Mona uuwanawa mokukonakona embo Hedha popepi naJehova
1 POshigongi shOshitopolwa “Kala popepi naJehova” shomo-2010 otwa li twa nyanyukwa okumona embo Hedha popepi naJehova mOshindonga nomOshikwanyama. Oyendji oya li nokuli ya tameke oku li lesha nziya konima sho ye li pewa.
2 MuKotoba 2011 otwa li twa tameke okukonakona embo Hedha popepi naJehova pEkonakonombiimbeli lyEgongalo. Ongiini tatu vulu okumona uuwanawa moku li konakona? Osha simana tu kale hatu ilongekidha. Ohatu longitha ethimbo olindji okukonakona ontopolwa kehe, tatu konakona owala uutendo uushona oshiwike kehe. Shika otashi ke ku pa ompito wu ninge omatyokosha shi ikolelela kwaashoka wa konakona nowa tedhatedha kusho.
3 Okutameka nontopolwa 2, embo ndika oli na okampungu ke na oshipalanyolo “Omapulo gokutedhatedha” lwopehulilo lyontopolwa kehe. Konima ngele ontopolwa kehe ya pu okukonakonwa, egongalo ohali kundathana okampungu hoka. Ngoka ta kwatele komeho Ekonakonombiimbeli lyEgongalo ota ka pula omapulo ngoka taga kwathele aakwanegongalo ya popye kombinga yaashoka yi ilonga mo mOmanyolo. (Omayel. 20:5) Kakele komapulo ngoka ge li mokampungu, ota vulu okupula omapulo ngaashi: “Uuyelele mbuka otawu ku longo shike kombinga yaJehova? Owa guma ngiini onkalamwenyo yoye? Ongiini to vulu oku wu longitha wu kwathele yalwe?” Elalakano lye okukwathela aakwanegongalo ya ninge omatyokosha taga zi komutima, haku ya pula okanaku kombinga yokanima kehe inaaka simana pethimbo mpoka.
4 Embo Hedha popepi naJehova ina li fa omambo omakwawo. Nonando omambo agehe ga za ‘komupiya omudhiginini nomunandunge’ otaga simanekitha Jehova, embo ndika alihe otali kundathana owala kombinga yomaukwatya gaJehova. (Mat. 24:45-47, NW) Ndjika kayi shi tuu ompito ombwanawa noonkondo! Otatu ka mona uuwanawa owindji sho tatu konakona muule kombinga yuukwatya waJehova. Ekonakono ndika nali tsikile oku tu kwathela tu hedhe popepyeelela naTate yetu gwomegulu lyo nali tu kwathele wo tu kale twa pyokoka mokukwathela yalwe ya hedhe wo popepi naye.