“Mbela onda gwana okuuvitha?”
1. Oshike tashi ke tu kwathela opo tu sinde omaiyuvo gokukala tu wete twa fa inaatu gwana okuuvitha?
1 Ngele owi iyadha to pula epulo lyoludhi ndoka, ino teka omukumo. Ihatu ningi aauvithi molwaashoka ando twa mona elongo lyontumba nenge molwuunkulungu wetu. Aalongwa yamwe yaJesus yopetameko oya popiwa mOmbiimbeli kutya oya li “inaa longwa.” Nonando ongaaka, oya li aauvithi ya pyokoka yonkundana ombwanawa molwaashoka oya li ya tokola toko okulandula oshiholelwa shaJesus. — Iil. 4:13; 1 Pet. 2:21.
2. Jesus okwa li a longitha omikalo dhini okulonga aantu?
2 Omukalo gwaJesus gwokulonga: Elongo lye olya li epu naantu oya li taya vulu oku li uva ko nuupu. Omapulo nomathaneko ge nosho wo omafalomo ge oga li ga pendutha ohokwe maapulakeni ye. (Mat. 6:26) Okwa li e na ohokwe shili naantu. (Mat. 14:14) Jesus okwa li wo a popi neinekelo nonomukumo molwaashoka okwa li e shi shi kutya Jehova okwe mu pa elombwelo noonkondo a longe oshilonga she. — Luk. 4:18.
3. Jehova ohe tu kwathele ngiini tu gwanithe po uukalele wetu?
3 Jehova ohe tu kwathele: Okupitila mOohapu dhe nomehangano lye, Omulongi Omunenenene ohe tu pe edheulo ndyoka twa pumbwa opo tu pondole okuuvitha onkundana ombwanawa. (Jes. 54:13) Otatu vulu okukonakona nokuholela omukalo gwaJesus gwokulonga aantu molwaashoka Jehova okwe gu nyolitha moohapu dhe. Jehova ohe tu pe ombepo ye ondjapuki nohe tu dheula okupitila mokugongala kehe. (Joh. 14:26) Ohatu ilongo wo sho tatu longo pamwe naauvithi ya pyokoka mboka taya vulu oku tu kwathela tu kale aanekeka.
4. Omolwashike tu na omatompelo okulala tu uvite twa gwana okuuvithila yalwe onkundana ombwanawa?
4 Otu na omatompelo ogendji okukala tu uvite twa gwana okuuvitha molwaashoka ‘okuvula kwetu otaku zi kuKalunga.’ (2 Kor. 3:5) Molwaashoka otwi inekela muJehova nohatu longitha omasiloshimpwiyu ge gopahole, otatu ka ‘kala twa gwana twa pwa notwoopalela oshilonga kehe oshiwanawa.’ — 2 Tim. 3:17.