OMAPULO GOPAMBIIMBELI TAGA YAMUKULWA
Mbela Kalunga oha pulakene komagalikano agehe?
Kalunga oha pulakene komagalikano gaantu yomiigwana ayihe. (Episalomi 145:18, 19) Oohapu dhe, Ombiimbeli, otadhi tu ladhipike tu popye naye kombinga yuupyakadhi kehe tu na. (Aafilippi 4:6, 7) Ihe nonando ongaaka, opu na omagalikano gamwe ngoka Kalunga ihaa hokwa. Pashiholelwa, iha hokwa omagalikano gaamboka haya endulula omagalikano ngoka yi ilonga momutse.—Lesha Mateus 6:7.
Niishewe Jehova iha hokwa omagalikano gaantu mboka haya yonene owina oompango dhe. (Omayeletumbulo 28:9) Pashiholelwa, pethimbo lyOmbiimbeli, Kalunga okwa li a tindi okupulakena komagalikano goshigwana shaIsraeli shoka sha li oshidhipagi. Osha yela kutya otu na okugwanitha po iitegelelwa yontumba, opo tu uvike kuKalunga.—Lesha Jesaja 1:15.
Mbela otu na okuninga shike opo tu uvike kuKalunga?
Itatu vulu okugalikana Kalunga ngele katu na eitaalo. (Jakob 1:5, 6) Otu na okukala twa tompwa kutya Kalunga oko e li noku na ko nasha natse. Opo tu koleke eitaalo lyetu, otu na okukala hatu konakona Ombiimbeli, molwaashoka eitaalo lyashili olya kankamena kuumbangi mboka tawu adhika mOohapu dhaKalunga.—Lesha Aahebeli 11:1, 6.
Otu na okugalikana tashi zi komutima noneifupipiko. Nokuli nOmwana gwaKalunga, Jesus, okwa li ha galikana neifupipiko. (Lukas 22:41, 42) Onkee ano, pehala lyokulombwela Kalunga shoka e na okuninga, otu na okulesha Ombiimbeli nokukambadhala tu uve ko shoka a hala tu ninge. Opo nduno otatu ka vula okugalikana metsokumwe nehalo lye.—Lesha 1 Johannes 5:14.