Enyanyu uukwatya mboka hawu zi kuKalunga

UUSHILI owo kutya aantu oya hala okukala ya nyanyukwa monkalamwenyo. Ihe momasiku ngaka gahugunina, kehe gumwe oha taalelwa komashongo “omadhigu.” (2 Tim. 3:1) Omashongo ngaashi okwaanuuyuuki, okwaanuukolele, okwaaniilonga, oluhodhi nenge iinima yilwe mbyoka hayi tu ningitha tu kale tu na iimpwiyu notu nike oluhodhi, otayi vulu okuyuga yamwe enyanyu lyawo. Nokuli naapiya yaKalunga, otaya vulu okuteka omukumo, enyanyu lyawo e tali kana po. Ngele shika oshe ku ningilwa, ongiini nduno to vulu okumona enyanyu lyoye ishewe?

Opo tu yamukule epulo ndyono, tango otwa pumbwa okuuva ko kutya enyanyu lyashili oshike nankene yalwe ya tsikile okukala ye li na, nonando oya taalelwa komashongo. Opo ihe otatu ki ilonga shoka tatu vulu okuninga, opo tu kaleke po enyanyu lyetu notu gwedhe ko kulyo.

ENYANYU OSHIKE?

Inatu tompakanitha pokati kokukala wu na enyanyu nokukala wa ndjanga nenge wa shambukwa. Natu shi thaneke ngeyi: Ngele omuntu i ipe mo, oha kala ta yolagana. Ihe ngele a kolulukwa, okuyola naampa ngaa kwa ningine, notashi vulika nokuli a galukile konkalo ye yokukala a nika oluhodhi noyokukala a taalelwa komaupyakadhi. Shoka otashi ulike kutya enyanyu ndyoka a li e na kalya li lyashili. — Omayel. 14:13.

Mepingathano naashono, enyanyu uukwatya mboka hawu vulu okukala momutima. Enyanyu olya popiwa li li “eiyuvo lya nyanyudhwa kokumona sha oshiwanawa nenge kokutegelela sha oshiwanawa.” Enyanyu oshinima shoka hashi tsikile okukala po, nonando otu kale monkalo ya fa peni. (1 Tes. 1:6) Onkee ano, omuntu ota vulu okupiyaganekwa kusha, ihe natango oku na owala enyanyu momutima gwe. Pashiholelwa, aayapostoli oya li ya dhengwa, omolwokupopya kombinga yaKristus. Nonando ongawo, oya li ya “zi mo moshigongi shaatokoli ya nyanyukwa noonkondo, sho Kalunga e ya tala ya gwana okuhepekelwa edhina lyaJesus.” (Iil. 5:41) Ihe shoka itashi ti kutya oya li ya nyanyukwa sho ya dhengwa. Ye li a aapiya yaKalunga, oya li ya mono enyanyu mokukala aadhiginini kuye.

Inatu valwa nenyanyu noihali ya po owala ombadhilila. Omolwashike mbela? Omolwaashono enyanyu lyashili oli li oshiyimati shombepo ondjapuki yaKalunga. Kekwatho lyombepo yaKalunga, otatu vulu okuzala thiluthilu “omuntu omupe,” ngoka a kwatela mo enyanyu. (Ef. 4:24; Gal. 5:22) Uuna tu na enyanyu, otashi ke tu kwathela tu ungaunge nomaupyakadhi gonkalamwenyo.

IIHOLELWA MBYOKA TWA HALA OKULANDULA

Jehova okwa li a hala okumona iinima iiwanawa kombanda yevi, ihe hainima iiwinayi mbyoka tu wete kunena. Nonando ongawo, iilonga iiwinayi mbyoka tayi longwa kuyalwe, inayi kutha po enyanyu lyaJehova. Oohapu dhaKalunga otadhi ti: “Oonkondo nenyanyu olyu udha otempeli ye.” (1 Ondjal. 16:27) Shimwe ishewe, iinima iiwanawa mbyoka ya kala tayi longwa kaapiya ye, oya ‘nyanyudha omwenyo gwe.’ — Omayel. 27:11.

Otatu vulu okuholela Jehova, mokukala itaatu ipula unene, uuna iinima itaayi tu endele nawa ngaashi twa li twa tegelela. Pehala lyokukanitha enyanyu lyetu, otatu vulu okugandja eitulomo kiinima iiwanawa mbyoka tu na ngashingeyi nokutegelela neidhidhimiko iinima iiwanawa mbyoka tatu ka mona monakuyiwa.a

Otatu vulu wo okutala kiiholelwa oyindji yomOmbiimbeli kombinga yaantu mboka ya li ya kaleke po enyanyu lyawo, nonando oya li ya taalela oonkalo oondhigu. Abraham okwa li i idhidhimikile oonkalo oondhigu nodhomatilitho, ndhoka dha li dhe etithwa kuyalwe. (Gen. 12:10-20; 14:8-16; 16:4, 5; 20:1-18; 21:8, 9) Nonando Abraham okwa li a taalelwa komathiminiko ngoka, okwa kala e na enyanyu momutima gwe. Oshike sha li she mu kwathele a kale e li na? Okwa li e na etegameno lye momadhiladhilo lyokukala muuyuni uupe, kohi yepangelo lyopaMesiasa. (Gen. 22:15-18; Heb. 11:10) Jesus okwa ti: “Ho Abraham okwa nyanyukwa pombanda okumona esiku lyandje.” (Joh. 8:56) Otatu vulu okuholela Abraham, mokukala tatu tedhatedha kenyanyu ndyoka twa tegamena. — Rom. 8:21.

Ngaashi Abraham, omuyapostoli Paulus nakuume ke Silas oya li ya gandja eitulomo komauvaneko gaKalunga. Oya li ye na eitaalo lya kola noya tsikile okukala ya nyanyukwa, nonando oya li moonkalo oondhigu. Pashiholelwa, konima sho ya li ya dhengwa e taya tulwa mondholongo, “pokati kuusiku Paulus naSilas oya galikana nokwiimbila Kalunga omahambelelondjimbo.” (Iil. 16:23-25) Etegameno ndyoka Paulus naSilas ya li ye na, olya li lye ya koleke noku ya kwathela ya kale ya nyanyukwa. Niishewe, oya li ya nyanyukwa, molwaashono oya li taya hepekwa medhina lyaKristus. Otatu vulu okuholela Paulus naSilas, mokukaleka momadhiladhilo omauwanawa ngoka haga zi mokulongela Kalunga nuudhiginini. — Fil. 1:12-14.

Nokunena otu na iiholelwa oyindji iiwanawa yaamwatate naamwameme, mboka ya kaleka po enyanyu lyawo, nonando oya taalelwa komaupyakadhi. Pashiholelwa, muNovomba 2013, oshikungulu oshidhigu shedhina Haiyan osha li sha dhenge Filipine, nosha li sha yonagula po omagumbo gOonzapo ge vulithe 1 000. Egumbo lyOmumwatate George ndyoka lya li moshilando Tacloban, nalyo olya li lya kwatelwa mo. Okwa ti: “Kakele kaashoka sha ningwa po, aamwatate oya nyanyukwa. Kashi shi oshipu kungame okuholola enyanyu ndyoka tu uvite.” Onkee ano, uuna tu li momaupyakadhi ga kwata miiti, otatu ka tsikila okukala twa nyanyukwa, ngele otwa tedhatedha kwaashoka Jehova e tu ningila. Oshike ishewe shoka Jehova e tu pa, tashi vulu oku tu pa omatompelo gokukala twa nyanyukwa?

OMATOMPELO GETU GOKUKALA TWA NYANYUKWA

Etompelo lini enene lyokukala twa nyanyukwa tatu vulu okukala tu na, kaali shi ekwatathano lyetu naKalunga? Dhiladhila kwaashika: Otu shi Omupangeli gweshito alihe. Oye Tate yetu, Kalunga ketu naKuume ketu! — Eps. 71:17, 18.

Otwa lenga wo omagano gomwenyo naasho hatu ga nyanyukilwa. (Omuuv. 3:12, 13) Tu li iishitwa iinandunge yi na ekwatathano naJehova, otu uvite ko ehalo lye li na ko nasha natse. (Kol. 1:9, 10) Onkee ano, otu na eityo lyashili notu shi onkalamwenyo yetu mpoka yu uka. Aantu oyendji muuyuni kaye shi elalakano lyonkalamwenyo. Paulus okwa tsu omuthindo eyooloko ndyoka, a ti: ‘“Shoka omuntu nando ogumwe ine shi mona noine shi uva, shoka kaku na nando ogumwe e shi dhiladhila, osho tuu shoka Kalunga e shi longekidhile mboka ye mu hole.” Ihe mokulongitha ombepo ye Kalunga okwe tu tseyithile oshiholekwa shoka.’ (1 Kor. 2:9, 10) Mbela inatu nyanyukwa sho tu uvite ko ehalo lyaJehova nelalakano lye?

Natu tale ishewe shoka Jehova a ningila oshigwana she. Mbela inatu nyanyukwa sho oondjo dhetu tadhi vulu okudhimwa po? (1 Joh. 2:12) Omolwohenda yaKalunga, otu na etegameno lyashili kutya masiku uuyuni uupe otawu ya. (Rom. 12:12) Nokuli ngashingeyi, Jehova oku na ongundu onene yaantu ya hangana taye mu longele. (Eps. 133:1) Ombiimbeli oye tu shilipaleka kutya Jehova oha gamene oshigwana she komutondi Satana noompwidhuli dhe. (Eps. 91:11) Ngele otwa tedhatedha komayambeko agehe ngoka ga za kuKalunga, otatu ka mona nkene enyanyu lyetu tali kolo nokukoka. — Fil. 4:4.

NKENE TO VULU OKUGWEDHA KO KENYANYU LYOYE

Mbela Omukriste ngoka a nyanyukwa ota vulu okugwedha ko kenyanyu lye? Jesus okwa ti: “Shika onde shi mu lombwele, opo enyanyu lyandje li kale mune, nenyanyu lyeni li kale lya gwanenena.” (Joh. 15:11) Mbela shoka itashi ulike kutya otatu vulu okugwedha ko kenyanyu lyetu? Oto vulu okuyelekanitha oonkambadhala dhoye dhokugwedha ko kenyanyu lyoye nokuhohela omulilo. Opo omulilo gu kale gwa hwama, owu na oku gu hohela. Sha faathana, owu na okuninga oonkambadhala wu ipaluthe pambepo, opo wu gwedhe ko kenyanyu lyoye. Dhimbulukwa kutya enyanyu ohali kokekwa kekwatho lyombepo yaKalunga. Onkee ano, oto ka gwedha ko kenyanyu lyoye, ngele owa kala to pula Jehova e ku kwathele ombepo ye nokutedhatedha kOohapu dhe dha nwethwa mo. — Eps. 1:1, 2; Luk. 11:13.

Oto vulu natango okugwedha ko kenyanyu lyoye, mokukala wi ipyakidhila niilonga mbyoka tayi nyanyudha Jehova. (Eps. 35:27; 112:1) Omolwashike mbela? Omolwaashono otwa li twa shitwa tu kale hatu ‘tila Kalunga notu dhiginine iipango ye, oshoka aantu ayehe osho ye na okuninga.’ (Omuuv. 12:13) Niitya yimwe, otwa li twa shitwa nelalakano lyokulonga ehalo lyaKalunga. Onkee ano, uuna tatu longele Jehova, otatu ka kala tu na enyanyu kaaku na we monkalamwenyo yetu.b

OMAUWANAWA NGOKA HAGA ZI MOKUKALA NENYANYU

Sho tatu kokeke enyanyu lyopakalunga, otatu ka mona omauwanawa galwe. Pashiholelwa, otatu ka kala twa hokiwa noonkondo kuTate yetu gwomegulu, sho tatu mu longele nenyanyu kutya nduno otu iyadhe momaupyakadhi ga fa peni. (Deut. 16:15; 1 Tes. 5:16-18) Shimwe ishewe, ngele otwa kala tu na enyanyu lyashili, otatu ka yanda okukala tu hole omaliko nokuninga oonkambadhala tu pitithe komeho Uukwaniilwa waKalunga. (Mat. 13:44) Uuna tu wete omauwanawa ngoka taga zi moku wu pititha komeho, otashi ka gwedha ko kenyanyu lyetu, otatu ka kala tu iyuvitile nawa notatu ka gwedha ko wo kenyanyu lyayalwe. — Iil. 20:35; Fil. 1:3-5.

Omukonakoni gumwe gwokouniveesiti yaNebraska moAmerika, konima sho a konakona kombinga yuukolele, okwa ti: “Ngele owa nyanyukwa nowu na ombili monkalamwenyo yoye ngashingeyi, otashi vulika wu ka kale wu na uukolele monakuyiwa.” Shoka oshi li metsokumwe nOmbiimbeli ndjoka tayi ti: “Omutima gwa nyanyukwa otagu eta uundjangandjele.” (Omayel. 17:22) Eeno, sho to gwedha ko kenyanyu lyoye, otashi vulika wu kale wu na uukolele wopalutu.

Nonando otu li momathimbo omadhigu, otatu vulu okukala nenyanyu lyashili notali kalelele kekwatho lyombepo ondjapuki. Shoka tu na okuninga okugalikana, okukonakona nokutedhatedha kOohapu dhaJehova. Otatu vulu wo okugwedha ko kenyanyu lyetu, uuna tatu dhiladhila komayambeko ngoka twa mona, tatu holele eitaalo lyayalwe nuuna tatu kambadhala okulonga ehalo lyaKalunga. Ngele otwa ningi ashihe shoka, otatu vulu okumona shoka sha popiwa mEpisalomi 64:10, ndyoka tali ti: “Aayuuki naa nyanyukilwe Omuwa yo naa konge eholameno muye.”