Esiku lyi ikalekelwa lyokutameka omakonakonombiimbeli
1 Okutameka muJanuali, egongalo kehe otali ka kutha esiku limwe momwedhi kehe mehuliloshiwike limwe, tashi vulika mehuliloshiwike lyotango, opo li gandje eitulomo kokutameka omakonakonombiimbeli. Esiku ndyoka otali vulu okukala Olyomakaya nenge Osoondaha, shi ikolelela kesiku ndyoka tali opalele egongalo lyeni. Mesiku ndyoka ngele omunegumbo okwa tindi ekonakonombiimbeli, otatu vulu oku mu pa embo Omalongo gOmbiimbeli nenge tu mu pe iifo iipe. Aakuluntugongalo naayakuligongalo ayehe oye na okukutha ombinga ngaashi tashi vulika momaipyakidhilo ngaka nokukwathela aauvithi ya tameke omakonakonombiimbeli.
2 Okomitiye yIilonga mEgongalo oyi na okutokola kutya esiku lini mehuliloshiwike tali opalele oku shi ninga. Ethimbo nethimbo aauvithi oye na okudhimbulukithwa ya kale yi ilongekidha nokuninga oonkambadhala dhi ikalekelwa ya tameke omakonakonombiimbeli uuna taya longo egumbo negumbo esiku ndyoka nongele taya talele po mboka ya li yu ulike ohokwe.
3 Nkene tu na okwiilongekidha: Otatu vulu okwaadha omaetopo kombinga yankene tu na okutameka omakonakonombiimbeli mokafo haka pepandja 3 nopepandja 12 lyembo Reasoning. Yamwe otashi vulika ya longithe okatraktate kehe, ngaashi Mbela owa hala okutseya oshili? Okafo kUukalele Wetu wUukwaniilwa kaAuguste 2007 pepandja 3 mOshiingilisa oke na wo omaetopo kombinga yankene to vulu okutameka omakonakonombiimbeli ngele to talele po mboka wa pa iifo. Omukuluntugongalo nenge omuyakuligongalo ota ka kwatela komeho paufupi elongekidho lyiilonga yomomapya uule wominute 10 sigo 15, mpoka tapu ka ningwa eetopo nenge euliko limwe nenge gaali nkene ekonakonombiimbeli li na okutamekwa.
4 Oshoshili kutya haayehe taya ka taamba ko ekonakonombiimbeli nenge ya tsikile nalyo ethimbo ele. Shika inashi tu sitha uunye, molwaashoka Jehova oye ha hilile mboka ya fa oonzi kehangano lye. (Joh. 6:44) Oshinakugwanithwa shetu kashi shi owala okukuna oombuto dhoshili, ihe okuhelela nokutekela ndhoka dha mena omidhi, shoka sha kwatela mo okukonakona Ombiimbeli naamboka ye na omitima dhu uka. Ngele tatu shi ningi, nena otu na uuthembahenda wokukala aalongi pamwe naKalunga. — 1 Kor. 3:9.