Okupopya komukalo omupu oko dhingi
1 Omolwashike mbela aantu haya pulakene nawa unene olundji ngele aauvithi aashona taya popi nayo etumwalaka lyUukwaniilwa? Etompelo limwe olyo kutya omapopyo gawo omapu. Aauvithi yamwe otashi vulika haya dhiladhila kutya okugandja uunzapo nomupondo otashi pula u kale ho popi nawanawa nou longithe iitya yomuule. Ihe iimoniwa otayi ulike kutya okupopya okupu nokwa yela oko dhingi.
2 Jesus oku uvitha Uukwaniilwa waKalunga komukalo omupu nogu uvitiwe ko nokwa dheula aalongwa ye ya ninge sha faathana. (Mat. 4:17; 10:5-7; Luk. 10:1, 9) Okwa li a longitha omafalomo, omapulo nosho wo omaudhi kaage shi omadhigu okuningitha aapulakeni ye ya pulakene neitulomo nokuthika komitima dhawo. (Joh. 4:7-14) Otatu ningi nawa ngele tatu landula oshiholelwa she nokuninga oonkundathana ndhoka tadhi uviwa ko nuupu.
3 ‘Onkundana ombwanawa yuukwaniilwa’ oyo etumwalaka ndyoka tu na okuuvitha. (Mat. 24:14, NW) Ngele to longitha Uukwaniilwa u li oshipalanyolo oshinene shoonkundathana dhoye otashi ku kwathele u dhi kaleke oompu. Popya iinima mbyoka aapulakeni yoye tayi ipula nayo. Aakiintu olundji ohaya kala ye na ohokwe onene momaukwanegumbo gawo shi vulithe miinima yopapolotika. Tate omuvali tango ohi ipula niilonga ye nosho wo negameno lyuukwanegumbo we. Aagundjuka oye na ohokwe monakuyiwa yawo; aakulupe oye na ohokwe nuukolele uuwanawa nosho wo negameno lyawo. Aantu olundji ohayi ipula unene kombinga yiiningwanima yopuyo shi vulithe naashoka tashi ningwa kiilongo yokokule. Konima yokukundathana kombinga yiinima yontumba mbyoka tayi pendutha ohokwe mwaayehe, ukitha eitulomo komayambeko ngoka aantu aavuliki taya ka nyanyukilwa kohi yelelo lyUukwaniilwa waKalunga. Oohapu oompu nokadhi shi ondhindji ndhoka dha longekidhwa nawa tadhi endele pamwe nenyolo otadhi vulu okukala uupitilo uuwanawa okupendutha ohokwe yomupulakeni gwoye.
4 Oto vulu okutameka oonkundathana to ti:
◼ “Ondi inekela oto shi zimine kutya aantu oye niwe komikithi odhindji ihaadhi aluka. Ihe owe shi tseya mbela kutya Kalunga oku uvaneka kutya masiku ota ka kutha po omikithi dhomaludhi agehe nosho wo eso?” Tegelela eyamukulo, opo nduno lesha Ehololo 21:3, 4.
5 Nokupopya kwa yela nokupu, kala ho adha omadhiladhilo nomitima dhaantu oyendji moshitopolwa sheni, u ya kwathele yi ilonge kombinga yaJehova nosho wo yetegameno lyokunyanyukilwa omwenyo gwaaluhe. — Johannes 17:3.