“Oto vulu okuninga omukokolindjila te shi enditha nawa”
1. Omumwameme gumwe okwa li u uvitile ngiini iilonga yuukokolindjila?
1 Omumwameme Kathe okwa ti: “Inandi mona nando onale iilonga mbyoka tayi vulu okweetela ndje enyanyu nenge omayambeko gopambepo ya fa uukokolindjila.” Okwa kala nokulonga e li omukokolindjila uule woomvula odhindji miilongo ngaashi Chile, South America nayilwe. Omolwomayambeko ngoka hage endele pamwe niilonga yethimbo lyuudha, otashi vulika gumwe e ku lombwele ta ti: “Oto vulu okuninga omukokolindjila te shi enditha nawa.”
2. Yelitha kutya omolwashike iilonga yopambepo hayi tu etele enyanyu olindji.
2 Onkalamwenyo tayi mbilipaleke: Jesus ngoka e li oshiholelwa shetu okwa li a mono enyanyu lyashili mokulonga ehalo lyaHe. (Joh. 4:34) Okwa lombwele aalanduli ye kutya enyanyu lyashili ohali zi mokulonga iilonga yaJehova. Ohatu kala twa mbilipalelwa uuna tatu kutha ombinga miilonga mbyoka Jehova a hokwa. Sho tatu longitha ethimbo lya gwana, oonkondo dhetu niiniwe yetu okukwathela yalwe, otashi ke tu etela enyanyu olindji. — Iil. 20:31, 35.
3. Enyanyu lini tatu ka mona ngele tatu longitha ethimbo lya gwana muukalele?
3 Otatu ka mona enyanyu olindji ndyoka hali zi mokutameka omakonakonombiimbeli nokuga ninga uuna tatu longitha ethimbo lya gwana muukalele. Nokuli nomiitopolwa moka aantu ya fa kaaye na ohokwe otatu ka mona kutya omuna aantu haya pulakene nawa sho tatu ende tatu mono ontseyo nowino oyindji muukalele. Aakokolindjila otaya vulu okulongitha ontseyo ndjoka haya mono mOsikola yuukokolindjila hoka haya yi ngele ya longo iilonga yuukokolindjila uule womvula yimwe. (2 Tim. 2:15) Ngele tatu dhiginine, otatu kunu oombuto dhoshili ndhoka tadhi ke eta iiyimati konima yethimbo. — Omuuv. 11:6.
4. Aagundjuka oye na okudhiladhila kombinga yashike uuna ye li pokumana osikola?
4 Aagundjuka: Mbela owa dhiladhila nale shoka to ka ninga ngele owa mana osikola? Ngashingeyi ethimbo lyoye olindji oho li longitha miilonga yoye yosikola. Oto ka longitha ngiini ethimbo ndyoka ngele wa mana? Pehala lyokulonga iilonga yokwiikongela omboloto ethimbo lyu udha, omolwashike itoo galikana wa mana mo wu lalakanene uukokolindjila wondjigilile? Ontseyo ndjoka to mono sho to uvithile aantu yomomaputuko gi ili nogi ili otayi ke ku kwathela monkalamwenyo yoye ayihe wu kale wu shi okuungaunga nomaupyakadhi, wu kale neipangelomwene nowu kale wu na uunkulungu wokulonga aantu.
5. Ongiini aavali naakwanegongalo taya vulu okuladhipika aagundjuka ya ye muukokolindjila?
5 Aavali, mbela ohamu ladhipike ngaa oyana yeni ya lalakanene iilonga yethimbo lyu udha? Oohapu dheni niiholelwa yeni iiwanawa otayi ke ya kwathela ya pitithe komeho iinima yUukwaniilwa. (Mat. 6:33) Ray ngoka a tameke okukokola ondjila konima sho a mana osikola okwa ti: “Meme okwa li ha lombwele ndje aluhe kutya uukokolindjila ohawu kwathele omuntu a kale e na ombili monkalamwenyo.” Ayehe megongalo otaya vulu okutsa omukumo aakokolindjila noku ya ambidhidha. Jose gwokuSpain okwa ti: “Aantu megongalo lyetu oya tala ko uukokolindjila wu li eithano dhingi ndyoka tali opalele aagundjuka. Osha li oshipu kungame okuya muukokolindjila omolwolupandu nosho wo omakwatho gawo.”
6. Oshike tatu vulu okuninga ngele katu na ehalo lyokukokola ondjila ngashingeyi?
6 Sinda iiyimbi: Ongiini ngele oto ti: ‘Kandi na ohokwe yuukokolindjila.’ Ngele osho wu uvite ngawo, galikana kuJehova nkene wu uvite e to mu lombwele to ti: ‘Kandi shi wo ngele ote vulu okuninga omukokolindjila, ihe onda hala okulonga shoka tashi ku opalele.’ (Eps. 62:8; Omayel. 23:26) Konima yaashoka tala kutya Oohapu dhe nehangano lye otali ti ngiini. Aakokolindjila yondjigilile oyendji ohaya “makele” uukokolindjila mokukutha uukwathelikokolindjila, nenyanyu ndyoka haya mono ohali yi inyengitha opo ye wu ninge eithano lyawo. — Eps. 34:8.
7. Oshike tashi ke ku kwathela uuna wu wete kutya ito ka gwanitha po oowili 70 momwedhi?
7 Oshike wu na okuninga ngele owu wete kutya ito vulu okugwanitha po oowili 70 momwedhi? Omolwashike itoo popi naakokolindjila mboka ye li moonkalo dha fa dhoye? (Omayel. 15:22) Konima yaashoka, ninga omathaneko nkene to ke shi enda. Otashi vulika wu ka mone kutya oshipu okulongitha nawa ethimbo ndyoka tu na muukalele, pehala lyoku li longitha miinima mbyoka kaayi na oshilonga. — Ef. 5:15, 16.
8. Omolwashike tu na okukala hatu konakona oonkalo dhetu ethimbo nethimbo?
8 Konakona oonkalo dhoye: Olundji oonkalo dhaantu ohadhi ende tadhi lunduluka. Oshi li nawa wu dhi konakone ethimbo nethimbo. Pashiholelwa, mbela owu li pokuya moshipundi shevululuko? Randy ngoka a zi miilonga omanga inaa adha okupenzelwa okwa ti: “Etokolo lyandje olya li lya kwathele ndje ndi vule okutameka uukokolindjila wondjigilile nomukulukadhi gwandje, noshe tu pa ompito yokuya tu ka longe kiitopolwa hoka ku na ompumbwe onene. Etokolo ndika olye etela ndje omayambeko ogendji, ihe eyambeko enene li vule agehe olyo okukala neiyuvo lya yela.”
9. Aaihokani oye na okukonakona shike?
9 Aaihokani yamwe sho ya konakona nawanawa oonkalo dhawo oye shi mona kutya ayehe inaya pumbwa okukala haya longo esiku alihe. Odhoshili kutya otashi vulika uukwanegumbo wu kaleke onkalamwenyo yawo ya nathangwa, ihe nonando ongaaka oshi li eiyambo ewanawa. John ngoka omukulukadhi gwe e etha po iilonga opo a tamunune mo uukalele we, okwa ti: “Ohandi kala nda nyanyukwa omolwomukulukadhi gwandje ngoka ha kala i ipyakidhila miilonga yaJehova esiku kehe.”
10. Oshike tashi kwathele Aakriste ya kaleke momadhiladhilo iilonga yuukokolindjila?
10 Ulika ohole neitaalo: Iilonga yokuuvitha mbyoka Jehova e tu pa oyo dhingi. Onkalelo ndjika oyi li pokuhanagulwa po, ihe mboka tayi ithana edhina lye oyo owala taya ka hupithwa. (Rom. 10:13) Ngele otu mu hole shili notu na olupandu lwaashoka e tu ningila otashi ke tu inyengitha tu vulike kelombwelo lyOmwana tu uvithe nehwamo. (Mat. 28:19, 20; 1 Joh. 5:3) Okukala twi itaala kutya otu li momasiku gahugunina shili otashi ke tu inyengitha tu ninge ngaashi tatu vulu muukalele omanga tu na ethimbo, pehala lyokulalakanena iinima yuuyuni mbuka. — 1 Kor. 7:29-31.
11. Oto ke shi tala ko ngiini uuna gumwe te ku lombwele kutya oto vulu okuninga omukokolindjila?
11 Uukokolindjila wondjigilile kawu shi owala ethimbo lyokulonga oowili odhindji muukalele, ihe owu li euliko kutya owu hole Kalunga. Ngele gumwe te ku lombwele kutya oto vulu okuninga omukokolindjila, omuntu ngoka ote ku tumbaleke. Onkee ano, galikana opo wu wayimine mboka ye li nale miilonga mbyoka tayi nyanyudha Kalunga.
[Oohapu dha simana pepandja 4]
Aavali mbela otamu kwathele ngaa oyana yeni ya ye miilonga yethimbo lyu udha?
[Oohapu dha simana pepandja 5]
Iilonga yokuuvitha mbyoka Jehova e tu pa oyo dhingi kiilonga ayihe yilwe.