Ontumwafo ya za koshitayimbelewa

Kaauvithi yonkundana yUukwaniilwa aaholike:

Nonando omumvo gwiilonga gwa zi ko ogwa li gu udha omaipyakidhilo, ogwa li gu nyanyudha. Mo 10 Novomba 2007 otwa li twa nyanyukilwa elangeko lyoshitayimbelewa shetu shoka sha li sha gwedhelwa, pamwe naamwatate naamwameme omayovi okuza moshilongo ashihe mboka ya ninginithwa pwa pita oomvula dhi vule 40. Opwa li wo aamwatate oyendji ya za kiilongo yi ili. Esiku ndyoka olya li shili ompito yinyanyudha yokutungathana pambepo.

Otwa nyanyukwa okwaadha oshitsa shopombanda oshipe shaauvithi ye li 82 447 muMaalitsa nosho wo omakonakonombiimbeli ge li 101 498 muApilili. Aakalipo pEdhimbuluko oya li 205 498 shoka sha li wo oshitsa shopombanda oshipe.

MuMei oshilongo osha li sha haluthwa komaponokelo guutondwe ngoka ga li ga ningilwa aakwiilongo. Aamwatate oyendji mboka ya za kiilongo yopuushinda oya li ya gumwa koshinima shika. Nonando kapu na gumwe gwomuyo a dhipagwa, oyendji oya kanitha omahala gawo gokukala niiniwe yawo. Aamwatate yamwe mwa kwatelwa aakonakonimbiimbeli oyendji oya li ya ponokelwa nosha li she ye ehameke unene pamaiyuvo. Ihe aamwatate mboka ye li pomahala ngoka ga gamenwa oya li gandja ekwatho. Oya li ye edhilile aamwahe noku ya pa iikulya, oonguwo niipumbiwa ayihe yilwe mbyoka ya li ya pumbwa opo ya kale ye li nawa. Aamwatate yamwe oya li ya kwathele pashimaliwa opo yamwe ya vule okushuna kiilongo yawo. Aamwatate mboka ya kwathelwa oya li ya nyolele egongalo limwe li li mOkapa ombapila taya pandula omolwekwatho ndyoka ya pewa. Mombapila moka omu na oohapu tadhi ti: “Tse katwa li oontauki, ihe otwa li nane twa fa egumbo limwe. Omukalo ngoka twa li twa hupithwa otagu tu pe efano nkene tatu ka hupithwa pethimbo lyo opala puArmagedon nokupewa ehala ewanawa moparadisa.” Oyendji yomutse otwa li twa mono ompito tu ulike kutya otu hole shili aamwatate. Ngele otwa pulwa tu shi ninge, otatu ka gandja oomwenyo dhetu omolwawo. — Joh. 13:34, 35.

Aamwaho,

Oshitayimbelewa shaSouth Africa