Ongiini to vulu okutamununa mo uukalele woye?
1. Otu na ompumbwe ye endelela yini muukalele, nomolwashike?
1 Jesus sho a mono kutya aantu oyendji oye na ohokwe monkundana ombwanawa yUukwaniilwa, okwa lombwele aalongwa ye kutya “galikaneni ano mwene gwiilya, a tume aalongi keteyo lye.” (Mat. 9:37, 38) Uukalele wetu owe endelela noonkondo shi vulithe nale, molwaashoka otu li pethimbo mpoka eteyo li li pokuhula. Shika otashi ti kutya otu na okugalikana kombinga yankene tu na okukutha ombinga muukalele pakuudha. — Joh. 14:13, 14.
2. Aantu yamwe ohaya ningi oonkambadhala dhini shi na ko nasha niilonga yeteyo?
2 Tamununa mo uukalele woye: Jehova okwa kwathela aantu oyendji noku ya wilika opo ya vule okutameka uukokolindjila. (Eps. 26:2, 3; Fil. 4:6) Yamwe ohaya ningi oonkambadhala dhi ikalekelwa ya kuthe uukwathelikokolindjila lumwe nenge oomwedhi dhontumba momvula. Shika oshi li omukalo omwaanawa gwokutamununa mo uukalele wawo. Omolwenyanyu ndyoka hali ya zile muukwathelikokolindjila, oyendji mboka haye wu kutha ohaya kala ya hala okuninga aakokolindjila yondjigilile. — Iil. 20:35.
3. Ngele owa li nale omukokolindjila, oshike to vulu okuninga ngashingeyi?
3 Mbela oto vulu okuninga ishewe omukokolindjila?: Ngele owa li nale omukokolindjila, nopwaahe na omalimbililo oho dhiladhila kiimoniwa yinyanyudha yopethimbo ndyoka. Mbela oho galikana ngaa natango opo wu ninge ishewe omukokolindjila? Otashi vulika oonkalo ndhoka dha li dhe ku ningitha wu ethe po uukokolindjila kadhi po we. Ngashingeyi otashi vulika to vulu okutsikila nuuthembahenda mboka wi ikalekelwa. — 1 Joh. 5:14, 15.
4. Atuheni otu na ompito okuninga shike?
4 Iilonga yeteyo otayi longwa neendelelo noyi li pokupwa masiku. (Joh. 4:35, 36) Atuheni natu konakoneni iilonga yetu yakehe siku, opo tu tale ngele otatu vulu okutamununa mo uukalele wetu. Ihe ngele itatu vulu okutamununa mo uukalele wetu, mbela itatu vulu okukwathela momikalo dhilwe? (Mark. 12:41-44) Jehova okwa tula po uuthembahenda mboka wa dhenga mbanda nowi ikalekelwa opo a longithe mboka oonkalo dhawo tadhi ya pitike. — Eps. 110:3.