Oshimpungu shomapulo

◼ Mbela otu na okugalikana ethimbo kehe uuna tatu konakona Ombiimbeli nagumwe?

Okutameka nosho wo okuhulitha ekonakonombiimbeli negalikano oshi na omauwanawa ogendji. Okupitila megalikano ohatu pula Jehova e tu pe ombepo ye ondjapuki sho tatu konakona. (Luk. 11:13) Ohali kwathele wo omukonakonimbiimbeli a kale e shi okugalikana noku mone kutya ota ningi oshinima shi ikalekelwa. (Luk. 6:40) Onkee ano, osha simana okutameka negalikano. Kakele kaashono, ngoka ta ningi ekonakono oku na okulongitha oondunge dhokuyoolola a tale ngele oku na okugalikana ethimbo kehe uuna ta konakona Ombiimbeli nagumwe.

Osha simana tu tale tango kehala mpoka ekonakono hali ningilwa. Ngele ohali ningilwa pehala mpoka pu na omainyengo gaantu ogendji, oshi li nawa okugalikana paufupi komeho nokonima yekonakonombiimbeli. Ihe ngele oku shi ninga ohaku ningitha aantu ya kale ya limbililwa nenge omukonakonimbiimbeli oha kala inaa manguluka nawa sho tashi ningwa, oshi li nawa wu tegelele sigo mwa mono ehala li imwenenena. Kutya nduno ekonakonombiimbeli ohali ningilwa peni, otu na okulongitha oondunge dhokuyoolola tu tale kutya ethimbo lini tali opalele okugalikana. — Tala Uukalele Wetu wUukwaniilwa wOshiingilisa waMaalitsa 2005, epandja 4.