Uukwaniilwa waKalunga otawu ka tameka okupangela uunake kombanda yevi?

Aalanduli yamwe yaJesus aadhiginini oya li ya hala okuuva kutya uunake Uukwaniilwa waKalunga tawu ka tameka okupangela. Jesus okwe ya lombwele kutya itaya ka tseya ethimbo kondandalunde, uuna tawu ka tameka okupangela kombanda yevi. (Iilonga 1:6, 7) Ihe opo owala a adhikile e ya lombwele kutya ngele ya ka mona iiningwanima yontumba monakuyiwa tayi ningwa pethimbo limwe, naya kale ‘ye shi shi kutya Oshilongo shaKalunga osha li popepi’ nenge tu tye Uukwaniilwa waKalunga owa li popepi, nethimbo lyawo lyokupangela uuyuni olya li lya thika. — Lukas 21:31.

IININGWANIMA YINI JESUS A TI KUTYA OTAYI KA HOLOKA?

Jesus okwa ti: “Iigwana otayi ka thikama okukondjithathana, niilongo otayi ka matukilathana. Otaku ke ya omakakamo gevi omatilithi, oondjala nomalega koombinga noombinga.” (Lukas 21:10, 11) Ngaashi owala oondjila dhopeke dha ninga po omanyala gomuntu, iinima ayihe mbyoka oya ninga po endhindhiliko li iwetikile. Nongaashi owala omanyala haga holola kutya omuntu olye, iiningwanima mbika tayi ningwa pethimbo limwe otayi ulike kutya “Oshilongo shaKalunga oshi li popepi.” Mbela iinima mbyoka oya holoka ngaa pethimbo lya faathana notayi ningwa muuyuni awuhe? Tala kuuyelele tawu landula.

1. IITA

Mo 1914, omwa li mwa holoka iita iinene mbyoka ya li inaayi ningwa nando onale mondjokonona. Aanandjokonona olundji ohaya ti kutya momumvo ngoka onkalo oya li ya lunduluka, molwaashoka omo mwa tameka iita yotango yuuyuni. Iita mbyoka oyo ya longitha tango omakanona ogendji, oomboma hadhi umbwa okuza mombanda, oondjembo dhomashina, omiku dhuuzigo, iikondjitho yopalute nayilwe hayi dhipaga aantu. Oya li ya landulwa kiita iitiyali yuuyuni, moka mwa li mwa tamekwa okulongithwa iikondjitho yopalute. Iita oya kala tayi kondjwa miilongo nomiilongo okuza mo 1914, niita mbyoka oya dhipaga aantu omamiliyona.

2. OMAKAKAMO GEVI

Omumvo kehe ohapu holoka omakakamo gevi 100 lwaampo. Embo Britannica Academic olya ti kutya ohage eta “ehanagulo enene.” Ehangano lyedhina United States Geological Survey otali ti kutya “shi ikolelela komayalulo ngoka ga ningwa momukokomoko gwethimbo ele (okuza mo 1900), omumvo kehe opwa holoka omakakamo gevi omanene 16.” Nonando yamwe oyi itaala kutya omakakamo gevi oga ninga ogendji unene, molwaashoka opu na omikalo dhi li hwepo haya vulu oku ga ndhindhilika mo, uushili owo kutya omakakamo gevi omanene ngoka haga ningwa muuyuni awuhe ohage etele aantu okumona iihuna neso inaashi monika nale.

3. ONDJALA

Oshimpungu shomusinda tashi ulike iilya ya shuna pevi.

Olundji ondjala ohayi etwa kiita, kuulingilingi, keliko lya gwa pevi, okwaalonga nawa evi li imike iikulya, nenge molwaashoka aantu ihaayi ilongekidhile oonkalo dhombepo oondhigu. Ehangano lyOkugandja Iikulya mUuyuni otali popi (molopota yalyo yomo 2018) tali ti: “Muuyuni awuhe aantu omamiliyona 821 kaye na iikulya ya gwana nomamiliyona 124 otaya si ondjala.” Aanona omamiliyona 3.1 lwaampono, ohaya si komanyutu omumvo kehe. Mo 2011, omanyutu oge etitha eso lyaanona oopelesenda 45 lwaampono muuyuni awuhe.

4. OMAUVU NOMIKITHI DHOMIKWAYU

Omandhindhiliko goombuto noombakiteli hadhi eta eso.

Oshifo shEhangano lyUundjolowele mUuyuni osha ti kutya: “Okuza pomimvo 2000 nasha, okwa ndhindhilikwa eindjipalo lyomikithi dhomikwayu. Omikithi dhonale ngaashi okolera, uuvu welega nomashikisha, odha galuka ishewe nopwa holoka omipe ngaashi gwoSARS, MERS, Ebola nosho wo o-Zika.” Omukithi gwekomba gwo-COVID-19 ogwo guliko ngashingeyi. Nonando aanongononi noondohotola, oyi ilonga kombinga yomikithi odhindji, inaya mona omiti dhokupanga omikithi adhihe.

5. IILONGA YOKUUVITHA MUUYUNI AWUHE

Ongonga yevi yi na okakuti ke li dhingoloka nOmbiimbeli ya pandjwa yi li popepi nalyo.

Jesus okwa popi ishewe endhindhiliko lilwe sho a hunganeke a ti: “Elaka ndika etoye lyOshilongo otali ka uvithilwa aantu ayehe, li ningile iigwana ayihe onzapo; notaku ya ihe ehulilo.” (Mateus 24:14) Nonando uuyuni owu na omaupyakadhi ga kwata miiti kunena, aantu ya konda pomamiliyona gahetatu ya za momihoko adhihe, otayu uvitha onkundana ombwanawa yUukwaniilwa waKalunga miilongo 240 nomomalaka ga konda 1000. Shika inashi ningwa nando onale mondjokonona.

ENDHINDHILIKO NDYOKA OTALI TI SHIKE?

Iiningwanima mbyoka tayi gwanitha po ehunganeko lyaJesus, otayi ningwa kunena. Omolwashike tu na okukala twa hala oku yi tseya? Oshoka Jesus okwa ti: “Ngele tamu mono ayihe mbika tayi ningwa, kaleni mu shi shi kutya Oshilongo shaKalunga oshi li popepi.” — Lukas 21:31.

Jesus a kuutumba koshipangelapundi megulu, e li omukwaniilwa ta pangele moparadisa kombanda yevi. — Masiku, Uukwaniilwa otawu ka gwanitha po ehalo lyaKalunga kombanda yevi

Endhindhiliko ndyoka Jesus a gandja nosho wo eyalulo lyethimbo lyOmbiimbeli, ohali tu kwathele tu uve ko kutya Kalunga okwa dhike po Uukwaniilwa we megulu momumvo 1914.a Pethimbo ndyoka okwa langeke po Omwana, Jesus Kristus, e li Omukwaniilwa. (Episalomi 2:2, 4, 6-9) Masiku Uukwaniilwa waKalunga otawu ka tameka okupangela kombanda yevi, notawu ka hanagula po omapangelo gopantu nokuninga evi oparadisa, naantu otaya ka kala nomwenyo sigo aluhe.

Masiku, oohapu dhegalikano ndyoka Jesus a longa aalongwa ye ya galikane tadhi ti: “Oshilongo shoye nashi ye, ehalo lyoye nali gwanithwe kombanda yevi wo ngaashi megulu,” otadhi ka gwanithwa po. (Mateus 6:10) Uukwaniilwa sho wa kala tawu pangele megulu okuza mo 1914, owa kala tawu ningi shike? Otwa tegelela wo wu ka ninge po shike, sho tawu ka pangela kombanda yevi?

a Opo wu mone uuyelele kombinga yomumvo 1914, tala embo Kala nonkalamwenyo ombwanawa sigo aluhe, lya nyanyangidhwa kOonzapo dhaJehova, oshileshwa 32.