Longa pamwe naJehova esiku kehe

1. Omomikalo dhini tatu vulu okulonga pamwe naJehova?

KONIMA sho Omushiti a shiti aantu, okwa li a hala ya longe pamwe naye, opo ya gwanithe po elalakano lye. Nonando kunena aantu inaya gwanenena, mboka aadhiginini kuye otaya vulu okulonga pamwe naJehova esiku kehe. Pashiholelwa, otwa ninga “aalongi pamwe naKalunga,” sho hatu uvitha onkundana ombwanawa yUukwaniilwa nokuninga aantu aalongwa. (1 Kor. 3:5-9) Oshi li lela uuthembahenda uunene, sho Omushiti e tu hogolola tu longe pamwe naye iilonga mbyoka ya simana. Nonando ongawo, okuuvitha nokuninga aantu aalongwa hakwo owala omukalo moka tatu vulu okulonga pamwe naJehova. Moshitopolwa shika, otatu ka kundathana omikalo dhilwe nkene tatu vulu oku shi ninga. Omikalo ndhoka ongaashi uuna tatu kwathele aanegumbo lyetu nosho wo ooitaali ooyakwetu, tatu yakula yalwe, tatu iyamba miilonga yUukwaniilwa nomokutamununa mo iilonga yetu iiyapuki. — Kol. 3:23.

2. Omolwashike kaashi li pandunge okuyelekanitha shoka tatu ningi tu humithe komeho elalakano lyaJehova naashoka yalwe taya ningi?

² Sho tatu kundathana oshitopolwa shika, ino yelekanitha shoka to ningile Jehova naashoka yalwe taya ningi. Dhimbulukwa kutya katu na omimvo dhi thike pamwe, katu na uukolele wa faathana, katu li moonkalo dha faathana nokatu na uunongo wu thike pamwe. Omuyapostoli Paulus okwa ti: “Kehe gumwe na konakone ye mwene, iilonga ye nkene ya tya. Iilonga ye ngele iiwanawa, nena ota vulu okwiitangela shoka e shi longo, ihe ita vulu okuyelekanitha iilonga ye niilonga yamukwawo.” — Gal. 6:4.    

KWATHELA AANEGUMBO LYOYE NOSHO WO OOITAALI OOYAKWENI

3. Ongiini taku vulu okutiwa kutya kehe ngoka ta sile oshimpwiyu aanegumbo lye, ota longele kumwe naKalunga?

³ Jehova okwa tegelela aapiya ye ya sile oshimpwiyu aanegumbo yawo. Pashiholelwa, otashi vulika wa pumbwa okulonga, opo wu kwathele aanegumbo lyoye pashimaliwa. Aakulukadhi oyendji ohaya kala momagumbo, opo ya tonatele oyana mboka aashona. Omanga aagundjuka yamwe mboka ya koka, tashi vulika ya sile oshimpwiyu aavali yawo mboka kaaye na uukolele. Eeno, shoka oshiwanawa lela. Oohapu dhaKalunga otadhi ti: “Ngele ope na omuntu ngoka itaa sile aanezimo lye oshimpwiyu, unene aanegumbo lye, oye okwi idhimbike eitaalo nomwiinayi e vulike komupagani.” (1 Tim. 5:8) Ngele owu na iinakugwanithwa mbyoka, otashi vulika kuu longithe naanaa ethimbo olindji miinima yopambepo ngaashi wa hala. Ihe ino teka omukumo. Jehova oha kala a nyanyukwa, uuna to sile oshimpwiyu aanegumbo lyoye. — 1 Kor. 10:31.

4. Ongiini aavali taya vulu okupititha komeho iinima yopambepo komeho yiinima yopaumwene, naashoka ohashi eta iizemo yini?

⁴ Aavali Aakriste ohaya longo pamwe naJehova, mokupititha omalalakano gopambepo komeho goyana. Aavali oyendji mboka ye shi ninga, konima oya ka mona oyanamati noyanakadhona ya ninga etokolo lyokuya miilonga yethimbo lyu udha kokule nomagumbo. Aanona yamwe oya ninga aatumwa, yalwe oya ka kokola ondjila hoka ku na ompumbwe yaauvithi, omanga yalwe taya longo moBetel. Molwaashoka oya ka longela kokule, aavali ihaya kala we pamwe nayo olundji ngaashi ya hala. Nonando ongawo, aavali mboka ye na ombepo yokwiiyamba, ohaya ladhipike oyana ya dhiginine iilonga yawo. Omolwashike mbela? Omolwaashono ohashi ya etele enyanyu enene nombili, uuna oyana ya pititha komeho Uukwaniilwa monkalamwenyo yawo. (3 Joh. 4) Aavali mbaka oyendji, otashi vulika nokuli yu uvite ngaashi Hanna, ngoka a tile kutya okwa “yapulile” Jehova omwanamati, Samuel. Aavali mbaka oya tala ko okulongela kumwe naJehova kwa tya ngawo, ku li uuthembahenda uunene. Onkee ano, itaya ka hala okuninga sha shilwe kaashi shi okulonga pamwe naJehova. — 1 Sam. 1:28.

5. Ongiini to vulu okukwathela aamwatate naamwameme megongalo lyeni? (Tala kethano lyopetameko.)

⁵ Ngele ku na iinakugwanithwa oyindji yomegumbo, mbela ito vulu okukwathela ooitaali ooyakweni mboka taye ehama, ya kulupa nenge ye li mompumbwe? Ongiini ngele owa tala kutya oyeni megongalo lyeni ya pumbwa ekwatho? Pashiholelwa, oto vulu okulongitha ethimbo lyoye lyontumba wu kale nomuvali omukokele gwomumwameme ngoka he mu sile oshimpwiyu, opo omumwameme ngoka a vule oku ka ninga sha shilwe. Nenge, oto vulu okukwathela mboka tashi vulika ya pumbwa okufaalelwa kokugongala, koositola, ya ka talele po gumwe ngoka e li moshipangelo nenge oku ya ningila sha shilwe. Ngele owa ningi ngawo, oto longo pamwe naJehova a yamukule omagalikano gawo. — Lesha 1 Aakorinto 10:24.

KALA HO YAKULA YALWE

6. Oshike sha kwatelwa mo mokuyakula yalwe?

⁶ Aalongi pamwe naKalunga oya tseyikila okuyakula yalwe. MOmanyolo gopaKriste gOshigreka, uutumbulilo ‘okuyakula’ otawu ti “okutaamba aayenda.” (Heb. 13:2) MOmbiimbeli omu na iiholelwa mbyoka tayi tu longo tu ninge ngawo. (Gen. 18:1-5) Mpoka oompito tadhi shi pitike, otu na okukwathela yalwe kutya nduno oyo “mboka tu li nayo meitaalo limwe” nenge hasho. — Gal. 6:10.

7. Omolwashike shi li nawa okuyakula mboka ye li miilonga yethimbo lyu udha, uuna taya talele po?

⁷ Mbela oto vulu okulonga pamwe naKalunga mokuyakula aalongi yethimbo lyu udha mboka taya talele po? (Lesha 3 Johannes 5, 8.) Olundji oompito dha tya ngawo, ohadhi egululile aantu ompito ya vule “okutsaathana omukumo.” (Rom. 1:11, 12) Natu taleni koshiholelwa shomumwatate Olaf. Ota dhimbulukwa kutya pethimbo omugundjuka, opu na oshikando shimwe megongalo lyawo kaamwa li nando ogumwe a li ta vulu okulangeka omutonatelishikandjo ngoka inaa hokana. Onkee ano, Olaf okwa pula aavali ye mboka kaaye shi Oonzapo, ngele omutonatelishikandjo ota vulu okukala maandjawo. Oya zimine, ihe oya lombwele Olaf kutya ye ota ka lala ketyofa. Shoka kasha li uupyakadhi kuye nando. Olaf ota hokolola ta ti: “Oshiwike shoka oshe endele po nawa lela! Ngame nomutonatelishikandjo otwa li hatu penduka ongula onene, tatu kundathana iinima oyindji tayi tungu, sho tatu li olusitati. Etsomukumo ndyoka a pe ndje, olya kokeke ehalo mungame lyokuya miilonga yethimbo lyu udha.” Uule womimvo 40 nasha dha ka pita, omumwatate Olaf okwa kala omutumwa miilongo yi ili noyi ili.

8. Omatompelo geni tu na gokuulukila yalwe olukeno, nonando otashi vulika oshikando shotango aantu inaye tu pandula? Gandja oshiholelwa.

⁸ Oto vulu okuyakula mboka kuu shi, momikalo odhindji, nokuli nonando petameko otashi vulika ya kale inaaye shi ndhindhilika. Tala koshiholelwa shika. Omuuvithi gumwe moSpania okwa li ta konakona Ombiimbeli nomukonakoni gwe, Yesica, ngoka a kala ta hukula ehodhi sho taya konakona. Omuuvithi okwe mu pula kutya ota lilile shike? Yesica okwe mu lombwele kutya manga inaa tembuka, okwa li a hepa noonkondo. Esiku limwe nokuli ka li e na sha shokulya. Okamwanakadhona okwa li owala e ka pe omeya esiku ndyoka. Okwa kambadhala oku ka kotheka, omanga ta pula ekwatho megalikano. Nziya konima yaashono, Oonzapo mbali odhe ya oku mu talela po. Ihe Yesica okwe dhi ihumbatele nayi nokwa tuula po oshifo shoka dhe mu pe. Okwe dhi pula a ti: “Oshifo shino osho mwa hala ndi pe okanona ka lye?” Aamwameme oye mu hekeleke, ihe oonkambadhala dhawo odha hulile mokwena kwa thita. Konima yethimbo oya galuka, e taya thigi iikulya posheelo shegumbo lye. Olukeno lwawo olwa li lwi inyengitha omutima gwaYesica. Oku uvu nayi sho oshikando shotango kaa li e shi wete kutya Kalunga okwa yamukula egalikano lye. Okuza mpono, okwa tokola toko oku mu longela. Okugandja nehalo ewanawa kwaamwameme, okwe eta iizemo iiwanawa. — Omuuv. 11:1, 6.

IYAMBA WU LONGE MIILONGA YEHANGANO

9, 10. (a) Pethimbo lyOmbiimbeli, Aaisraeli oya li ye na oompito dhimwe dhini dhokwiiyamba? (b) Aalumentu mboka ye na ehalo lyokwiiyamba ohaya pewa iinakugwanithwa yini megongalo kunena?

⁹ Monakuziwa, Israeli shonale osha li shi na oompito odhindji dhokwiiyamba. (Eks. 36:2; 1 Ondjal. 29:5; Neh. 11:2) Kunena, natse otu na oompito odhindji tu yambe po ethimbo lyetu, iiniwe yetu notu longithe ontseyo yetu tu kwathele aamwatate naamwameme. Ngele otwa ningi ngawo, otashi ke tu etela enyanyu enene notatu ka mona omayambeko ogendji.

¹⁰ Oohapu dhaKalunga otadhi ladhipike aalumentu megongalo ya longe pamwe naJehova mokulangekwa po ye li aayakuligongalo naakuluntugongalo. (1 Tim. 3:1, 8, 9; 1 Pet. 5:2, 3) Mboka taye shi ningi, oya hala okukwathela yalwe palutu nopambepo. (Iil. 6:1-4) Mbela aakuluntugongalo oye ku pulile nale wu ninge omuyakuli nenge wu kwathele piileshomwa, wu ungaunge nuukalata woshitopolwa nenge wu kwathele mokukaleka Oshinyanga monkalo ombwanawa nosho tuu? Mboka ye na iinakugwanithwa mbyoka, oye shi kutya okukwathela yalwe oshinima oshiwanawa lela.

11. Omumwameme gumwe okwa kwathelwa ngiini kookuume ke mboka a mono miilonga yokutunga?

¹¹ Oyendji mboka hayi iyamba miilonga yUukwaniilwa, olundji ohaya mono ookuume aape. Natu taleni koshiholelwa shomumwameme Margie, ngoka a longa miilonga yokutunga Iinyanga, uule womimvo 18. Okwa kala ta dheula aamwameme aagundjuka miilonga mbyoka, uule womimvo odhindji. Oshinima shoka, oshe mu pe oompito oombwanawa ya tsaathane omukumo nayalwe pambepo. (Rom. 1:12) Pethimbo Margie a li muupyakadhi, okwa tsuwa omukumo kookuume ke oyendji, mboka a mona sho e li miilonga yokutunga. Mbela owi iyambele nale wu longe miilonga mbyoka? Mbela oto vulu okwiiyamba wu ke yi longe, kutya nduno owu na ontseyo nenge hasho?

12. Ongiini to vulu okukwathela mboka ya dhengwa kiiponga yopaunshitwe?

¹² Oshigwana shaKalunga oshi na ompito yokulonga pamwe naye mokukwathela aamwahe, uuna pwa holoka iiponga yopaunshitwe. Pashiholelwa, aamwatate ohaya ambidhidha pashimaliwa mboka ya gumwa kiiponga mbyoka. (Joh. 13:34, 35; Iil. 11:27-30) Omukalo gumwe gwokukwathela, okwoopaleka nokutungulula omatungo. Omumwameme Gabriela, gwokoPolanda, egumbo lye olya li lya hanagulwa po kefundja. Okwa li a nyanyukwa, sho aamwatate okuza momagongalo gopuushiinda ye ya oku mu kwathela. Okwa ti: “Inandi hala okupopya kombinga yaashoka nda kanitha, oshoka mbyoka iinima owala yopamaliko. Ihe onda hala oku mu lombwela kutya onda likola shi thike peni. Oshimoniwa shika osha shilipaleke ndje kutya okukala wu li oshitopolwa shEgongalo lyopaKriste, oshinima shi ikalekelwa notashi etele omuntu enyanyu nombili.” Oyendji mboka ya kwathelwa miiponga yopaunshitwe, oya ti kutya ohaya kala yu uvite nawa konima yaashoka. Mboka haya longo pamwe naJehova mokugandja ekwatho ndyoka, ohaya kala wo ya nyanyukwa. — Lesha Iilonga 20:35; 2 Aakorinto 9:6, 7.

13. Iilonga yokwiiyamba otayi vulu ngiini okukoleka ekwatathano lyetu naJehova? Gandja oshiholelwa.

¹³ Omumwameme Stephanie naauvithi yalwe, oya mona enyanyu lyokulonga pamwe naKalunga mokuyakula ooitaali ooyakwawo mboka ya taukila moAmerika. Oya kwathele aantu mboka ya thiga po omahala gawo omolwiita, ya mone omagumbo nosho wo iinima yomomagumbo. Omumwameme Stephanie ota ti: “Sho twa mono nkene ya nyanyukwa noya pandula omolwohole ndjoka yuumwayinathana muuyuni awuhe, osha li she tu gumu komitima.” Okwa gwedha ko a ti: “Aantu mboka oya li taya dhiladhila kutya otwe ya kwathela, ihe uushili owo kutya oyo ye tu kwathela noonkondo. Ohole, uukumwe, eitaalo neinekelo muJehova ndyoka twa mono muyo, oya koleka ohole yetu yokuhola Jehova noshe tu kwathela tu kale tu na olupandu lwaashihe shoka hatu mono okupitila mehangano lye.”

TAMUNUNA MO UUKALELE WOYE

14, 15. (a) Ombepo yini omuhunganeki Jesaja a li a ulike? (b) Aauvithi yUukwaniilwa kunena ohaya holele ngiini iikala yaJesaja?

¹⁴ Mbela ino hala okulonga naJehova shi vulithe nale? Mbela owu na ehalo lyokutembukila hoka ku na ompumbwe onene yaaiyambi mehangano lye, opo wu ke mu longele? Haaluhe sha pumbiwa aapiya yaKalunga ya ye komahala gokokule, opo ya kwathele yalwe nehalo ewanawa. Ihe aamwatate naamwameme yamwe oonkalo dhawo otadhi ya pitike yi iyambe oku ka kwathela komahala galwe. Oye na iikala ya fa yomuhunganeki Jesaja. Sho Jehova a pula a ti: “Olye ngo tandi mu tumu? Olye ta ningi omutumwa gwetu?” Jesaja okwa yamukula a ti: “Otandi yi! Tuma ndje!” (Jes. 6:8) Mbela owu na ehalo lyokukwathela mehangano lyaJehova? Mbela oonkalo dhoye otadhi ku pitike wu shi ninge? Omomikalo dhini to vulu okukwathela?

¹⁵ Jesus okwa popi kombinga yiilonga yokuuvitha noyokuninga aantu aalongwa, a ti: “Iilya oyi li po oyindji, ihe aalongi oyo aashona. Galikaneni ano mwene gwiilya, a tume aalongi keteyo lye.” (Mat. 9:37, 38) Mbela ito vulu oku ka kokola ondjila moshitopolwa moka mu na ompumbwe onene? Nenge ito vulu okukwathela gulwe e shi ninge? Aamwatate naamwameme oyendji oye shi popya kutya omukalo omwaanawa okuulika kutya otu hole Kalunga nosho wo aantu ooyakwetu, ogwo okukokola ondjila momahala nenge miitopolwa moka mu na ompumbwe onene yaateyi. Mbela ito vulu okudhiladhila komikalo dhilwe dhokutamununa mo iilonga yoye yUukwaniilwa nenge wu ninge oshindji? Oku shi ninga, ohaku eta enyanyu olindji.

16, 17. Oompito dhini dhe egulukila mboka ya hala okuninga oshindji mehangano lyaJehova?

¹⁶ Mbela owa hala okukwathela koBetel nenge miilonga yokutunga omatungo gehangano, kutya nduno oto longo pakathimbo nenge ho kwathele omasiku gamwepo? Opu na ompumbwe yaantu mboka taya vulu okulonga mpoka ya pumbiwa nosho wo oshilonga kehe shoka taya pewa. Otashi vulika ya pulwe ya ka kwathele koshitopolwa hoka ku na ompumbwe yontumba, nonando oye na ontseyo nosho wo owino yiilonga yilwe. Jehova oha pandula lela ombepo yokwiiyamba ndjoka hayi ulikwa kaapiya ye mboka hayi iyamba ya ka kwathele kehe mpoka pu na ompumbwe. — Eps. 110:3.

¹⁷ Mbela ino hala okudheulwa natango, opo wu kale wa pyokoka nawa mokulonga iilonga iiyapuki? Ngele osho, oto vulu okuudhithila kOsikola yaauvithi yUukwaniilwa. Ohaku dheulwa aalumentu naakiintu mboka ye na uupambepo wu li nawa, mboka ye li miilonga yethimbo lyu udha, opo ya vule okutamununa mo uukalele wawo mpoka pu na ompumbwe. Mboka taya udhithile kosikola ndjoka oye na okukala ye na ehalo lyokuya moshilonga kehe, mesiku ndyoka taya pewa oonzapo. Mbela ino hala oku ka dheulwa kosikola ndjono, opo wu pewe omauthembahenda gokuyakula mehangano lyaJehova? — 1 Kor. 9:23.  

18. Oto ka likola shike, ngele oho longo pamwe naJehova esiku kehe?

¹⁸ Tu li aapiya yaJehova ohashi tu inyengitha tu gandje nehalo ewanawa. Shoka ohashi imonikila, uuna tatu longele yalwe uuwanawa, tatu ya ulukile olukeno, ohole noku ya kwathela esiku kehe. Uuna tatu shi ningi, ohashi tu etele enyanyu, ombili nosho wo elago. (Gal. 5:22, 23) Kutya nduno oonkalo dhoye odhi li ngiini, oto vulu okumona enyanyu mokuholela Jehova ngoka ha gandja nehalo ewanawa nosho wo mokulonga pamwe naye. — Omayel. 3:9, 10.