Otatu ka gandja uunzapo uuwanawa pEdhimbuluko
1. Kakele owala koshipopiwa, oshike ishewe tashi vulika shi kumithe aayenda mboka ta ye ya kEdhimbuluko? Shi yelitha.
1 Ongulohi ndjoka tatu ka kala tu na Edhimbuluko otatu ka gandja uunzapo uuwanawa. Otwa ninga oonkambadhala odhindji tu hiye aantu ye ye ya gongale pamwe natse mesiku ndyoka. Mboka twa hiya itaya ka kala owala ya kumwa kwaashoka ta ye ku uva. Omukiintu gumwe ngoka a li a kala pEdhimbuluko, okwa popi kombinga yiinima yontumba kondandalunde mbyoka a mono a ti kutya aantu oya li aanambili notaya monika nawa, etungo olya tungwa kaaiyambi, ihe olya yela nohali silwa oshimpwiyu nawa. Kakele owala komugandji gwoshipopiwa, atuheni natu gandjeni uunzapo uuwanawa poshiningwanima shokomumvo shika sha simana. — Ef. 4:16.
2. Ongiini kehe gumwe gwomutse ta vulu okugandja uunzapo kaayenda?
2 Popitha aayenda nohamu: Otatu ka gandja uunzapo uuna tatu popitha aayenda tatu imemeha. (Joh. 13:35) Nonando otashi vulika ito ka vulu okupopitha kehe gumwe, oto vulu okupopya nohamu naamboka ye li popepi nangoye nokuya lombwela kutya ongoye lye. (Heb. 13:1, 2) Tala ngele pEdhimbuluko opu na yamwe mboka ye ya, ihe otaya monika ya fa kaaye na ngoka ye shi po. Otashi vulika ya li ya pewa okambapila kehiyo pethimbo lyoshikonga. Oto vulu oku ya pula: “Mbela osho oshikando shotango to gongala pamwe natse?” Kala omutumba pamwe nayo, nokuyamukula omapulo ngoka tashi vulika ye na. Ngele egongalo lyeni oli na okuza mo nziya mOshinyanga opo li gandja ompito kegongalo lilwe, oto vulu okupula to ti: “Okugongala okwa li ngiini? Mbela oto vulu okupandje ongodhi yoye ndi kwatathane nangoye?”
3. Ongiini tatu vulu okuhambelela aauvithi mboka inaayi ipyakidhila we?
3 Hambelela mboka inaayi ipyakidhila uuna ye ya kEdhimbuluko: Nopwaahe na omalimbililo, aauvithi mboka inaayi ipyakidhila opo ye na okukala, mwa kwatelwa mboka ha ye pEdhimbuluko omumvo kehe. Ya hambelela noku yu ulukila kutya owa nyanyukwa noonkondo oku ya mona. (Rom. 15:7) Konima yaashoka aakuluntugongalo otaya vulu oku ke ya talela po nziya komagumbo gawo noku ya ladhipika ya kale haya gongala. Otwa halelela opo aakalipo oyendji yi inyengithwe ya simaneke Kalunga, itaye shi ningi owala molwaashoka yu uva iinima iiwanawa, ihe ‘omolwomikalo dhetu omiwanawa’ ndhoka ye wete. — 1 Pet. 2:12.