Okuuvitha ohaku tu kaleke twa kola pambepo
1. Okuuvitha ohaku tu etele uuwanawa washike?
1 Ngele ohatu kutha ombinga miilonga yokuuvitha pandjigilile, ohashi koleke uupambepo wetu nohashi tu etele enyanyu. Odhoshili kutya ohatu kutha ombinga muukalele unene tuu opo tu nyanyudhe Jehova. Ihe mokuvulika kelombwelo ‘lyokudhiginina okuuvitha,’ otatu ka lalekwa nuuyamba kuJehova notashi tu etele uuwanawa momikalo dhilwe. (2 Tim. 4:2; Jes. 48:17, 18) Ongiini okuuvitha taku vulu oku tu nkondopaleka noku tu nyanyudha?
2. Uukalele ohawu tu nkondopaleke momikalo dhini?
2 Ohatu nkondopalekwa nokulalekwa nuuyamba: Sho tatu uvithile aantu, otashi tu ladhipike tu gandje eitulomo komalaleko nuuyamba ngoka tage ke etwa kUukwaniilwa pehala lyokwiipula nomaupyakadhi gongashingeyi. (2 Kor. 4:18) Ngele tatu ya yelithile omalongo gOmbiimbeli, ohashi koleke eitaalo lyetu momauvaneko gaJehova nohashi tu kwathele okupandula oshili. (Jes. 65:13, 14) Sho tatu kwathele yalwe ya koke pambepo opo ya kale ‘kaaye shi yomuuyuni,’ otashi koleke etokolotoko lyetu tu kale twa topoka ko kuuyuni. — Joh. 17:14, 16; Rom. 12:2.
3. Uukalele wetu ohawu tu kwathele ngiini tu imike omaukwatya gopaKriste?
3 Ngele ohatu kutha ombinga muukalele, ohashi tu kwathele tu kokeke omaukwatya gopaKriste. Pashiholelwa, ngele tatu kambadhala ‘okuninga ashihe shoka tatu vulu omolwaayehe,’ otashi ke tu kwathela tu kale neifupipiko. (1 Kor. 9:19-23) Uuna tatu popi naamboka ‘ya hepekwa noya loloka ya fa oonzi dhaa na omusita,’ otatu ilongo okukala tu na ondjaalela nolukeno. (Mat. 9:36) Ohatu ilongo eidhidhimiko uuna tatu idhidhimike nonando aantu kaye na ko nasha natse nenge taye tu pataneke. Ohashi tu etele enyanyu enene ngele tatu igandja mokukwathela yalwe. — Iil. 20:35.
4. Owu uvite ngiini kombinga yuukalele woye?
4 Inatu yambekwa tuu sho tu na uukalele mboka tawu simanekitha Ngoka oye awike tu na okulongela! Uukalele ohawu tu nkondopaleke. Ohawu tu etele omalaleko nuuyamba ngele tatu itula mo thiluthilu ‘mokutsakanitha oshilonga shokuuvitha elaka etoye.’ — Iil. 20:24.