Olye e na okupewa ombedhi?

Ngele Kalunga haye he etitha okumona iihuna, olye omweetithi gwondjala yamatutu, gwoluhepo, gwiita yamemememe, gwomikithi dhomalega nosho wo gwiiponga yopaunshitwe? Oohapu dhaKalunga otadhi gandja omatompelo gatatu ga simanenena ngoka ogo osheetithi shokumona iihuna kwaantu:

1. Okwiiholamwene, olwiho nuutondwe. ‘Omuntu gumwe ota dhiladhilile mukwawo oshiponga.’ (Omuuvithi 8:9) Olundji aantu ohaya mono iihuna molwaashoka ya ningwa iihakanwa kaantu ooyakwawo mboka inaaya gwanenena, yi ihole yo yene nenge ye na onyanya.

2. Ethimbo niiningwanima yombaadhilila. Olundji aantu ohaya mono iihuna ‘omolwethimbo niiningwanima yombaadhilila.’ (Omuuvithi 9:11, NW) Ano sha hala okutya aantu ohaya adhika owala pehala lya puka pethimbo lya puka, iiponga ohayi holoka, nenge aantu kaye na ko nasha nenge epuko owala.

3. Omupangeli gwuuyuni omukolokoshi. Ombiimbeli oya tumbula iinima mbyoka hayi etitha okumona iihuna kwaantu. Otayi ti: “Uuyuni auhe ou li mepangelo lyomuhindadhi.” (1 Johannes 5:19) “Omuhindadhi” oSatana Ondiyapoli, oshishitwa shopambepo oshinankondo shoka sha li omuyengeli gwaKalunga megulu, ihe “ina kala omudhiginini moshili.” (Johannes 8:44, NW) Iishitwa yilwe yopambepo oya li yi imbwanga mumwe naSatana e taya tukulile Kalunga oshipotha opo ya gwanithe po omahalo gawo gokwiiholamwene, nokungawo oya ningi oompwidhuli. (Genesis 6:1-5) Okuza kesiku ndyoka, Satana noompwidhuli dhe oya nwetha mo nayi iinima yuuyuni mbuka. Shoka osho shi li ngaaka nokunena. Ngashingeyi Ondiyapoli oya geya noonkondo notayi “pukitha uuyuni auhe” shoka she etitha ‘iihuna kombanda yevi.’ (Ehololo 12:9, 12) Satana omukwanyanya. Ohi inyanyudha mokutala aantu taya mono iihuna. Satana oye he etitha okumona iihuna, ihe ke shi Kalunga nando.

DHILADHILA KWAASHIKA: Omukolokoshi ngoka a shiga ko nokee na ohole oye owala ta vulu okuningitha aantu ya kale taya mono iihuna. Mepingathano naashono, Ombiimbeli otayi ti: “Kalunga oye ohole.” (1 Johannes 4:8) Molwaashoka ye ohole “Itashi vulika Kalunga a longe uugoyoki. Omunankondoawike ita vulu okulonga uuwinayi.” — Job 34:10.

Ihe otashi vulika wi ipule kutya, ‘Mbela sigo uunake Kalunga Omunankondoawike te etha Satana a tsikile nepangelo lye ekwanyanya?’ Ngaashi twe shi mono, Kalunga oku tonde uukolokoshi, nokumona iihuna kwetu ohaku mu ehameke. Oohapu dhe otadhi tu ladhipike tadhi ti: “Mu tsikeni iimpwiyu yeni ayihe, oshoka oye omusilishimpwiyu gweni.” (1 Petrus 5:7) Kalunga oku tu hole noku na oonkondo dhokuhulitha po okumona iihuna nokwaahe na uuyuuki, ngaashi oshitopolwa tashi landula tashi ke shi yelitha.a