“Uuyelele weni nau yele”
1. Otu na uuthembahenda wokuninga shike?
1 Uuyelele mboka hatu mono okuza pepito lyetango sigo opokuningina kwalyo ohawu simanekitha Jehova Kalunga. Ihe Jesus okwa li a ladhipike aalongwa ye ya kale ye na uuyelele wulwe, sha hala okutya, ‘uuyelele womwenyo.’ (Joh. 8:12, KB) Okukala tu na uuyelele mbuka wopambepo oku li uuthembahenda wi ikalekelwa mboka wa kwatela mo iinakugwanithwa ya kwata miiti. Jesus okwa ti: “Uuyelele weni nau yele montaneho yaantu,” shoka tashi kwathele yalwe ya mone uuwanawa. (Mat. 5:16) Aantu oyendji kunena oye li momilema thokothoko dhopambepo, noya pumbwa okuminikilwa unene shi vulithe nale. Mbela ongiini uuyelele wetu tawu vulu okuyela, ngaashi waKristus?
2. Jesus okwa li u ulike ngiini kutya osha simana okweetha uuyelele wopambepo wu minikile yalwe?
2 Okupitila mokuuvitha: Jesus okwa li a longitha ethimbo lye, oonkondo dhe, iiniwe ye opo a tseyithile aantu momagumbo gawo, momahala gaayehe, koondungu dhoondundu nosho wo kehe mpoka a li e ya adha oshili yuuyelele wopambepo. Okwa li e shi kutya osha simana okutseyithila aantu uuyelele woshili yopambepo. (Joh. 12:46) Opo aantu oyendji yu uvithilwe ngaashi tashi vulika, Jesus okwa li a dheula aalongwa ye ya kale “uuyelele wuuyuni.” (Mat. 5:14) Uuyelele wawo owa li owala tawu minikile ngele taya ningile aantu ooyakwawo uuwanawa noku ya uvithila ooshili dhopambepo.
3. Ongiini tatu vulu okuulika kutya otwa pandula shili uuyelele woshili yopambepo?
3 Aapiya yaKalunga oya tala ko oshinakugwanithwa ‘shokukala ngaashi aantu yuuyelele’ sha kwata miiti, nomolwaashoka ohaya uvithile aantu kehe mpoka taya adhika. (Ef. 5:8) Ngele owa kala ho lesha Ombiimbeli nenge iileshomwa yilwe ya kankamena kuyo montaneho yaantu, uuna wu li pokafudho kiilonga nenge kosikola otashi vulika wu tameke oonkundathana dhopambiimbeli nagumwe. Omumwameme gumwe omugundjuka okwa li a ningi ngaaka, nosha li she mu ningitha a tameke ekonakonombiimbeli kosikola nokwa li a pe aanasikola yomongundu yawo omambo 12.
4. Omolwashike okweetha ‘uuyelele wetu wu yele’ kwa kwatela mo eihumbato lyetu?
4 Okupitila meihumbato lyetu ewanawa: Uuyelele wetu owu na wo okukala wi iwetikile momukalo moka hatu ihumbata kehe siku. (Ef. 5:9) Aantu yalwe ohaye shi mono kutya Aakriste ohayi ihumbata nawa kiilonga, koosikola nosho wo pomahala gaayehe, naashoka ohashi ya kwathele opo ya vule okuuvitha ooshili dhOmbiimbeli. (1 Pet. 2:12) Pashiholelwa, eihumbato ewanawa lyokamati komimvo ntano olya li lyi inyengitha omulongi gwako a dhengele ongodhi aavali yako omolweihumbato lyako ewanawa. Omulongi okwa ti: “Inandi mona nando onale okanona ke thike mpoka ke shi kutya osha simana noonkondo okuninga shoka shu uka.” Eeno, uukalele wetu nosho wo eihumbato lyetu ewanawa ohayi hilile aantu ‘kuuyelele womwenyo,’ nohayi simanekitha Kalunga ketu.