Jehova ote tu dheulile oshilonga shika
1. Uuna Jehova ta pe aantu oshilonga, oha ningi wo shike?
1 Uuna Jehova ta pe aantu oshilonga, ohe ya pe wo ekwatho ndyoka ya pumbwa opo ya vule oku shi mana. Pashiholelwa, sho a lombwele Noowa a tunge onguluwato, oshilonga shoka a li inaa longa nando onale, Jehova okwa li wo e mu lombwele nkene e na oku yi tunga. (Gen. 6:14-16) Sho Moses omusita gwoonzi omwiifupipiki a li a tumwa a ye kaawiliki yaIsraeli nosho wo kuFarao, Jehova okwe mu shilipaleke a ti: “Otandi ke ku popitha notandi ku lombwele shoka to ka tya.” (Eks. 4:12) Ngele tashi ya poshilonga shetu shokuuvitha onkundana ombwanawa, Jehova ohe tu lombwele wo nkene tu na oku shi ninga. Ohe tu dheulile oshilonga shika okupitila mOsikola yUukalele woPauteokratika nosho wo pOkugongala kwoPailonga. Ongiini tatu vulu okumona uuwanawa medheulo ndika?
2. Ongiini to vulu okumona uuwanawa mOsikola yUukalele woPauteokratika?
2 Osikola yUukalele woPauteokratika: Omanga inoo ya kokugongala ilongekidha iitopolwa ayihe. Ngele to shi ningi, ontseyo yoye yokulonga aantu otayi ka koka sho to mono nkene aanasikola taya longitha uuyelele mboka miipopiwa yawo. (Omayel. 27:17) Kala ho ya aluhe kokugongala nembo lyoye Ofikola yOukalele. Sho omutonateli gwosikola te li longitha konima yoshipopiwa kehe mosikola, ndhindhilika iitsa ya simana mbyoka wu na okutula miilonga, nokulongitha ehala ndyoka li li pooha dhepandja kehe wu nyole omaidhimbulukitho. Opo wu mone uuwanawa mosikola, kala ho kutha ombinga muyo. Mbela owi inyolitha ngaa wu kale ho gandja iipopiwa mosikola? Uuna wa pewa oshipopiwa ilongekidha nawa komeho yethimbo nokutula miilonga omayele ngoka to pewa. Kala ho tula miilonga shoka to ilongo mosikola uuna wu li muukalele.
3. Oshike tashi tu kwathele tu mone uuwanawa mOkugongala kwoPailonga?
3 Okugongala kwoPailonga: Otatu ka dhimbulukwa nuupu omaetopo ngoka ga ningwa pokugongala hoka ngele ohatu ku ilongekidhile komeho yethimbo opo tu ka ninge omatyokosha. Oyendji otaya ka kutha ombinga ngele tatu ningi omatyokosha ge li paufupi. Gandja eitulomo komauliko e to tula miilonga omaetopo ngoka wu wete unene tage ke ku kwathela muukalele. Pungula okafo koye Uukalele Wetu wUukwaniilwa opo wu vule oku ka longitha monakuyiwa.
4. Omolwashike tu na okulongitha nawa edheulo lyoPauteokratika ndyoka hatu pewa?
4 Oshilonga shetu shokuuvitha onkundana ombwanawa kevi alihe ekaliwa oshi li eshongo, sha fa owala oshilonga shoka sha li sha pewa Noowa nosho wo Moses. (Mat. 24:14) Otatu ka pondola owala ngele otwi inekela thiluthilu muJehova, Omulongi Omunenenene nokutula miilonga edheulo ndyoka he tu pe. — Jes. 30:20.