya owu na ko nasha nayalwe shili. Ngele omukuluntugongalo oku na ko nasha nayalwe noku na ehalo lyoku ya kwathela, aamwatate naamwameme, mwa kwatelwa aagundjuka otaya ka dhimbulula kutya oku na uukwatya mboka. (Mark. 10:13-16) Carlos, gwomimvo 12 okwa ti: “Ohandi mono aakuluntugongalo tayi imemeha noye na olukeno poshinyanga, nondi hole uukwatya wawo mboka.” Eeno, inashi gwana owala ngele omukuluntugongalo ta ti kutya oha popiwa naye nuupu, ihe oku na okuulika uukwatya mboka. (1 Joh. 3:18) Ongiini ta vulu oku shi ninga?

7. Omolwashike okuzala okakalata koshigongi haku pendutha oonkundathana olundji, noshiilongomwa shini tatu ilongo moshinima shoka?

⁷ Dhiladhila kefaathanitho ndika. Omathimbo hamale, omumwatate gumwe okwa li a zala okakalata ke koshigongi shoshitopolwa sho a li molweendo nondhila okuza koshigongi shoka sha li kondje yiilongo. Sho omuyakuli gwomondhila a mono okakalata hoka ka nyolwa ‘Uukwaniilwa waKalunga nawu ye!’ okwa lombwele omumwatate a ti, “eeno, nawu ye shili, otu na okupopya kombinga yaashika.” Konima yethimbo oya li ya kundathana, nomuyakuli okwa taamba ko iileshomwa yetu nenyanyu. Oyendji yomutse otu na wo iimoniwa ya faathana. Ihe omolwashike mbela okakalata koshigongi haka pendutha oonkundathana olundji? Omolwaashoka ohaka kala ka fa taka lombwele aantu taka ti: “Kala wa manguluka okupopya nangame. Pula ndje kutya otandi yi peni.” Okakalata oke li endhindhiliko ndyoka hali ningitha aantu ya tseye kutya otu na ehalo okupopya nayo kombinga yeitaalo lyetu. Sha faathana, aakuluntugongalo Aakriste oye na okugandja omandhindhiliko ge wetike ngoka haga lombwele ooitaali ooyakwawo taga ti: “Kala wa manguluka okupopya nangame.” Omandhindhiliko gamwe gomugo ogeni?

8. Aakuluntugongalo ohaya gandja omandhindhiliko ngiini kutya oye na ko nasha shili nayalwe, naashoka ohashi gumu ngiini egongalo?

⁸ Omikalondjigilile dhomiilongo otadhi vulu okukala dha yoolokathana, ihe ngele ohatu imemeha, hatu minike aamwatate naamwameme, nohatu ya popitha nethimbo, otatu ku ulika kutya otu na ko nasha lela nayo. Olye mbela e na oku shi ninga tango? Tala koshiholelwa shoka Jesus a tula po. Mateus okwa li a nyola kutya mokugongala hoka a li e na naalongwa ye, “Jesus okwe ya kuyo nokwe ya lombwele.” (Mat. 28:18) Sha faathana, aakuluntugongalo kunena oye na okukatuka oonkatu tango ya ye kooitaali ooyakwawo nokupopya nayo. Shoka otashi vulu okuguma egongalo ngiini? Omumwameme omukokolindjila gwoomvula 88 okwa ti: “Okwiimemeha kwaakuluntugongalo netsomukumo ndyoka haya pe ndje ngele nde ya mOshinyanga shUukwaniilwa ohaku nyanyudha ndje noonkondo.” Omumwameme gulwe omudhiginini okwa gwedha ko a ti: “Otashi vulika shi kale sha talika ko shi li oshinima shanathangwa, ihe uuna omukuluntugongalo a taamba ndje pokugongala ti imemeha, ohashi ti oshindji kungame.”

OHA POPIWA NAYE NUUPU NOKU NA ETHIMBO NAANTU

9, 10. (a) Jehova okwa tula po oshiholelwa oshiwanawa shashike? (b) Ongiini aakuluntugongalo taya vulu okukala nethimbo ya popye nayalwe?

⁹ Uushili owo kutya, itashi wapa aantu ya popye natse ngele katu na ethimbo nayo. Jehova okwe tu tulila po oshiholelwa oshiwanawa mwaashoka. “Ke li kokule nomuntu nando ogumwe.” (Iil. 17:27) Omukalo gumwe moka aakuluntugongalo taya vulu okukala nethimbo ya popye naamwatate naamwameme kutya nduno aagundjuka nenge aakokele, ogwo okwiikalekela ethimbo manga okugongala kwopaKriste inaaku tameka nokonima yakwo. Omumwatate gumwe omukokolindjila okwa ti: “Uuna omukuluntugongalo a pula ndje kutya otandi shi enditha ngiini ye ta pulakene keyamukulo lyandje, ohandi kala ndu uvite nda lengwa shili.” Omumwameme gumwe ngoka a kala ta longele Jehova omimvo 50 lwaampono okwa ti: “Aakuluntugongalo mboka haya kongo ethimbo ya popye nangame konima yokugongala ohaya ningitha ndje ndi kale ndi uvite ndi na oshilonga.”

¹⁰ Shoka shi shi okuuviwa ko osho kutya aakuluntugongalo oye na wo iinakugwanithwa yilwe. Ihe nonando ongawo, oye na okulalakanena okugandja tango eitulomo kaamwatate naamwameme pokugongala kehe.

JEHOVA KE NA ONTONDO

11, 12. (a) Okwaanontondo okwa kwatela mo shike? (b) Jehova okwe tu tulila po oshiholelwa shini shokwaanontondo?

¹¹ Uukwatya waJehova wokwaanontondo owo wumwe we womwaamboka uuwanawakaaku na we. Okwaanontondo okwa kwatela mo shike? Okwa kwatela mo okukala nuuyuuki, okwaahe na okayoya nenge okwaagama ombinga. Okukala twaa na ontondo shili okwa kwetela mo iinima iyali: iikala nosho wo oonkatu dhetu. Omolwashike ayihe ya pumbiwa? Omolwaashoka ongele owala omuntu kee na ontondo ta ka vula okuungaunga naantu ayehe kee na ontondo. Momanyolo gopaKriste gOshigreka, oshitya “okwaanontondo” osha hala lela okutya ‘okwaatala kiipala’ ano okukala inoo hokwa omuntu gumwe shi vulithe mukwawo. (Iil. 10:34; Kingdom Interlinear) Eeno, omuntu ngoka kee na ontondo iha tala owala omuntu kombanda nenge koonkalo dhe, ihe okomuntu ye mwene nokeihumbato lye.

¹² Jehova okwa tula po oshiholelwa dhingi shokwaanontondo. Oohapu dhe otadhi ti kutya oha tala ‘aantu ye thike pamwe’ nosho wo kutya ‘iha ungaunga naantu nontondo.’ (Lesha Iilonga 10:34, 35; Deuteronomium 10:17.) Okwa li u ulike uukwatya mboka monkalo yimwe ndjoka ya li ya holoka po pethimbo lyaMoses.

13, 14. (a) Uupyakadhi wuni oyanakadhona yatano yaZelofhad ya li ye na? (b) Jehova okwa li u ulike ngiini okwaanontondo?

¹³ Manga owala Aaisraeli ya li pokuya mEvi lyEuvaneko, opwa li pu na aakadhona aamwayinathana inaaya hokanwa ye na uupyakadhi wontumba. Uupyakadhi washike mbela? Oya li ye shi shi kutya egumbo lyawo olya li tali ka pewa oshitendelwa shoka sha li sha nuninwa he ngaashi omagumbo galwe gAaisraeli. (Num. 26:52-55) Ihe tate gwawo, Zelofhad gwomezimo lyaManasse okwa adhika a sa nale. Shi ikolelela kompango, oyanamati yaZelofhad oyo ya li ye na uuthemba wokupewa oshitendelwa shoka, ihe Zelofhad okwa li owala e na aakadhona. (Num. 26:33) Sho kaapwa li aamati ya pewe oshitendela shoka, mbela oshitendelwa shawo shevi osha li tashi ka pewa po aapambele yo oyanakadhona yaZelofhad taya kala inaaya mona uuthiga wegumbo lyawo?

¹⁴ Aamwayinathana mbaka oya yi kuMoses e taye mu pula taya ti: “Edhina lyatate otali dhimine mo moluvalo lwe, sho a li [kee] na omuna omumati?” Oyi indile ya ti: “Tu pii mo wo oshitendelwa omaamwayina yatate!” Mbela Moses okwa li e ya yamukula kutya ‘Ompango ndjoka itayi lunduluka nando’? Aawe, “oohapu ndhoka okwe dhi etele koshipala shOMUWA.” (Num. 27:2-5, OB-1954) Oya li ya yamukulwa ngiini? Jehova okwa lombwele Moses a ti: “Shoka sha pulwa kaana yaZelofhad, oshi li mondjila, ya pa oshitendelwa mokati kaamwayina yahe. Ya pa oshitendelwa shahe.” Jehova ina hulila owala mpoka. Shoka a yamukula aakadhona mboka, okwe shi ningi ompango sho a lombwele Moses a ti: “Ngele oku na omuntu ta si ye ke na aanona aamati, omwana omukadhona na thigulule eliko lye.” (Num. 27:6-8; Jos. 17:1-6) Okuza mpoka, aakiintu Aaisraeli mboka ya li ye na uupyakadhi wa tya ngaaka oya li taya ka kala ya gamenwa.

15. (a) Jehova ohu ungaunga ngiini naapiya ye unene tuu mboka ihaaya vulu okwiikwatha? (b) Omahokololo galwe gOmbiimbeli geni ngoka tagu ulike kutya Jehova ke na ontondo?

¹⁵ Kalya li tuu etokolo li li pahenda notali ulike kutya Jehova ke na ontondo! Jehova okwa li ungaunga nesimaneko naakiintu mbaka ya li itaaya vulu okwiikwatha ngaashi a li e shi ningile Aaisraeli mboka ya li ye li moonkalo dhi li hwepo. (Eps. 68:5) Ehokololo ndika olyo limwe lyomomahokololo gOmbiimbeli ngoka tagu ulike uushili kutya Jehova ihu ungaunga nontondo naapiya ye. — 1 Sam. 16:1-13; Iil. 10:30-35, 44-48.

OTATU VULU OKUHOLELA JEHOVA

16. Ongiini tatu vulu okukala kaatu na ontondo ngaashi Jehova?

¹⁶ Ongiini tatu vulu okuholela oshiholelwa shaJehova shokukala kee na ontondo? Dhimbulukwa kutya okwaanontondo okwa kwatela mo iinima iyali. Ngele katu na ontondo opo owala itaatu ka ungaunga nayalwe nontondo. Odhoshili kutya atuhe ohatu dhiladhila kutya otwa mangulukila kehe gumwe nokatu na ontondo. Otashi vulika to tsu kumwe nedhiladhilo kutya haaluhe hashi kala oshipu okukonakona omaiyuvo getu paushili. Onkee ano, oshike tatu vulu okuninga opo tu mone ngele otu na okayoya nenge hasho? Sho Jesus a li a hala a tseye shoka aantu haya popi kombinga ye, okwa pula ookuume ke aainekelwa a ti: “Aantu otaa ti ngiini, Omuna gwOmuntu oye olye?” (Mat. 16:13, 14) Omolwashike itoo holele Jesus mwaashoka? Oto vulu okupula kuume ngoka te ke ku lombwela oshili ngele owa tseyika kutya ku na ontondo. Ngele kuume koye okwa ti oku wete kutya mungoye omu na ngaa iikala yokuyoolola aantu shi ikolelela kuukwamuhoko, keputuko nenge kiiniwe yawo, owu na okuninga po shike? Galikana kuJehova waa na ezimbuko kombinga yankene wu uvite, to mu indile e ku kwathele wu lundulule iikala yoye opo wu mu holele thiluthilu. — Mat. 7:7; Kol. 3:10, 11.

17. Omomikalo dhini tatu vulu okuungaunga nayalwe kaatu na ontondo?

¹⁷ Sho tu li megongalo lyopaKriste, ohatu ulike kutya otwa hala okuholela oshiholelwa shaJehova shokwaanontondo mokuungaunga nesimaneko nosho wo nohole naamwaatate nonaamwameme ayehe. Pashiholelwa, uuna tashi ya pokuyakula yalwe, otu na okukala hatu hiya ooitaali ooyakwetu ayehe, mwa kwatelwa mboka yomomaputuko ngoka ga yooloka ko kugetu, nosho wo oohepele, oothigwa, nenge aaselekadhi. (Lesha Aagalati 2:10; Jakob 1:27.) Oshikwawo, sho tu li miilonga yokuuvitha Uukwaniilwa, otu na okulombwela kehe gumwe onkundana ombwanawa kaatu na ontondo kutya nduno ogwomomuhoko guni, mwa kwatelwa naakwiilongo. Otwa nyanyukwa shili sho tu na iileshomwa yopaMbiimbeli momalaka ge thike lwopo 600. Shoka itashi ulike tuu uukwatya wokwaanantondo!

18. Oto ku ulika ngiini paumwene kutya owa lenga uukwatya waJehova wokupopiwa naye nuupu nowokwaanontondo?

¹⁸ Odhoshili kutya, sho tatu longitha ethimbo tu tedhatedhe kuukwatya waJehova ngaashi wokupopiwa naye nuupu nosho wo wokwaanontondo, otatu ka kala twe mu lenga noonkondo. Okukala twa lenga noonkondo uukwatya mbuka waJehova, otaku ke tu inyengitha tu mu holele thiluthilu, nokuulika uukwatya mboka sho tatu ungaunga nooitaali ooyakwetu nosho wo naamboka tatu uvithile.