Kalunga oye lye?

Aantu oyendji ohaya ti kutya oyi itaala muKalunga. Ihe ya pula owala kutya Kalunga oye lye, oto ka uva omayamukulo gi ili nogi ili. Yamwe ohaya ti kutya oku na onyanya noku hole owala okugeela aantu uuna ya ninga omapuko. Yalwe ohaya ti kutya oku ya hole aluhe nohe ya dhimine po, kutya nduno oya ninge shike sha puka. Yo yalwe oyi itaala kutya oku li kokule nayo noke na ko nasha nayo. Omolwomataloko ngoka taga kondjithathana, oyendji oye wete kutya itashi wapa okutseya Kalunga.

Mbela osha simana ngaa okutseya Kalunga? Eeno, osha simana. Ngele otwa kala tu shi Kalunga nawa, onkalamwenyo yetu otayi ka kala yi na elalakano notayi ti sha. (Iilonga 17:26-28) Ngele otwa hedha popepi naKalunga, ota ka kala e tu hole note ke tu kwathela. (Jakob 4:8) Ngele owa tseya Kalunga nawa, oto ka vula okumona omwenyo gwaaluhe. — Johannes 17:3.

Ongiini to vulu okutseya Kalunga? Dhiladhila kukuume koye kopothingo ngoka wu shi nawa. Oshe ende ngiini opo mu pange uukuume? Otashi vulika wa li wu na okutseya edhina lye, omaukwatya ge, shoka e hole naashoka kee hole, shoka a ninga nale naashoka ta dhiladhila oku ka ninga nosho tuu. Iinima mbyoka wa tseya kombinga ye, oyo ye ku ningitha wu pange uukuume naye.

Sha faathana, otatu vulu okutseya Kalunga mokutala komapulo taga landula:

• EDHINA LYAKALUNGA OLYE?

• OKU NA OMAUKWATYA GA TYA NGIINI?

• OSHIKE A GWANITHA PO?

• OTA KA GWANITHA PO SHIKE MONAKUYIWA?

• OKUTSEYA KALUNGA OTAKU KU ETELE UUWANAWA WUNI?

Elalakano lyoshifo shika oku ku kwathela wu mone omayamukulo komapulo ngoka. Iitopolwa yasho otayi ke ku kwathela wu ilonge kutya Kalunga oye lye, nowu tseye uuwanawa mboka to ka mona ngele owa kala wu na nekwatathano ewanawa naye.