Kumuna po edhiladhilo kehe ndyoka li li ompinge naashoka Kalunga te tu longo!

1. Elondodho lini omuyapostoli Paulus a li a nyolele Aakriste aagwayekwa?

OMUYAPOSTOLI PAULUS okwa londodha a ti: “Inamu faathana.” Inatu faathana nashike? Okwa ti: “Inamu faathana nonkalo yuuyuni mbuka.” (Rom. 12:2) Oohapu ndhoka Paulus okwa li e dhi nyolele Aakriste yomethelemimvo lyotango. Omolwashike a li a gandja elondodho ndyoka itaali lile okathima koluko, kaalumentu naakiintu mboka ya li yi iyapulila Kalunga noya gwayekwa nombepo ondjapuki? — Rom. 1:7.

2-3. Satana oha kambadhala ngiini oku tu gamuna ko kuJehova, ihe ongiini tatu vulu okweetha po “omadhiladhilo agehe gomaifundjaleko”?

² Paulus okwa gandja elondodho ndyoka, molwaashoka Aakriste yamwe oya li ye etha ya nwethwe mo komalongo gopantu ngoka haga humithwa komeho kuuyuni waSatana. (Ef. 4:17-19) Shoka natse otashi vulu oku tu ningilwa. Satana oye omupangeli gwuuyuni mbuka, nota vulu okulongitha omikalo odhindji e tu nwethe mo, opo tu ethe po okulongela Jehova. Omukalo gumwe ngoka ha longitha, omoku tu ningitha tu kale tu iwete twa simana. Oha vulu okulongitha iinima ngaashi eputuko lyetu, omuthigululwakalo nenge elongo ndyoka twa mona, opo e tu ningithe tu dhiladhile momukalo moka a hala.

³ Mbela otatu vulu ngaa okweetha po “omadhiladhilo agehe gomaifundjaleko”? (2 Kor. 10:4) Natu tale nkene Paulus a yamukula. Okwa ti: “Otatu kumuna po einenepeko kehe ndyoka tali inenepekele okutseya Kalunga; otatu tula edhiladhilo kehe meti notatu li vulikitha kuKristus.” (2 Kor. 10:5) Odhoshili kutya kekwatho lyaJehova, otatu vulu okweetha po omaifundjaleko agehe. Ngaashi owala omiti hadhi vulu okupanga uuwehame, Oohapu dhaKalunga nadho otadhi vulu oku tu kwathela tu ethe po omadhiladhilo omawinayi ngoka hatu etelwa kuuyuni waSatana.

‘SHITULUKENI MENI LYENI NOMOMADHILADHILO GENI’

4. Omalunduluko geni oyendji yomutse twa ningi, sho twa taamba ko oshili?

⁴ Dhiladhila komalunduluko ngoka wa li wa ningi, sho wa taamba ko oshili yOohapu dhaKalunga e to tokola okulongela Jehova. Oyendji yomutse, otwa li tu na okweetha po eihumbato ewinayi. (1 Kor. 6:9-11) Inatu pandula tuu sho twa etha po eihumbato ewinayi lya tya ngawo kekwatho lyaJehova!

5. Iinima iyali yini ya popiwa mAaroma 12:2 twa pumbwa okuninga?

⁵ Nonando ongawo, inatu kala tu uvite kutya itatu vulu we okuninga omalunduluko gasha. Nonando otwa etha po okuninga omayono ga kwata miiti ngoka twa li hatu ningi manga inaatu ninginithwa, otwa pumbwa natango okulonga nuudhiginini tu yande kehe shimwe shoka tashi vulu oku tu ningitha tu shune kiinima mbyoka. Ongiini tatu vulu oku shi ninga? Paulus okwa ti: “Inamu faathana nonkalo yuuyuni mbuka, aawe, Kalunga ne mu shitulule meni lyeni nomomadhiladhilo geni.” (Rom. 12:2) Onkee ano, otwa pumbwa okuninga iinima iyali. Shotango, katu na ‘okufaathana’ nuuyuni mbuka. Oshitiyali, otwa pumbwa ‘okushitulula’ nenge okulundulula omadhiladhilo getu.

6. Oshike tatu ilongo moohapu dhaJesus ndhoka dhi li muMateus 12:43-45?

⁶ Okushituluka hoka Paulus a popi, okwa kwatela mo oshindji kaashi shi owala okulunduluka kombanda. Okwa kwatela mo uuntu wetu womeni. (Tala oshimpungu “Otwa shituluka nenge otwi ishitukitha?”) Otwa pumbwa okulundulula thiluthilu omadhiladhilo getu, ano iikala yetu yomeni, omaiyuvo getu nomahalo getu. Onkee ano, otwa pumbwa okwiipula ngeyi: ‘Mbela omalunduluko ngoka tandi ningi oga ninga ndje ngaa Omukriste meni nenge okombanda owala?’ Okumona eyooloko pokati kiinima mbyoka, okwa simana. Oohapu dhaJesus ndhoka dhi li muMateus 12:43-45, otadhi ulike kutya oshike twa pumbwa okuninga. (Lesha.) Oohapu ndhoka otadhi tu longo oshili ya simana ndjika kutya: Inashi gwana owala okweetha po omadhiladhilo ga puka, ihe otwa pumbwa oku ga pingena po naangoka ga hokiwa kuKalunga.

“OMITIMA DHENI NOMADHILADHILO GENI NAGA SHITULUKE LELA, GA NINGE OMAPE”

7. Ongiini tatu vulu okulundulula uuntu wetu womeni?

⁷ Mbela otatu vulu ngaa okulundulula omahalo getu nenge uuntu wetu womeni? Oohapu dhaKalunga otadhi ti: “Omitima dheni nomadhiladhilo geni naga shituluke lela, ga ninge omape. Zaleni omuntu omupe ngoka a shitwa a fa Kalunga nohi iholola ye mwene mokukalamwenyo ku uka nokwa yapuka.” (Ef. 4:23, 24) Eeno, otatu vulu okulundulula uuntu wetu womeni, ihe kashi shi oshipu. Otwa pumbwa okuninga oshindji shi vulithe owala okweetha po omahalo ga puka niilonga iiwinayi. Otwa pumbwa wo okulunduluka ‘momitima nomomadhiladhilo getu.’ Shoka osha kwatela mo okulundulula omahalo getu, iikala yetu nomainyengotompelo getu. Shika otashi pula oonkambadhala dha mana mo.

8-9. Oshimoniwa shomumwatate gumwe otashi ulike ngiini kutya osha simana okulundulula uuntu wetu womeni?

⁸ Natu ka taleni koshiholelwa shomumwatate gumwe ngoka a putuka e hole olugodhi. Konima sho a etha po okunwa sha pitilila nokukondja, okwa ninginithwa, shoka sha gandja uunzapo uuwanawa momudhingoloko moka a li ha zi. Ihe uusiku wumwe, konima sho owala opo a ninginithwa, okwi iyadha memakelo inee li tegelela. Omulumentu gumwe ngoka a li i idhenga mo, okwe ya kegumbo lye a hala oku mu dhenga. Petameko omumwatate okwa kala a mwena. Ihe sho omulumentu ngoka a sheke edhina lyaJehova, omumwatate ka li we ta vulu oku shi idhidhimikila. Okwa yi kuye pondje e tu mu dhenge. Uupyakadhi owa li peni? Nonando okukonakona Ombiimbeli okwa li kwe mu kwathele a ethe po egamo lye lyokukondja, ka li natango a lundulula uuntu we womeni.

⁹ Nonando ongawo, omumwatate ngoka ka li a teka omukumo okuninga omalunduluko. (Omayel. 24:16) Kekwatho lyaakuluntugongalo, okwa tsikile okuninga ehumokomeho. Konima yethimbo, okwa ningi omukuluntugongalo. Opo ihe ongulohi yimwe, okwi iyadha meshongo pOshinyanga shUukwaniilwa lya faathana naandyoka a li a taalele omimvo dha ka pita. Opwa li pwe ya omulumentu a kolwa nokwa li a hala okudhenga omukuluntugongalo gumwe. Omumwatate ngoka okwa ningi po shike? Okwa popi nomulumentu ngoka nombili noneifupipiko, e te mu kwathele a ngungumane noku ye kegumbo. Omolwashike oshikando shika omumwatate i inyenge momukalo nguka? Omolwaashoka okwa li a lundulula uuntu we womeni. Ngashingeyi okwa li a ningi omunambili nomwiifupipiki, shoka sha simanekitha Jehova.

10. Oshike sha kwatelwa mo mokuninga omalunduluko?

¹⁰ Omalunduluko ngaka ihaga vulu owala okuningwa muusiku wumwe, go ihage ya po kugo gene. Otashi vulika tu kale twa pumbwa okuninga ‘oonkambadhala dha mana mo,’ uule womimvo dhontumba. (2 Pet. 1:5) Okukala “moshili” ethimbo ele inashi gwana. Otwa pumbwa okuninga ngaashi tatu vulu, tu lundulule uuntu wetu womeni. Opu na iinima yontumba mbyoka tayi vulu oku tu kwathela tu ninge omalunduluko. Natu ka kundathaneni yimwe yomuyo.

NKENE TATU VULU OKULUNDULULA UUNTU WETU WOMENI

11. Egalikano ohali tu kwathele ngiini tu lundulule uuntu wetu womeni?

¹¹ Egalikano oshinima sha simana shoka tu na okuninga tango. Otwa pumbwa okugalikana, ngaashi omupisalomi ngoka a li a galikana a ti: “Kalunga, shitila ndje omutima omuyogoki, ngu u tule meni lyandje ombepo ompe noyevuliko.” (Eps. 51:10) Otu na okuzimina kutya otwa pumbwa okulundulula uuntu wetu womeni nokupula ekwatho kuJehova. Ongiini tatu vulu okukala nuushili kutya Jehova ote ke tu kwathela tu ninge omalunduluko? Otatu vulu okutsuwa omukumo kwaashoka Jehova a li a uvanekele Aaisraeli yopethimbo lyaHesekiel, mboka ya li ya kukutika omitima dhawo, sho a ti: “Otandi ke ya pa omwenyo omupe nombepo ompe . . . notandi ya pe omwenyo hagu vulika.” (Hes. 11:19) Jehova okwa li e na ehalo lyokukwathela Aaisraeli mboka ya ninge omalunduluko. Nokunena, oku na wo ehalo lyoku tu kwathela.

12-13. (a) Shi ikolelela kEpisalomi 119:59, otwa pumbwa okutedhatedha kombinga yashike? (b) Omapulo geni wu na okwiipula?

¹² Oshinima oshitiyali sha simana tu na okuninga, okutedhatedha. Uuna tatu lesha Oohapu dhaKalunga esiku kehe, otwa pumbwa okukutha ethimbo tu tedhatedhe nenge tu dhiladhile muule kombinga yomadhiladhilo nomaiyuvo ngoka twa pumbwa okulundulula. (Lesha Episalomi 119:59; Heb. 4:12; Jak. 1:25) Otu na okukambadhala tu mone kutya omadhiladhilo nomaiyuvo geni tu na, ngoka ga nwethwa mo komalongo gopantu gomuuyuni. Otwa pumbwa okuzimina kutya otu na omaunkundi notu na okulonga nuudhiginini tu ga kondjithe.

¹³ Pashiholelwa, ipula ngeyi: ‘Mbela ondi na efupa?’ (1 Pet. 2:1) ‘Mbela ondi na uuntsa, omolweputuko lyandje, elongo nenge iimaliwa mbyoka ndi na?’ (Omayel. 16:5) ‘Mbela onda dhina yalwe mboka kaaye na iinima mbyoka ndi na nenge yomomuhoko gulwe?’ (Jak. 2:2-4) ‘Mbela ondi hole iinima yomuuyuni waSatana?’ (1 Joh. 2:15-17) ‘Mbela ondi hole omainyanyudho ngoka ge na ko nasha nomilalo nenge nelongithonkondo?’ (Eps. 97:10; 101:3; Amos 5:15) Omayamukulo goye komapulo ngoka, otashi vulika ge ku kwathele wu mone mpoka wa pumbwa okuninga omalunduluko. Ngele otwa sindi “omadhiladhilo agehe gomaifundjaleko” ngoka tu na, otatu ka nyanyudha Tate yetu gwomegulu. — Eps. 19:14.

14. Omolwashike okuhogolola ookuume aawanawa kwa simana?

¹⁴ Oshinima oshititatu twa pumbwa okuninga, okuhogolola ookuume aawanawa. Kutya nduno otwe shi dhimbulula mo nenge hasho, uushili owo kutya ohatu nwethwa mo kwaamboka hatu endathana nayo. (Omayel. 13:20) Kiilonga nenge kosikola, otashi vulika hatu kala twa kundukidhwa kwaamboka itaaye tu kwathele tu dhiladhile momukalo ngoka Kalunga a hokwa. Nonando ongawo, otatu vulu okumona ookuume aawanawa kokugongala kwetu. Oko hatu ladhipikwa tu kale tu ‘holathane notu longelathane uuwanawa.’ — Heb. 10:24, 25.

“KALENI MEITAALO SHI VULITHE SHITO”

15-16. Satana oha kambadhala ngiini okulundulula okudhiladhila kwetu?

¹⁵ Dhimbulukwa kutya Satana okwa tokola toko okulundulula okudhiladhila kwetu. Oha longitha omalongo gi ili nogi ili, opo e tu nwethe mo tu ethe po oshili ndjoka twi ilonga mOohapu dhaKalunga.

¹⁶ Nokunena Satana ota tsikile nokupula epulo ndyoka a li a pula Eva moshikunino shaEden, tali ti: “Kalunga okwe mu lombwele shili, mwaa . . . ?” (Gen. 3:1) Muuyuni mbuka tawu pangelwa kuSatana, olundji ohatu pulwa omapulo ngoka tashi vulika ge tu ningithe tu kale tu na omalimbililo. Omapulo ngoka ongaashi: ‘Mbela Kalunga ina hokwa shili oondjokana dhomashenge? Mbela Kalunga okwa hala shili kuu dhane Okrismesa nomasiku gomavalo? Mbela Kalunga koye okwa tegelela shili wu tinde okutulwa ombinzi? Mbela Kalunga omunahole okwa tegelela shili wu yande okweendathana naamboka ya kondwa?’

17. Oshike tu na okuninga uuna tatu pulwa omapulo kombinga yaashoka twi itaala, ngoka tashi vulika ge tu ningithe tu kale twa limbililwa, naashoka otashi vulu okweeta iizemo yini ngaashi ya popiwa mAakolossa 2:6, 7?

¹⁷ Otu na okukala twa tompwa kwaashoka twi itaala. Ngele otwa kala kaatu na omayamukulo gomapulo ngoka tashi vulika tu pulwe kombinga yaashoka twi itaala, otashi vulu oku tu tula momalimbililo. Omalimbililo ngoka otaga vulu okugoyokitha omadhiladhilo getu nokuyona po eitaalo lyetu. Oshike nduno twa pumbwa okuninga? Oohapu dhaKalunga otadhi tu lombwele tu shituluke momadhiladhilo, opo tu vule okuulika kutya otwa tseya “ehalo lyaKalunga naashoka oshiwanawa, she mu opalela nosha gwana.” (Rom. 12:2) Ngele otwa kala hatu konakona pandjigilile, otatu vulu okuulika kutya otwa tompwa kwaashoka twi ilonga mOmbiimbeli. Otatu vulu okukala twa tompwa thiluthilu kutya omithikampango dhaJehova odhi li mondjila. Opo nduno, ngaashi naanaa omuti gu na omidhi dha kola, natse otatu ka kala twa dhama ‘nokukala meitaalo shi vulithe shito.’ — Lesha Aakolossa 2:6, 7.

18. Oshike tashi ke tu kwathela kaatu nwethwe mo kiinima iiwinayi yomuuyuni waSatana?

¹⁸ Kehe gumwe oku na oshinakugwanithwa shokukoleka eitaalo lye. Onkee ano, tsikila okulundulula uuntu woye womeni. Galikana aluhe Jehova noku mu pula e ku kwathele ombepo ye ondjapuki. Tedhatedha nokutsikila okutala mpoka wa pumbwa okuninga omalunduluko. Hogolola ookuume aawanawa nokukala pamwe naamboka taye ku kwathele wu ninge omalunduluko. Ngele owe shi ningi, oto ka vula okukumuna po “einenepeko kehe ndyoka tali inenepekele okutseya Kalunga.” — 2 Kor. 10:5.