Iifo yetu oya nuninwa okukwathela aantu yomaludhi agehe
1. Ongundu yomupiya omudhiginini nomunandunge ohayi holele ngiini omuyapostoli Paulus?
1 Ngaashi owala omuyapostoli Paulus a li ha lundulula omikalo dhe dhokuuvitha onkundana ombwanawa opo a hupithe ‘ayehe,’ omupiya omudhiginini nomunandunge oha longitha iifo yetu opo a adhe aantu yomomaputuko nomaitaalo ga yoolokathana. (1 Kor. 9:22, 23) Opo tu gandje nawa oshifo shetu shOshungolangelo no-Awake! otu na okukala tu shi kutya oshifo shoka osha nyolelwa aantu yeni.
2. Oshifo sho-Awake! osha nuninwa unene aantu yeni?
2 O-Awake!: Elalakano lyoshifo shika olyo okwaadha aantu mboka ya fa ‘aalumentu Aayatena’ mboka ya li yu uvithilwa kuPaulus. (Iil. 17:22) Aalumentu mboka kaya li Aakriste mokuputuka kwawo, noya li ye na ontseyo onshona yOmanyolo. Oshifo sho-Awake! osha nuninwa wo aaleshi mboka ye na ontseyo onshona naamboka kaaye na ontseyo yasha yOmbiimbeli. Otashi vulika ya kale kaaye na sho ye shi kombinga yomalongo gopaKriste, notashi vulika ya kale ya limbililwa iinima yontumba mbyoka hayi ningwa komalongelokalunga nenge kaaye shi kutya Ombiimbeli oyi na omayele ge na oshilonga. O-Awake! oya nuninwa unene tuu okutompa aaleshi ya mone kutya Kalunga oko e li shili. Elalakano lyayo okukwathela aantu ya kale yi itaala Ombiimbeli nosho wo yu uve ko kutya Oonzapo dhaJehova odha yooloka ko komalongelokalunga galwe.
3. Elalakano lyOoshungolangelo dhetu mbali olyashike?
3 Oshungolangelo: Oshifo shOshungolangelo shomuukalele osha nuninwa aantu mboka ya simaneka ngaa Kalunga nosho wo Ombiimbeli. Oye na ontseyo yontumba yOmbiimbeli, ihe kayu uvite ko naanaa omalongo gwayo gashili. Oya fa aapulakeni mboka Paulus a li a popi kutya ohaya “tila Kalunga.” (Iil. 13:14-16, KB) Oshungolangelo yokukonakonwa oya nuninwa unene tuu Oonzapo dhaJehova. Paulus okwa li i inekela kutya mboka taya ka lesha oontumwafo dhe oye shi Omanyolo noye shi nawa oshili. (1 Kor. 1:1, 2) Oshifo shokukonakonwa osha nuninwa wo mboka haya kala pokugongala kwetu noye shi omalongo nomautumbulilo ngoka Oonzapo dhaJehova hadhi longitha.
4. Omolwashike twa pumbwa okukala tu shi oshikalimo shoshifo kehe shoka tatu longitha muukalele?
4 Nonando olundji ohatu gandja Oshungolangelo no-Awake! oshita ohatu ningi owala efalomo lyoshifo shimwe. Onkee ano, natu itulile po elalakano tu kale tu shi oshikalimo shoshifo kehe. Shoka otashi ke tu kwathela tu ulukile kehe gumwe ngoka tatu ka tsakaneka oshitopolwa shoka tashi mu opalele.