‘Oye na okutalwa manga ngele otaya vulu tuu okuya moshilonga’ — Ngiini?
1 Molwekoko tali tsikile mehangano lyaJehova, opu na ompumbwe onene yaamwatate ya pyokoka okulonga ye li aayakuligongalo. Aamwatate oyendji mboka kaaye shi natango aayakuligongalo, mwa kwatelwa aagundjuka, oye na ehalo okulonga megongalo. Uuna taya pewa iilonga ya gwedhwa po, ohaya kala ye uvite ye na oshilonga noye uvite kutya yo otaya vulu okupondola sha. Opo ya hume komeho, ‘oye na okutalika manga ngele otaya vulu tuu okuya moshilonga.’ (1 Tim. 3:10, yelekanitha OB-1986.) Shika mbela otashi ningwa ngiini?
2 Oshilonga shaakuluntugongalo: Shi li oshitopolwa shomukalo gwokutala ngele omumwatate okwa gwanitha po iipumbiwa yopamanyolo yokuninga omuyakuligongalo mbyoka tayi adhika mu 1 Timoteus 3:8-13, aakuluntugongalo otaya ka tala ngele omumwatate okwa gwana okuhumbata oshinakugwanithwa. Otaya vulu ye mu pule a longe iilonga yi na oshilonga ngaashi okutopola iifo niileshomwa yilwe, okulonga nomambako, nokukaleka Oshinyanga shUukwaniilwa monkalo ombwanawa nosho tuu. Aakuluntugongalo otaya ka tala kiikala ye shi na ko nasha niilonga mbyoka a pewa nonkene te yi gwanitha po. Otaya ka tala omaukwatya ngaashi uuinekelwa, uulela, uulaadhi, eifupipiko, iikala yehalo ewanawa nosho wo uukwatya wokukala nawa nayalwe. (Fil. 2:20) Oku li mbela omuholelwa mokuzala kwe nosho wo mokwiiyopaleka? Oku li mbela omuntu ngoka ha gwanitha po oshinakugwanithwa she? Oya hala okumona ‘okweenda kwe okuwanawa mengungumano lyuunongo.’ (Jak. 3:13) Ota lalakanene mbela shili okukala e li ekwatho megongalo? Oha gwanitha mbela elombwelo lyaJesus ‘oku ka ninga aantu ayehe aalongwa’ mokukutha ombinga nuulaadhi miilonga yomomapya? — Mat. 28:19; tala Oshungonangelo yo 1 Septemba 1990 (mOshiingilisa), epandja 18-28.
3 Ombimbeli itayi popi kutya omuntu oku na okukala e na oomvula dhi thike peni opo a vule okuninga omuyakuligongalo. Ihe itatu tegelele ya kale aagundjuka ye na oomvula 12 nenge 15 lwaampono, unene tuu molwashoka okwa tiwa aantu mbono taya vulu okukala ye na omukiintu naanona. (1 Tim. 3:12, 13) Aalumentu ya tya ngaaka kaye na okukala haya tompolwa ‘kokahalu kuugundjuka’ ihe oye na okukala hayi ihumbata nawa lela yo yene ye na ondondo ombwanawa nosho wo eiyuvo lya yela koshipala shaKalunga naantu. — 2 Tim. 2:22.
4 Nonando uunkulungu wopaunshitwe ou na oshilonga, iikala yomuntu nombepo ye oyo lela tayi ti sha. Omumwatate mbela okwa hala okutanga Kalunga neifupipiko nokuyakula aamwahe? Ngele osho, Jehova ota ka yambeka oonkambadhala dhe a ninge ehumokomeho megongalo.