Iishitwa ayihe oya li ya hangana noyi na ombili, sho ya li kohi yepangelo lyaKalunga
Omolwashike twa pumbwa Oshilongo shaKalunga?
Okuza petameko lyondjokonona yaantu, Omushiti gwetu ngoka edhina lye Jehova, oye owala a li Omupangeli. Okwa li ha pangele pahole. Okwa li a ningile aantu egumbo ewanawa, ano oshikunino shaEden, opo ya kale mo. Okwa li wo e ya tulile mo iikulya oyindji. Kakele kaashono, okwa li wo a pe aantu mboka iilonga ya simana. (Genesis 1:28, 29; 2:8, 15) Aantu oya li taya ka nyanyukilwa ombili, ngele oya kalele kohi yepangelo lyaKalunga lyopahole.
Aantu yotango oya li ye ekelehi Kalunga a kale Omupangeli gwawo
Ombiimbeli otayi ulike kutya omuyengeli omunashipotha, ngoka konima e ki ithanwa Satana Omuhindadhi, okwa pataneke uuthemba waKalunga wokupangela. Okwa ti kutya aantu otaya ka kala ya nyanyukwa lela ngele kaye li mewiliko nomepangelo lyaKalunga. Shiyemateka, aavali yetu yotango, Adam naEva, oya landula Satana noya pilamene Kalunga. — Genesis 3:1-6; Ehololo 12:9.
Molwaashoka Adam naEva oya tindi Kalunga a kale Omupangeli gwawo, oya kanitha egumbo lyawo lyoparadisa nokukala nomwenyo gwaaluhe ye na uukolele wi ihwapo. (Genesis 3:17-19) Etokolo lyawo olya ka guma wo oluvalo lwawo. Ombiimbeli otayi ti kutya molwaashono Adam okwa yono, ‘uulunde owe ya muuyuni, nuulunde owe etelele eso.’ (Aaroma 5:12) Uulunde owe etitha wo oshinima shimwe shiyemateka. Ombiimbeli otayi ti: “Omuntu gumwe ta dhiladhilile mukwawo oshiponga.” (Omuuvithi 8:9) Niitya yimwe, uuna aantu tayi ipangele, ohapu holoka aluhe omaupyakadhi.
OMAPANGELO GOPANTU OGA HOLOKA
Nimrod okwa li a pilamene Jehova
Omupangeli gwotango gwopantu a popiwa mOmbiimbeli, oNimrod. Okwa li ompinge nepangelo lyaJehova. Okuza pethimbo lye sigo onena, aantu aanankondo oya kala nokulongitha nayi oonkondopangelo dhawo. Konima yomimvo 3 000, Omukwaniilwa Salomo okwa nyola a ti: “Onda mono omahodhi gaahepekwa nokaye na omutalaleki; aahepeki yawo oya li aanankondo, ihe aahepekwa kaya li ye na omutalaleki.” — Omuuvithi 4:1.
Onkalo osho yi li ngaaka nokunena. Mo 2009, oshileshomwa sha nyanyangidhwa kIigwana ya Hangana otashi ti kutya omukalo omwiinayi gwokupangela “ogwo gumwe hagu etitha omaupyakadhi ogendji momidhingoloko dhetu.”
ETHIMBO LYOKUKATUKA ONKATU!
Uuyuni owa pumbwa aapangeli ye li nawa nepangelo li li nawa. Naashoka osho Omushiti gwetu e tu uvanekela!
Omapangelo gopantu ngoka ga dhenga mbanda, nokuli nago oga ndopa okukandula po omaupyakadhi gaantu ga kwata miiti
Kalunga okwa dhika po Uukwaniilwa nenge epangelo, ndyoka tali ka pingena po omapangelo agehe gopantu ‘nolyo lyene otali ka kala sigo aluhe.’ (Daniel 2:44, yelekanitha NW) Epangelo ndyono olyo lya kala nokugalikanwa kaantu omamiliyona li ye. (Mateus 6:9, 10) Ihe Kalunga haye ta ka pangela ye mwene. Pehala lyaashono, okwa langeka po omuntu gumwe ngoka a li kombanda yevi oye a ninge Omupangeli. Omuntu ngoka olye?