Kwathela ngoka tamu longo pamwe naye egumbo negumbo
1. Ohashi tu kwathele ngiini uuna tatu longo nagumwe muukalele?
1 Oshikando shimwe Jesus okwa li a tumu aalongwa ye 70 ye ku uvithe, ihe okwa li e ya tumu “ooyali nooyali.” (Luk. 10:1, KB) Shika osha li sha ningitha aalongwa ya kwathelathane noya ladhipikathane sho tayu uvitha. Ongiini tatu ka kwathela omuuvithi ngoka tatu longo pamwe naye muukalele?
2. Ongiini nomolwashike tu na okupulakena uuna ngoka tatu longo pamwe naye ta popi?
2 Pulakena: Endeka okutsi sho ngoka tamu longo pamwe naye muukalele ta popi. (Jak. 1:19) Landula mOmbiimbeli yoye uuna ta lesha enyolo. Kala nokutala kwaangoka ta popi, kutya nduno oongoka to longo pamwe naye nenge omunegumbo. Otashi vulu wo okuladhipika omunegumbo a pulakene nawa uuna to shi ningi.
3. Uunake tu na okukwathela ngoka tatu longo pamwe naye?
3 Ino kwata omupopi melaka: Uuna ngoka to longo pamwe naye oye e na olufo okupopya, natu mu ethele ompito ndjoka. (Rom. 12:10) Katu na oku mu kwata melaka. Ngele okwa dhimbwa shoka a li a hala okupopya nenge omunegumbo a pula epulo e te tu pula tu mu kwathele, otatu ka ninga oonkambadhala opo tu gwedhe pwaashoka a li ta popi, pehala lyokupopya oshinima shimwe shi ili. (Omayel. 16:23; Omuuv. 3:1, 7) Oohapu ndhoka tatu popi nadhi kale tadhi ambidhidha shoka tashi popiwa. — 1 Kor. 14:8.
4. Oshike tashi ke tu kwathela tu pondole notu nyanyukilwe uukalele wetu?
4 Sho aalongwa 70 mboka ya li taya longo ooyali nooyali ya galuka oya li yu “udha enyanyu.” (Luk. 10:17) Natse otatu ka kala twa nyanyukwa notatu ke shi pondola muukalele sho tatu pulakene, pehala lyokukwata omupopi melaka ngoka tatu longo pamwe naye.