Jehova na koleke ondjokana yeni ye ne yi gamene

1, 2.(a) Omolwashike Aaisraeli 24 000 inaaya ka mona we eyambeko ndyoka ya li yu uvanekelwa? (b) Omolwashike iiningwanima yonale ya simana kutse?

OSHIGWANA shaIsraeli sho sha li pokuya mEvi lyEuvaneko, aalumentu omayuvi “oya hondele naakadhona Aamoabi.” Shika osha ningitha Jehova a hanagule po aalumentu 24 000. Dhimbulukwa kutya Aaisraeli oya li ye li pokuthigulula oshilongo shoka yu uvanekelelwe. Ihe inaya ka mona eyambeko ndyoka, oshoka oyi iyethele moluhondelo.— Num. 25:1-5, 9.

² Oshiholelwa shika shinikitha oluhodhi osha nyolwa, opo shi ‘tu londodhe, twaa longe iilonga iiwinayi.’ (1 Kor. 10:6-11) Ngashingeyi otu li konyalanyala pehulilo ‘lyomasiku gahugunina,’ (NW) notu li pokuya muuyuni uupe. (2 Tim. 3:1; 2 Pet. 3:13) Ihe mupyamunene, yamwe yomaalongeli yaJehova oye etha po okwiiyutha komithikampango dhaJehova dhi nasha neihumbato. Oya hondele noya teya shoka ya kunu. Aantu ya tya ngaaka otashi vulika itaaya ka mona omwenyo gwaaluhe mOparadisa kombanda yevi.

3. Omolwashike aaihokani ya pumbwa ewiliko negameno lyaJehova mondjokana yawo? (Tala kethano lyopetameko.)

³ Molwaashoka uuyuni mbuka owa kwatwa ko koluhondelo, aaihokani oya pumbwa ewiliko negameno lyaJehova, opo oonkambadhala dhawo dhokugamena ondjokana yawo kaadhi kale osima. (Lesha Episalomi 127:1.) Moshitopolwa shika otatu ka kundathana kombinga yankene aaihokani taya vulu okukoleka oondjokana dhawo, ngele otaya gamene omitima dhawo, taya hedha popepi naKalunga, taya zala omuntu omupe, taya kala haya kundathana nohayi igwanithile po oompumbwe dhawo mondjokana.

GAMENA OMUTIMA GWOYE

4. Oshike hashi ningitha Aakriste oyendji ya yone?

⁴ Ohashi ende ngiini, opo Omukriste a gwile moluhondelo? Olundji oluhondelo ohalu tameke naashono tatu tala. Jesus okwe shi yelitha a ti: “Okehe tuu ngoka ta tala omukiintu e mu haluka, oye okwe mu hondele momwenyo gwe.” (Mat. 5:27, 28; 2 Pet. 2:14) Aakriste oyendji oyi iyethele momikalo dha nyata e taya yono, sho ya kala haya tala omathano giipala, haya lesha iileshomwa tayi popi kombinga yomilalo nenge taye yi tala kointaneta. Yo yalwe oya kala haya tala oomuvi niinyandwa yi na ko nasha niinima yopamilalo nenge haya tala oopolohalama dhiinima ya nyata kotiivii. Nayalwe oya kala haya yi kookalaba nokomahala hoka haku ulikwa omainyanyudho ga nyata nokomahala gokuthula aantu momukalo tagu pendutha omahalo gopamilalo.

5. Omolwashike twa pumbwa okugamena omitima dhetu?

⁵ Yamwe oye etha ya gwile meyono, sho ya tameke okuhokwa aantu mboka kaaye shi ookuume kawo kopandjokana. Nena otu li muuyuni moka aantu ihaaya vulu okwiipangela naanaa noye hole okwiinyanyudha niinima mbyoka yi nasha noluhondelo. Niishewe, shaashi inatu gwanenena, omitima dhetu odhi na omakoto nohadhi tu kotokele, opo tu kwatwe nuupu komahalo gokukala twa hokwa omuntu ngoka kee shi kuume ketu kopandjokana. (Lesha Jeremia 17:9, 10.) Jesus okwa ti: “Momwenyo ohamu zi omadhiladhilo omawinayi, omadhipago, uuholume, oluhondelo, uufuthi, omalundilathano nokusheka.”— Mat. 15:19.

6, 7. (a) Oshike tashi vulu okuningwa po ngele otwa pendutha uuhalu uuwinayi momitima dhetu? (b) Ongiini tatu vulu okuyanda okuyona kuJehova?

⁶ Uuna omahalo omawinayi ga tameke okukoka momitima dhi na omakoto dhaamboka ya hokwathana, otashi vulika ya tameke okupopya kombinga yiinima mbyoka ye na okupopya owala nookuume kawo kopandjokana. Ohaya tameke okukala haya kala pamwe olundji, notashi vulika ya mone inaashi puka. Olundji ohayi iningitha nokuli ya fa ya tsakanene owala ohaluka. Mpoka pu thike taya kala pamwe ethimbo ele, opo pu thike tashi kala oshidhigu oku shi etha po, nokuli nando oye shi kutya osha puka.— Omayel. 7:21, 22.

⁷ Ohaya dhimbwa thiluthilu omithikampango dhaJehova, e taya tameke okukala hayi ikwata miikaha, haya hupitathana, haya pampadhalathana nokugumathana momukalo ngoka tagu ya fala moluhondelo. Iinima mbika oye na owala oku yi ninga nookuume kawo kopandjokana. Nohugunina, uuhalu ‘otawu ya hekaheka e tawu ya yulu.’ Ngele uuhalu mboka wa koko, “otau vala uulunde.” (Jak. 1:14, 15) Shika kashi yemateka tuu! Aantu mbaka ayehe yaali oya li taya vulu okuyanda eyono ndyoka nokweetha Jehova e ya kwathele ya kale ya simaneka oondjokana dhawo. Ihe ongiini omuntu ta vulu oku shi ninga?

KALA TO HEDHA POPEPI NAKALUNGA

8. Ongiini uukuume naJehova hawu kwathele aaihokani ya yande oluhondelo?

⁸ Lesha Episalomi 97:10. Okukala ookuume kaJehova otashi tu gamene kaatu hondele. Uuna twa tseya omaukwatya ge omawanawa, ohatu ‘kambadhala oku mu holela, oshoka otse oyana aaholike,’ notashi ke tu nkondopaleka, opo tu yande ‘oluhondelo niilonga ya nyata yoludhi kehe.’ (Ef. 5:1-4) Ngele aaihokani oye shi kutya “Kalunga ota ka pangula mboka ye hole oluhondelo nuuholume,” ohaya kambadhala okusimaneka ondjokana yawo noku yi kaleka kaayi na oshipo.— Heb. 13:4.

9. (a) Josef okwa kondjitha ngiini emakelo lyokuya moluhondelo? (b) Oshike tatu ilongo moshiholelwa shaJosef?

⁹ Aapiya yaKalunga yamwe aadhiginini oyi iyethele moluhondelo, sho ya kala taye endathana naamboka kaaye shi Oonzapo konima yiilonga. Yalwe oya makelwa manga ye li kiilonga. Omulumentu omugundjuka, Josef, manga a li kiilonga, okwa mono kutya omukulukadhi gwomuhona gwe okwe mu hala. Omukulukadhi okwa kala ha kambadhala omasiku nomasiku oku mu heka. Lwahugunina, “omukulukadhi okwe mu kwata konguwo ye e ta ti: ‘Tu lale.’” Ihe Josef okwa fadhuka po. Oshike sha kwathele Josef a kale a kola pambepo sho ta makelwa? Josef okwa li a tokola toko okukaleka po uukuume we naKalunga. Oshilanduliko, okwa kanitha iilonga ye nokwa tulwa mondjedhililo kaashi li pauyuuki. Ihe Jehova okwa li e mu yambeke. (Gen. 39:1-12; 41:38-43) Kutya nduno okiilonga nenge opehala kehe, Aakriste oya pumbwa okuyanda emakelo lyokuya momilalo naangoka kee shi kuume kawo kopandjokana.

ZALENI OMUNTU OMUPE

10. Okuzala omuntu omupe otaku tu kwathele ngiini tu yande oluhondelo?

¹⁰ Molwaashoka omuntu omupe okwa “shitwa a fa Kalunga nohi iholola ye mwene mokukalamwenyo ku uka nokwa yapuka,” osha simana kaaihokani ya koleke uupambepo wawo. (Ef. 4:24) Mboka haya zala omuntu nguka omupe ohaya ‘dhipaga’ uuhalu wawo, “ngashika oluhondelo, iipala, uuholume nuuhalu uuwinayi nolwiho.” (Lesha Aakolossa 3:5, 6.) Oshitya “dhipageni” otashi ulike kutya otu na okukatuka oonkatu dha kwata miiti tu kondjithe uuhalu wonyama. Otatu ka yanda kehe shimwe shoka tashi vulu oku tu ningitha tu kale twa hala okuya momilalo naangoka kee shi kuume ketu kopandjokana. (Job 31:1) Uuna tatu kala pamithikampango dhaKalunga, otashi tu longo ‘okutonda shaa shoka oshiwinayi, tse tu dhiginine shoka oshiwanawa.’— Rom. 12:2, 9.

11. Okuzala omuntu omupe otaku koleke ngiini ondjokana?

¹¹ Ngele otwa hala okukala tu na omaukwatya ga fa gaJehova, otu na okuzala omuntu omupe. (Kol. 3:10) Uuna aaihokani tayu ulukilathana omaukwatya ngaashi “olukeno, ohenda, eifupipiko, ombili neidhidhimiko,” otaya kala ye na ondjokana ya kola, na Jehova ote ya yambeke. (Kol. 3:12) Ohaya kala wo ya hangana lela mondjokana yawo, uuna ‘ombili ndjoka Kristus te yi gandja, tayi ya pangele.’ (Kol. 3:15) Aaihokani ihaya kala tuu ya lalekwa nuuyamba ngele oye “na ohole”! Ohashi ya nyanyudha ngele taya “lalakanene okusimanekathana.”— Rom. 12:10.

12. Omaukwatya geni wu wete ga simana taga kwathele aaihokani ya kale ya nyanyukwa mondjokana yawo?

¹² Sho omusamane gwedhina Sid a pulwa kutya omaukwatya geni omawanawa ge ya kwathela ya kale ya nyanyukwa mondjokana yawo, okwa ti: “Ohole oyo unene uukwatya wa kala hawu tu kwathele aluhe mondjokana yetu. Otwa mona wo kutya osha simana okukala aanambili.” Omukadhi Sonja ota tsu kumwe naye, nokwa gwedha ko a ti: “Uunambili owo uukwatya wa pumbiwa lela. Otwa li wo twa kambadhala okukala aaifupipiki, nokuli nonando olundji kashi shi oshipu.”

KALENI HAMU KUNDATHANA

13. Oshike sha simanenena, opo ondjokana yi kale ya kola, nomolwashike?

¹³ Gumwe gwomomikalo dha simanenena dhokukaleka ondjokana ya kola ogwo okupopya nombili nookuume ketu kopandjokana. Mupyamunene, aaihokani yamwe ihaya simanekathana mokupopya ngaashi haye shi ningile mboka kaaye shi ookuume kawo kopandjokana. Aaihokani kaye na okweetha omalaka ‘omalulu, ondjahi nonkone, omakudhilo nenge omatukano,’ yi nkundipaleke ondjokana yawo. (Ef. 4:31) Okupaathana aluhe uusama nosho wo eihumbato lilwe ndyoka hali uvitha nayi otali yono po ondjokana. Onkee ano, aaihokani oya pumbwa okukoleka ekwatathano lyawo lyomondjokana mokukala haya popi nombili, nohenda nonolukeno.— Ef. 4:32.

14. Oshike tu na okuyanda?

¹⁴ Ombiimbeli otayi ti kutya opu na “ethimbo lyokumwena.” (Omuuv. 3:7) Shika itashi ti kutya otu na okukala ihaatu popi nakuume ketu kopandjokana, shaashi okupopya okwo oshinima sha simanenena mondjokana. Omukulukadhi gumwe moNdowishi ota ti: “Okumwena otaku vulu ku ehameke kuume koye. Ihe nonando oshidhigu okukala wa ngungumana uuna pwa holoka onkalo ombwinayi, itashi kwatha sha wu popye namukweni nomagandambadhi, opo ando wu fululuke. Shoka otashi ka nayipaleka owala onkalo, oshoka otashi ke ku ningitha wu popye nenge wu ninge oshinima shoka tashi ehameke mukweni.” Okunyenyeta nenge okukala itaaya popi, itaku pongolola po uupyakadhi pokati komusamane nomukulukadhi. Pehala lyaashono, aanandjokana ohaya koleke ondjokana yawo, ngele ohaya kandula po okwaauvathana mbala noihaya pitike ku shituke oontamanana.

15. Ongiini okupopya momukalo omwaanawa taku koleke ondjokana?

¹⁵ Ngele aaihokani ohaya kongo ethimbo lyokulombwelathana omaiyuvo nomadhiladhilo gawo, otashi ka koleka ondjokana yawo. Shoka tatu popi hasho owala sha simana, ihe osha simana wo okutala kutya otatu shi popi ngiini. Onkee ano, uuna pwa holoka onkalo ondhigu, kambadhala okupopya oohapu oombwanawa, to shi ulike momutono gwewi lyoye nomoohapu dhoye. Kungawo, otashi ka kala oshipu kukuume koye kopandjokana okupulakena sho to popi. (Lesha Aakolossa 4:6.) Aaihokani otaya vulu okukoleka ondjokana yawo, ngele ohaya popi momukalo omwaanawa, taya popi ‘ashike oohapu ndhoka oombwanawa tadhi tungu nodha pumbiwa, opo ookuume kawo kopandjokana ye dhi hokwe.’— Ef. 4:29.

GWANITHILATHANII PO OOMPUMBWE DHENI

16, 17. Omolwashike sha simana aaihokani ya gwanithilathane po oompumbwe dhawo dhopamilalo nodhopamadhiladhilo?

¹⁶ Aaihokani otaya vulu wo okukoleka ondjokana yawo uuna haya pititha uuwanawa wookuume kawo kopandjokana komeho yowawo. (Fil. 2:3, 4) Aaihokani oye na okukala ye na ko nasha nomaiyuvo nosho wo noompumbwe dhopamilalo dhookuume kawo kopandjokana.— Lesha 1 Aakorinto 7:3, 4.

¹⁷ Shiyemateka, aaihokani yamwe ihaya ulukilathana ohole, nenge haya tindi okugwanithilathana po oompumbwe dhawo dhopamilalo. Aasamane yamwe ohaya dhiladhila kutya ngele oya kala ye na olukeno naakulukadhi yawo otaya talika ko kaaye shi aalumentuelela. Ombiimbeli otayi ti: “Ne aalumentu omu na okukambadhala okuuva ko aakulukadhi yeni.” (1 Pet. 3:7, Phillips) Omusamane oku na oku shi uva ko kutya okugwanithilathana po oompumbwe dhopamilalo inaku kwatela mo owala okuya momilalo. Omukulukadhi oha nyanyukilwa unene ekwatathano lyopandjokana, uuna omusamane gwe hu ulike ohole noku na ohenda aluhe, hangele owala taya yi momilalo. Uuna ayehe yaali hayu ulukilathana ohole, otaye ki igwanithila po nuupu oompumbwe dhawo dhopamadhiladhilo nodhopanyama.

18. Omusamane nomukulukadhi otaya vulu ngiini okukoleka ondjokana yawo?

¹⁸ Nonando aaihokani kaye na eipopilo lyokuya pondje yondjokana, ngele katu na ohole nolukeno nookuume ketu kopandjokana, otashi vulika shi ya ningithe ya ye pondje yondjokana. (Omayel. 5:18; Omuuv. 9:9) Onkee ano, Ombiimbeli otayi londodha aaihokani tayi ti: “Inamu idhilikathana, shila uuna mu uvathana, mu shi ninge okathimbo kowala.” Omolwashike? “Opo mwaa gwile memakelo lyaSatana, sho itaamu vulu okwiidhidhimika.” (1 Kor. 7:5) Itashi ka kala tuu shiyemateka, ngele gumwe gwomaaihokani okwe etha Satana e mu makele e taya yi moluhondelo, molwaashoka kee na ‘eidhidhimiko’! Ihe shika itashi ka ningwa, ngele omunandjokana kehe iha ‘longo owala shoka she mu opalela, ihe oha tala wo shoka tashi opalele mukwawo,’ nohaya gwanithilathana po oompumbwe dhawo mondjokana, molwaashoka ye holathane, ihe hamolwaashoka owala shi li oshinakugwanithwa shawo. Okuulukilathana ohole nokuuvithathana nawa kwa tya ngaaka ohaku koleke ondjokana yawo.— 1 Kor. 10:24.

TSIKILENI OKUGAMENA ONDJOKANA YENI

19. Otu na okukala twa tokola toko okuninga shike, nomolwashike?

¹⁹ Otu li lela popepi nokuya muuyuni uupe. Nomolwaashoka ngele otwe etha tu gwile mokahalu, otashi ke tu etela oshiponga ngaashi sha ningililwe Aaisraeli 24 000 molushandja lwaMoab. Sho Ombiimbeli ya hokolola ehokololo ndyoka, oya ti: “Ngoka ta dhiladhila kutya okwa thikama, na kotoke, kaa gwile po.” (1 Kor. 10:12) Onkee ano, osha simana tu kaleke ekwatathano lyetu naJehova nosho wo nakuume ketu kopandjokana lya kola, opo tu koleke ondjokana yetu. (Mat. 19:5, 6) Ngashingeyi olyo ethimbo ‘lyokukambadhala okukala aayogoki notwaa na oshipo koshipala shaKalunga, notu na ombili naye.’— 2 Pet. 3:13, 14.