Omalishuneko ohaa twala momakonakonombibeli
1. Omolwashike okuninga omalishuneko sha fimana unene?
1 Jesus kakwa li ashike a pa ovashikuli vaye oshilonga shokuudifa ndele okwe va pa yo oshilonga ‘shokuninga ovanhu ovahongwa noku va honga.’ (Mat. 28:19, 20) Omuudifi oha udifa, ndele omuhongi oha ningi shihapu. Oha hongo nokuyelifa nosho yo okuyandja oumbangi. Onghedi imwe omo hatu hongo vamwe okuninga omalishuneko kwaavo va ulika ohokwe tu na elalakano lokuhovela omakonakonombibeli navo.
2. Okoolyelye tu na okuninga omalishuneko?
2 Okoolyelye u na okuninga omalishuneko? Shilipaleka okushuna kwaaveshe ovo va tambula ko oishangomwa ile ovo va ulika nokuli ohokwe yasha monghundana iwa. Ngeenge owa mono ovo ve na ohokwe fimbo to yandje oundombwedi meenhele domoipafi, kendabala okukufa ko onomola yeumbo nongodi opo ohokwe yaye i dule okukulikwa. Kala u na omukumo shi na sha nokuhovela omakonakonombibeli. Twikila okukonga ovo tava tambula ko omakonakonombibeli, notashi dulika oto ke va mona noupu.—Mat. 10:11.
3, 4. Oshike sha kwatelwa mo mokuninga omalishuneko taa pondola?
3 Ulika kutya ou na ko nasha navo: Okulilongekida u ninge elishuneko tali pondola ohaku hovele petalelepo lotete. Ovaudifi hava pondola ohava didilike oinima oyo omuneumbo a hokwa nohave i longifa i li ekanghameno leenghundafana dokonahiya. Vamwe ova mona kutya ohashi kala shiwa okupula epulo pexulilo letalelepo opo va pendule ohokwe yomuneumbo shi na sha netalelepo tali landula. Okukala tu na ko nasha shili novanhu ohaku tu va diladilifa nokuli nokonima eshi twa fiya po omaumbo avo nohashi tu linyengifa tu va alukile nope he na okwoongaonga. Ngeenge otashi shiiva, kendabala okushuna ko ofimbo ohokwe i li po natango—tashi dulika meni lefiku limwe ile avali.
4 Ngeenge to ningi elishuneko, kendabala okutungila keenghundafana da pita. Shi ninga elalakano loye okutukula nomutalelwapo efimbo keshe nokuli nande ediladilo limwe alike lopamishangwa tali tungu, ndele kala we lilongekida okupwilikina. Shiiva omuneumbo nawanawa. Opo nee momatalelepo taa landula ko tukula naye eeshili okudja mEendjovo daKalunga odo tadi ungaunga noisho yaye.
5. Etwalemo lilipi li li paunafangwa tali dulu okulongifwa okuhovela omakonakonombibeli?
5 Kala u na ko na sha nokuhovela omakonakonombibeli: Ninga omalishuneko nelalakano lokuhovela ekonakonombibeli. Mbela osho otashi dulu okuningwa ngahelipi? Lombwela omunhu kutya owa hala okutukula naye oshitwa shihokwifa ndele to pandje kokatendo membo Ontseyo ile mokabroshure Ota Pula oko to diladila kutya otaka ka hokwifa omunhu oo. Lesha okatendo oko, tala kepulo ndele to kundafana naye omushangwa umwe ile mbali odo da ulikwa. Eshi otashi dulu okuningwa odikilila pomuvelo moule wominute nhano ile omulongo. Xulifa nokupula epulo olo la landula ko ndele to ningi elongekido mu twikile eenghundafana deni kefimbo lokomesho.
6. Ongahelipi hatu dulu okuulika kutya otu udite ko efimano lokuninga omalishuneko?
6 Okukulika ohokwe keshe hatu hange movanhu oshi li oshitukulwa sha fimanenena shoukalele wetu. Onghee hano, tula po efimbo le likalekelwa moshivike keshe lokuninga omalishuneko. Okuninga ngaho otashi weda ko komupondo woye moukalele notashi eta ehafo lashili.