Natu longitheni iileshomwa yetu nawa
1. Ongiini tatu vulu okuulika olupandu kombinga yomasiloshimpwiyu gaJehova, ngaashi Jesus?
1 Konima sho Jesus a kutitha ongundu onene yaantu pashikumithalonga, okwa li a longekidha opo iikulya mbyoka ya hupa po yi pungulwe. (Mat. 14:19-21) Jesus okwe tu tulila po oshiholelwa oshiwanawa tu kale hatu ulike ‘olupandu,’ mokulongitha nawa iinima ayihe mbyoka Jehova ha gandja okupitila ‘momumati omwiinekelwa.’ — Kol. 3:15, KB; Luk. 12:42; Mat. 24:45-47.
2. Oshike tatu vulu okuninga po tu keelele okundumbalelwa kiifo?
2 Iifo: Iifo otayi vulu oku tu ndumbalela nuupu. Ngele ohatu hupitha po aluhe iifo, otu na okushunitha pevi omwaalu ngoka hatu mono. Ongiini shi na ko nasha niifo iikulu? Iifo yetu ihayi kwishi. Ngele otwa ndumbalelwa kiifo iikulu, otatu vulu okupula omutonateli gwiilonga nenge omukuluntugongalo gumwe e tu kwathele nkene tatu vulu oku yi gandja.
3, 4. Oshike tu na okukaleka momadhiladhilo uuna tatu kutha iileshomwa kOshinyanga shUukwaniilwa?
3 Iileshomwa yilwe: Kala aluhe ho tala tango kegumbo ngele owu na iileshomwa mbyoka tayi gandjwa momwedhi ngoka, omanga ino ka kutha yilwe kOshinyanga shUukwaniilwa. Kala owala ho pula iileshomwa mbyoka to ka longitha moshiwike, nongele owe yi gandja ayihe oto vulu okugaluka wu pewe yilwe.
4 Otu na owala okumbestela omwaalu gwe eleka gwiileshomwa yetu yopaumwene. Nyola edhina lyoye kiileshomwa yoye yopaumwene. Ngele oya kana otashi ka kala oshipu ku yamwe oku yi ku galulila. Ngele owu na oWatchtower Library on CD-ROM nenge wa gongela iifo yoye yopaumwene, ino pumbwa we okumbestela omahwata gOshungonangelo no-Awake!.
5. Oshike tu na okukaleka momadhiladhilo uuna tatu gandja iileshomwa yetu?
5 Ngele tatu gandja iileshomwa: Otu na owala okugandja iileshomwa yetu kwaamboka tayu ulike ohokwe shili. Inatu dhimbwa kutya otse tu na tango oshinakugwanithwa shokuyambadhidha pashimaliwa iileshomwa yetu mbyoka hatu longitha muukalele. Uuna tatu gandja oshileshomwa kugumwe ngoka e na ohokwe, natu mu lombwele uuthembahenda mboka e na wokuyambidhidha iilonga yokuuvitha muuyuni auhe.
6. Omolwashike twa lenga unene iileshomwa yetu, naanshoka otashi tu inyengitha tu yi longithe ngiini?
6 Jesus okwa li ha palula aantu palutu, ihe olundji okwa li he ya palula unene pambepo. Okwa ti: “Omuntu ita kala e na omwenyo koshikwiila ashike, ihe okukehe ohapu tayi zi mokana kaKalunga.” (Mat. 4:4) Iileshomwa yetu ohayi longo aantu ooshili dhOmbiimbeli dha simanenena opo ya vule oku ka mona omwenyo gwaaluhe. (Joh. 17:3) Oyi na oshilonga lela, nokayi na okuhepithwa.