Etsaathanomukumo lyi ikalekelwa
1 Ihapu piti esiku oshigwana shaJehova inaashi taalelwa komamakelo geitaalo lyasho. Molwashoka oyi shi kutya oyi na ko ethimbo efupi, Ondiaboli otayi ningi eponokelo lyahugunina okuteya po uudhiginini wetu kuJehova. (Eh. 12:12) Osha simanenena opo tu ‘ikolelele mOmuwa nomomukumo gwoonkondo dhe’ opo tu “wape okwiipopila esiku ewinayi nokukala omuthika, nge [twa] gwanitha ayihe.” — Ef. 6:10, 13.
2 Okugongala pamwe nooitaali ooyakwetu oko elongekidho lyaJehova oku tu kwathela tu mone oonkondo. Omuyapostoli Paulus shika okwa li e shi uvite ko. Okwa li a yuulukwa okukala pamwe naamwahe Aakriste opo ya vule “okutsaathana omukumo” noya “kolekwe.” (Rom. 1:11, 12, yelekanitha OB-1986.) Opo li tu koleke mokulonga ehalo lyaKalunga, Olutuwiliki olya ningi elongekidho lyopahole oku tu pa ompito okumona uuwanawa mokutsaathana omukumo poshigongi shoshitopolwa tashi ya “Aauvithi yUukwaniilwa aalaadhi.”
3 Kala po opo u mone mo uuwanawa: Shi ninga elalakano lyoye poshigongi u kale po omasiku agehe. Otatu “imonene uuwanawa” mokuthika manga eimbilo lyotango inaali imbwa nokukala po sigo ‘oAmen’ yetu tayi zi komutima yegalikano lyahugunina. (Jes. 48:17, 18, NW) Oyendji otaya ka kala ya pumbwa okuninga elongekidho ewanawa shi na ko nasha nelandulathano lyiilonga yawo manga kuyele opo ya wape okupewa efudho okukala poshigongi omasiku agehe. Dhoshili, otashi vulika kaashi shi oshipu opo omugandji gwiilonga gwoye e ku pe efudho, ihe otu na eshilipaleko lyaJehova kutya ote ke tu kwatha okulonga ehalo lye. (1 Joh. 5:14, 15) Ngele inatu shi ninga nale, ngashingeyi olyo ethimbo okuninga omalongekidho golela ge na ko nasha nosheenditho nosho wo okukonga ehala, twaahe shi ninge owala ngele tu na ethimbo. Otatu vulu okukala neinekelo kutya Jehova ota yambeke oonkambadhala dhetu opo poshigongi tu kale po omasiku agehe. — Omayel. 10:22.
4 Tegelela okutsuwa omukumo: Owa za ngaa nale poshigongi shoshitopolwa to ti: “Shino kasha li tuu oshigongi dhingi!” Omolwashike tashi vulika to dhiladhila ngawo? Omolwashoka tu li aantu inaaya gwanenena otashi vulika tu vulwe kashona nakashona, e tatu mono twa pumbwa etsuwomukumo lyopambepo. (Jes. 40:30) Omumwameme gumwe okwa yelitha ta ti: “Onkalelo ndjika otayi vulitha ndje niigongi ohayi kwathele ndje ndi ukithe ishewe eitulomo lyandje kiinima yopambepo, tayi pe ndje oonkondo dhopambepo ndhoka nda pumbwa. Otashi monika sha fa etsuwomukumo lye ya naanaa ethimbo ndyono nde li pumbwa noonkondo.” Otashi vulika nangoye wa kala wu uvite sha faathana.
5 Etsuwomukumo lya pumbiwa ihatu li mono owala komukalo gwiipopiwa noonkundathana dhomapulapulo, ihe ohatu li mono wo okupitila miitopolwa yilwe iiwanawa yopambepo piigongi yetu. Omumwatate gumwe okwa ti: “Oko okulongitha kwa yela, taku kwatha omakotampango gOmbimbeli hoka nda pandula shili. Dhoshili, iinyandwa ohayi kwatha kaashi shi okuyelekwa mokuulika nkene tatu vulu okumona uuwanawa miiholelwa yonale, mbyoka iiwanawa niiwinayi. Egandjo lyiileshomwa iipe olyo sha shoka handi kala aluhe nda tegamena, nohandi kala nde li nyanyukilwa sigo ooshono nda shuna nale kegumbo.”
6 Iigongi oyo elongekidho lya simanenena lyaJehova pethimbo ndika ‘lyomasiku omadhigu okukaliwa mugo.’ (2 Tim. 3:1, NW) Ohayi tu kwathele tu pulakene omayele ga nwethwa mo taga ti: “Tonateni, kaleni mwa kolelela meitaalo, aalumentwelela, aanankondo.” (1 Kor. 16:13) Onkee ano, natu kaleni twa tokola toko okukala pomutumba kehe nokunyanyukilwa etsuwomukumo poshigongi shetu shoshitopolwa “Aauvithi yUukwaniilwa aalaadhi.”
[Oshimpungu pepandja 3]
Ninga elongekidho poshigongi u kale po omasiku agehe
■ Pula efudho kiilonga.
■ Konga ehala lyokukala moshilando moka mu na oshigongi.
■ Ninga elongekidho lyosheenditho shokuya koshigongi.