Omanangeko noupuna oukalele woukokolindjila
1, 2. Omanangeko noupuna elipi taa endele pamwe noukalele woukokolindjila, nomolwashike?
1 Omukokolindjila umwe okwa ti: “Ondi shi shii nokutya kape na oilonga imwe oyo kwa li tai dulu okweetela nge embilipalelwo olo handi mono okudja mokulombwela vamwe kombinga yoshili.” Umwe okwa ti: “Pexulilo lefiku keshe, eemhofi dange ohadi kala dinyenye nomutima wange ohau kala wa hafa.” Ovakokolindjila ovo otava popile ko ovamwatate novamwameme keshe pamwe ovo va mona omanangeko noupuna oukalele woukokolindjila.—Omayel. 10:22.
2 Okukwafela ovanhu va mone eshiivo lokushiiva Eendjovo daKalunga olo tali xupifa eemwenyo ohashi eta embilipalelwo lashili. (Oil. 20:35; 1 Tes. 2:19, 20) Omukokolindjila umwe wefimbo lile okwa shanga ta ti: “Otashi hafifa notashi pameke eitavelo okumona nghee Eendjovo daKalunga di na eenghono dokulinyengifa ovanhu opo va ninge omalunduluko monghalamwenyo yavo.” Heeno, okuliyandja opo va kwafele ovanhu nokuninga omakonakonombibeli, ovakokolindjila otava ka mona omanangeko noupuna ngaashi oo.
3, 4. Ongahelipi oukokolindjila tau hongo omunhu okulineekela Jehova, naasho otashi kwafele ngahelipi omunhu a kule pamhepo?
3 Lineekela Jehova: Okulineekela efiku keshe momhepo yaKalunga eshi tava wanifa po oukalele wavo otaku kwafele ovakokolindjila opo va imike “oiimati yOmhepo” nokukala i li eameno lavo. (Gal. 5:16, 22) Natango, molwaashi ohava longifa alushe Eendjovo daKalunga, ovakokolindjila ove na luhapu oukeka mokulongifa Omishangwa opo va popile oshili nosho yo okupameka vamwe. (2 Tim. 2:15) Omumwatate umwe oo a kala omukokolindjila omido omilongo okwa popya ta ti: “Oukokolindjila owa kwafela nge ndi mone eshiivo lomoule lokushiiva Ombibeli, eshiivo olo nda longifa okukwafela ovanhu vahapu va shiive Jehova nomalalakano aye.” Kashi fi tuu ondjabi!
4 Ovakokolindjila vondjikilile ove na yo okulineekela Jehova meenghedi dikwao dihapu. Eitavelo lavo otali pamekwa eshi tava mono nghee ta nangeke noupuna eenghendabala davo opo va file oshisho eemhumbwe davo dopalutu. Omukokolindjila wondjikilile womido 72, oo a kokola ondjila omido 55 okwa ti: “Jehova ke na fiku a efele nge.” Natango, okukaleka onghalamwenyo yavo i li paunafangwa, ovakokolindjila otave liamene koisho ihapu yonghalamwenyo. Mbela osho oshinima shiwa kwoove?—Mat. 6:22; Heb. 13:5, 6.
5. Ongahelipi oukokolindjila tau kwafele omunhu a ehene popepi naJehova?
5 Ehena popepi naKalunga: Ekwatafano letu naJehova olo oshinima shi na ongushu ya denga mbada. (Eps. 63:4) Ngeenge hatu kufa ombinga iyadi moukalele omolwohole yokuhola Jehova, ekwatafano olo ohali ningi lopofingo. (Jak. 4:8) Omukokolindjila oo a kokola ondjila oule womido di dule po 18 okwa ti: “Oilonga youkokolindjila otai tu pe omhito opo tu ‘makele tu tale ouwa waJehova apa u fike,’ nosho yo okutunga ekwatafano la kola nOmushiti wetu efiku keshe.”—Eps. 34:8, NW.
6. Ovakokolindjila ove na okukala ve na shike, noolyelye tava mono ouwa kakele kovakokolindjila?
6 Kakele kokukala neenghalo odo tadi va pitike, ovakokolindjila ove na okukala ve na eitavelo la pama, ohole yashili yokuhola Kalunga nosho yo ovanhu vakwao nove na okukala ve na ehalo okuninga omaliyambo. (Mat. 16:24; 17:20; 22:37-39) Ndelenee ngaashi oipala yovakokolindjila ya hafa tai shi ulike keshe pamwe, omanangeko noupuna oukalele woukokolindjila omahapu. (Mal. 3:10) Omanangeko noupuna oo inaa ngabekelwa ashike ovakokolindjila, ndele nokomaukwaneumbo avo yo nosho yo eongalo nalo otali mono ouwa munene omolwomhepo iwa oyo hai ulikwa kovakokolindjila.—Fil. 4:23.