Johannes omuninginithi — oshiholelwa oshiwanawa kombinga yokukaleka po enyanyu lyetu

MBELA owa halelela oshinakugwanithwa shontumba megongalo, shoka itoo vulu okupewa ngashingeyi? Otashi vulika oshinakugwanithwa shoka shi niwe kugulwe. Nenge shi li uuthembahenda mboka wa li wu na nale. Ihe ngashingeyi, omimvo dhuukokele, okwaanuukolele, uuhupilo tawu shongola nenge iinakugwanithwa yuukwanegumbo, oye ku ngambeka kuu ninge oshindji. Nenge tashi vulika wa li wu na okugandja po oshinakugwanithwa shoka wa kala wu na uule womimvo, omolwomalunduluko ngoka taga ningwa mehangano. Kutya nduno etompelo olini, otashi vulika wu kale wu uvite kutya ito longo oshindji ngaashi wa hala miilonga yaJehova. Moonkalo ndhoka, oshi shi okuuviwa ko, ngele omathimbo gamwe oho kala wa yemata. Nonando ongawo, oshike to vulu okuninga, opo kuu ethe etekomukumo, eyeme nenge onkone yi mene omidhi mungoye? Ongiini to vulu okukaleka po enyanyu lyoye?

Otatu vulu okwiilonga sha koshiholelwa shaJohannes Omuninginithi, kombinga yankene tu na okukaleka po enyanyu lyetu. Johannes okwa li e na omauthembahenda ga tongomana miilonga yaJehova, ihe otashi vulika ka li e shi shoka tashi ka ningwa monkalamwenyo ye. Otashi vulika wo ka li a tegelela a kale mondholongo uule wethimbo li vulithe pwaandyoka a kala ta uvitha. Nonando ongawo, Johannes okwa li a tsikile okukala nenyanyu nokwa kala e na etaloko ewanawa onkalamwenyo ye ayihe. Oshike sha li she mu kwathele? Ongiini tatu vulu okukala ishewe tu na enyanyu, nonando otwa taalela iinima mbyoka tayi tu yemateke?

OSHINAKUGWANITHWA TASHI NYANYUDHA

Mo 29 E.N., Johannes okwa tameke noshinakugwanithwa she e li omutetekeli gwaMesiasa, ta ti: “Itedhululeni, oshoka Oshilongo shegulu she ya popepi.” (Mat. 3:2; Luk. 1:12-17) Oyendji oya li ya pulakene kuye. Uushili owo kutya oongundu dhaantu dha za kokule, odha li dhe ya okupulakena ketumwalaka lye, noyendji oya li yi itedhulula e taya ninginithwa. Johannes okwa li wo a londodha nuulaadhi aawiliki yomalongelokalunga mboka ya li yi ishi uuyuuki, kombinga yepangulo ndyoka lya li tali ke ya adha, ngele itaya lundulula. (Mat. 3:5-12) Oshinima sha simanenena shoka a ninga lwopehulilo lyo 29 E.N., muukalele we, oosho a ningitha Jesus. Okuza mpono, Johannes okwa kala ta ladhipike yalwe ya landule Jesus, Mesiasa omuuvanekwa. — Joh. 1:32-37.

Okutala konkandangala yi ikalekelwa ndjoka Johannes a dhana, Jesus okwa li ta vulu okutya: “Kaku na nando ogumwe gwomaantu omunene e vule Johannes [Omuninginithi, NW].” (Mat. 11:11) Kapu na omalimbililo kutya Johannes okwa li a nyanyukilwa omayambeko ngoka a li a mono. Ngaashi Johannes, aantu oyendji kunena oya mona omayambeko ogendji. Natu tale koshiholelwa shomumwatate Terry. Ye nomukadhi, Sandra, oya kala omimvo 50 miilonga yethimbo lyu udha. Omumwatate Terry ota ti: “Onda kala nokumona omauthembahenda ogendji. Omauthembahenda ngoka ongaashi okukala omukokolindjila, Omubetel, omukokolindjila i ikalekelwa, omutonatelishikandjo, omutonateli gwoshitopolwa nongashingeyi ondi li ishewe omukokolindjila i ikalekelwa.” Oshinyanyudha okupewa iinakugwanithwa mehangano lyaJehova, ihe ngaashi tatu ki ilonga moshiholelwa shaJohannes, okukala omudhiginini, ohaku pula oonkambadhala, uuna oonkalo dhetu dha lunduluka.

TSIKILA OKUULIKA OLUPANDU

Oshinima shoka unene sha li sha kwathele Johannes Omuninginithi a kaleke po enyanyu lye, okwa li a tsikile okuulika olupandu, omolwomauthembahenda ngoka a li e na. Natu tale koshiholelwa. Konima sho Jesus a ninginithwa, aalanduli yaJohannes oya ende taya shonopala, omanga yaJesus ya li taya indjipala. Aalanduli yaJohannes oya li tayi ipula noshinima shoka, e taya ti kuye: “Tala ko, omulumentu ngoka . . . ota [ninginitha, NW], naantu ayehe otaa yi kuye.” (Joh. 3:26) Johannes okwe ya yamukula a ti: “Ngoka e na omufuko, oye ombushiki. Ihe kuume kombushiki ota thikama e ta pulakene nota nyanyukilwa ewi lyombushiki. Osho wo nenyanyu ndika lyandje olya gwanenena.” (Joh. 3:29) Johannes ka li i iyelekanitha naJesus, ye natango ka li a dhiladhila kutya uuthembahenda we kawu na we oshilonga, omolwonkandangala onene ndjoka ya li tayi dhanwa kuJesus. Pehala lyaashono, Johannes okwa li a tsikile okukala e na enyanyu, molwaashoka okwa li a lenga onkandangala ye e li “kuume kombushiki.”

Etaloko lyaJohannes olya li lye mu kwathele a tsikile okukala a nyanyukwa, nonando oshinakugwanithwa she kasha li oshipu. Pashiholelwa, Johannes okwa li Omunasiri okuza kevalo, onkene okwa li a dhilikwa kaa nwe omaviinu. (Luk. 1:15) Jesus okwa li a popi shi na ko nasha nonkalamwenyo yaJohannes inaayi kitakana, a ti: “Johannes okwe ya ti idhilike iikulya ye ita nu omaviinu.” Kombinga onkwawo, Jesus naalongwa ye kaya li ye li kohi yegano lyUunasiri ndyoka, noya li ya manguluka ngaashi aantu yalwe. (Mat. 11:18, 19) Shimwe ishewe, manga Johannes kaa li a ningi oshikumithalonga shontumba, okwa li e shi shi kutya aalongwa yaJesus, mwa kwatelwa yamwe mboka ya li aalanduli yaJohannes petameko, oya li ya pewa oonkondo dhokulonga iikumithalonga. (Mat. 10:1; Joh. 10:41) Pehala lyokugandja eitulomo kwaashoka, okwa dhiginine oshinakugwanithwa she nuulaadhi, shoka a li a pewa kuJehova.

Ngele natse otwa kala twa lenga oshinakugwanithwa shoka tu na ngashingeyi miilonga yaJehova, otatu ka kaleka po enyanyu lyetu. Omumwatate Terry ngoka a popiwa metetekelo, ota ti: “Onda kala handi gandja eitulomo koshinakugwanithwa kehe tandi pewa.” Okutala konima sho a kala miilonga yethimbo lyu udha, ota ti: “Itandi ipe uusama washa, ihe otandi dhimbulukwa owala iinima iiwanawa.”

Otatu vulu okukala tu na enyanyu shi vulithe nale miilonga yaJehova, mokutedhatedha kombinga yaashoka hashi ningitha oshinakugwanithwa shi kale tashi ti sha. Oshi li lela uuthembahenda okukala “aalongi pamwe naKalunga.” (1 Kor. 3:9) Ngaashi owala oshinima shongushu hashi tsikile okukala tashi monika nawa, uuna tashi silwa oshimpwiyu, natse otatu ka kaleka po enyanyu lyetu, ngele otwa tsikile okutedhatedha kwaashoka oshiwanawa notashi simanekitha Kalunga. Otatu ka yanda okuyelekanitha omayambo getu nomayambo gayalwe. Itatu ka dhiladhila kutya omauthembahenda ngoka Jehova e tu pa oge vulike komauthembahenda ngoka a pa yalwe. — Gal. 6:4.

GANDJA EITULOMO KIINIMA YOPAMBEPO

Otashi vulika Johannes a li e shi kutya uukalele we itawu ka tsikila ethimbo ele, ihe otashi vulika kaa li e shi kutya otawu ke ya pehulilo uunake. (Joh. 3:30) Mo 30 E.N., konima yoomwedhi hamano sho a ninginitha Jesus, Johannes okwa li a tulwa mondholongo komukwaniilwa Herodes. Nonando ongawo, Johannes okwa li a tsikile okuninga ngaashi ta vulu a gandje uunzapo. (Mark. 6:17-20) Oshike sha li she mu kwathele a kaleke po enyanyu lye, nonando okwa li monkalo ndjoka? Okwa li a tsikile okugandja eitulomo kiinima yopambepo.

Manga Johannes a li mondholongo, okwa li a lopotelwa kombinga yokutamunuka mo kwuukalele waJesus. (Mat. 11:2; Luk. 7:18) Johannes okwa li a tompwa kutya Jesus oye Mesiasa, ihe otashi vulika a li ti ipula kutya ongiini Jesus a li ta ka gwanitha po ashihe shoka sha popiwa mOmanyolo tashi ka gwanithwa po kuMesiasa. Molwaashoka Johannes okwa li e shi kutya Mesiasa okwa li ta ka pewa oonkondopangelo, otashi vulika a li ti ipula ta ti: Mbela Jesus masiku ota ka pangela? Mbela otashi vulika a ka mangulule ndje mo mondholongo? Molwaashoka Johannes okwa li a hala okuuva ko nawa onkandangala ndjoka Jesus ta dhana, okwa li a tumu aalongwa ye yaali kuJesus ye mu pule taya ti: “Ongoye tuu nguka nakuya, nenge otu na okutegelela gulwe?” (Luk. 7:19) Sho ya galuka, Johannes oku na okukala a li a pulakena neitulomo, sho taye mu hokololele iikumithalonga mbyoka Jesus a longo. Jesus okwa li wo e ya lombwele ye mu lombwele taya ti: “Aaposi otaa mono ko, iilema otayi ende, aanashilundu otaa yele, oombolo otaa uvu ko, aasi otaa yumudhwa noohepele otaa uvithilwa elaka etoye.” — Luk. 7:20-22.

Osha yela kutya Johannes okwa li a tsuwa omukumo kwaashoka a lombwelwa. Shoka a lombwelwa, osha li sha koleke kutya Jesus okwa li ta gwanitha po omanyolo ngoka ga hunganeka kombinga yaMesiasa. Nonando shoka Jesus a li a longa kasha li sha kwatela mo okumangulula mo Johannes mondholongo, Johannes okwa li e shi kutya uukalele we kawa li osima yowala. Nonando okwa li a piti moonkalo ndhoka, okwa li a tsikile okukala a nyanyukwa.

Ngele otwa gandja eitulomo kiinima yopambepo ngaashi Johannes, otatu ka vula okukaleka po enyanyu lyetu nokukala aaidhidhimiki, nonando otu pite moonkalo dha fa peni. (Kol. 1:9-11) Shika otatu vulu oku shi ninga, mokukala hatu lesha Ombiimbeli nokutedhatedha kwaashoka tatu lesha. Shoka ohashi tu dhimbulukitha kutya shoka tatu longo miilonga yaJehova, kashi shi osima yowala. (1 Kor. 15:58) Omumwameme Sandra ota ti: “Okulesha ontopolwa yontumba mOmbiimbeli esiku kehe, okwa kwathela ndje ndi hedhe popepi lela naJehova. Okwa kwathela ndje wo ndi gandje eitulomo kuye, pehala lyokugandja eitulomo kungame mwene.” Natse otatu vulu wo okugandja eitulomo koolopota dhi na ko nasha niilonga yUukwaniilwa. Shoka otashi vulu oku tu kwathela kaatu gandje owala eitulomo kutse yene, ihe tu gandje eitulomo kwaashoka Jehova ta gwanitha po. Omumwameme Sandra ota ti: “Opolohalama yokotiivii yetu JW, ndjoka hayi piti omwedhi kehe, ohayi tu kwathele tu kale tu uvite tu li popepi lela nehangano nohayi tu kwathele tu tsikile okukala nenyanyu moshinakugwanithwa shetu.”

Muule wethimbo efupi ndyoka Johannes Omuninginithi a li a uvitha, okwa li e shi ningi ‘nombepo nonoonkondo dhaElia,’ na Elia “okwa li omuntu e tu fa.” (Luk. 1:17; Jak. 5:17) Ngele otwa landula oshiholelwa she shokuulika olupandu noshokugandja eitulomo kiinima yopambepo, natse wo otatu ka vula okukaleka po enyanyu lyetu miilonga yUukwaniilwa kutya nduno natu iyadhe monkalo ya fa peni.