Mbela oho ningi ngaa oonkambadhala wu mone uuwanawa melongo ndyoka Jehova he tu pe?

1. Jehova elongo okwe li tala ko ngiini?

¹ Omulongi gwetu Omunenenene Jehova, okwa hala ‘oku tu longa’. (Jes. 30:20) Okwa li a tameke nelongo ndyoka okuza owala sho a shiti Omwana omutango gwiishitwa ayihe. (Joh. 8:28) Konima sho Adam a li a yono, Jehova okwa tsikile okulonga nohole aantu inaaya gwanenena. — Jes. 48:17, 18; 2 Tim. 3:14, 15.

2. Oshikonga oshinenenene shini shokulonga aantu tashi ningwa kunena?

² Kunena Jehova ota wilike oshikonga oshinenenene shokulonga aantu shoka inaashi ningwa nando onale mondjokonona. Ngaashi sha hunganenkwa kuJesaya aantu omamiliyona muuyuni auhe otaya mbombolokele ‘kondundu yopathaneko hoka kwa tungilwa otempeli’ yaJehova. (Jes. 2:2) Otaya ka tala ko shike? Otaya ka longwa kuJehova oondjila dhe. (Jes. 2:3) Momumvo gwiilonga 2010, Oonzapo dhaJehova odha longo oowili dhi vulithe pebiliyona 1,6 okuuvithila nokulonga aantu oshili yOmbiimbeli. Kakele kaashono, momagongalo ge vulithe po 105 000 aantu ohaya longwa oohapu dhaKalunga oshiwike kehe muuyuni auhe, nomupiya omudhiginini nomunandunge oha nyanyangidha iileshomwa yelongo lyopaKriste momalaka ge vule po 500.

3. Owa mona mo uuwanawa wuni melongo ndyoka Jehova e tu pa?

³ Mona mo uuwanawa owindji: Otwa mona uuwanawa owindji noonkondo melongo ndika lyopakalunga. Otwi ilonga kutya Kalunga oku na edhina noku na ko nasha natse. (Eps. 83:18; 1 Pet. 5:6, 7) Otwa mona omayamukulo komapulo ngoka ga simanenena monkalamwenyo ngaashi: Omolwashike aantu haya si nohaya mono iihuna? Ongiini tatu vulu okumona enyanyu lyashili monkalamwenyo? Elalakano lyonkalamwenyo olini? Jehova okwe tu pa oohapu dhe opo tu vule ‘okuninga aasindani naanelago.’ — Jos. 1:8.

4. Oompito dhini tu na dhokulongwa kuJehova, nomolwashike tu na okweetha tu longwe kuye?

⁴ Kakele kwaambyoka ya tetekele, Jehova ota wilike elongo lyi ikalekelwa opo a kwathele aapiya ye oyendji ya vule okulonga iilonga ye ya mana mo. Dhimwe dhomoompito dhelongo ndyoka odha popiwa pepandja 4-6. Nonando onkalo yoye itayi ku pitike wu kuthe ombinga muyimwe yomoompito ndhika, mbela oho kutha ngaa ombinga mu dhilwe ndhoka to vulu okukutha ombinga mudho opo wu mone uuwanawa wi ihwa po melongo lyopakalunga? Olundji aagundjuka ohaya ladhipikwa kaalongi yawo nokuyalwe ya lalakanene elongo lyopombanda lyomuuyuni. Mbela ohatu ya ladhipike ngaa yi itulile po omalalakano gopambepo nokulalakanena elongo lyopakalunga ndyoka li li elongo lyopombandeelela? Ngele otwe etha tu kale tatu longwa kuJehova otatu kala tu na onkalamwenyo yi na elago ngashingeyi notatu ka mona omwenyo gwaaluhe monakuyiwa. — Eps. 119:105; Joh. 17:3.

Dhimwe dhomoompito dhokulongwa kuJehova ndhoka hadhi gandjwa kehangano lye

Ootundi dhokwiilonga okulesha nokunyola

• Elalakano: Okulonga aantu okulesha nokunyola opo ya kale taya vulu okulesha nokukonakona Ombiimbeli kuyo yene nosho wo okulonga yalwe oshili.

• Ethimbo ndyoka hadhi kutha: Oshi ikwatelela kompumbwe ndjoka yi li po.

• Ehala: Oshinyanga shUukwaniilwa shomoshitopolwa.

• Mboka taya vulu okukala po: Auvithi ayehe nakehe ngoka e na ohokwe.

• Nkene to vulu okuninga eindilo: Aakuluntugongalo oyo haya longekidha ootundi ndhika shi ikwatelela kompumbwe moshitopolwa sheni nohaya ladhipike ayehe mboka taya vulu okumona mo uuwanawa ya kale po.

Osikola yUukalele woPauteokratika

• Elalakano: Okudheula aauvithi opo ya kale taye shi enditha nawa miilonga yokuuvitha onkundana ombwaanawa.

• Ethimbo ndyoka hayi kutha: Otayi tsikile.

• Ehala: Oshinyanga shUukwaniilwa shomoshitopolwa.

• Mboka taya vulu okwiinyolitha: Aauvithi ayehe nakehe ngoka ha kala po pokugongala kwOonzapo dhaJehova ngoka onkalamwenyo ye yi li metsokumwe nomithikampango dhopaKriste nokwa taamba ko shoka Ombiimbeli tayi ti.

• Nkene to vulu okuninga eindilo: Kwatathana nomuunganeki gwosikola ndjoka.

Ootundi dhokwiilonga elaka ekwiilongo

• Elalakano: Okulonga aauvithi opo ya vule okuuvitha melaka ekwiilongo.

• Ethimbo ndyoka hadhi kutha: Oomwedhi ne nenge ntano. Olundji ootundi ohadhi ningwa ongula mOlyomakaya owili yimwe nenge mbali.

• Ehala: Olundji opOshinyanga shUukwaniilwa shomoshitopolwa.

• Mboka taya vulu okwiinyolitha: Aauvithi mboka ya hala okuuvitha melaka ekwiilongo noye na ekwatathano ewanawa naJehova.

• Nkene to vulu okuninga eindilo: Ootundi ohadhi longekidhwa koshitayimbelewa shi ikwatelela kompumbwe.

Okutunga Iinyanga yUukwaniilwa

• Elalakano: Okutunga nokwoopalekulula Iinyanga yUukwaniilwa. Nonando ndjika kayi shi osikola, aaiyambi oyendji ohaya longwa iinima yi ili noyi ili opo ya vule okukwathela miilonga yokutunga.

• Ethimbo ndyoka haku kutha: Oshi ikwatelela kethimbo ndyoka omwiiyambi e na.

• Ehala: Kehe mpoka pu na okutungwa kOkomitiye yOkutunga yomOshitopolwa. Nenge okulonga kehe mpoka pu na ompumbwe nayimwe yomOongundu dhOkutunga Iinyanga yUukwaniilwa kohi yetonatelo lyoshitayimbelewa sheni.

• Iitegelelwa: Aamwatate naamwameme ya ninginithwa notaya popilwa nawa kaakuluntugongalo, kutya nduno oye na uunongo wokutunga nenge kaye na.

• Nkene to vulu okuninga eindilo: Udhitha ofooloma Kingdom Hall Volunteer Worker Questionnaire (S-82) ndjoka hayi udhithwa kukehe ngoka a hala okulonga nOkomitiye yOkutunga mOshitopolwa, tayi adhika komukuluntugongalo kehe megongalo lyeni. Udhitha ofooloma Application for Kingdom Hall Construction Volunteer Program (A-25) ngele oto ka vula okulonga esiku kehe uule womwedhi gumwe nenge dhi vulithe po.

Osikola yAakokolindjila

• Elalakano: Okukwathela aakokolindjila ya ‘gwanithe po ayihe mokulongela Kalunga.’ — 2 Tim. 4:5.

• Ethimbo ndyoka hayi kutha: Iiwike iyali.

• Ehala: Ohashi tokolwa koshitayimbelewa, ihe olundji opOshinyanga shUukwaniilwa moshitopolwa.

• Iitegelelwa: Mboka ye li aakokolindjila yondjigilile uule womvula yimwe.

• Nkene to vulu okwiinyolitha: Aakokolindjila mboka ya gwanitha po iitegelelwa ohaya hiywa komutonatelishikandjo.

Osikola yAabetel Aape

• Elalakano: Osikola ndjika oya nuninwa okukwathela aabetel aape opo ya vule okugwanitha po nawa iilonga yawo.

• Ethimbo ndyoka hayi kutha: Owili yimwe moshiwike kehe, uule wiiwike 16.

• Ehala: Betel.

• Iitegelelwa: Omuntu oku na okukala oshilyo shaBetel nenge omwiiyambi gwopakathimbo ngoka ta kwathele uule womvula yimwe nenge dhi fulithe po.

• Nkene to vulu okwiinyolitha: Iilyo yuukwanegumbo waBetel mboka ya gwanitha po iitegelelwa oyo haya hiywa.

Osikola yUukalele wUukwaniilwa

• Elalakano: Okudheula aakuluntugongalo naayakuligongalo ya kale haya vulu okusila oshimpwiyu egongalo nosho wo iinakugwanithwa yilwe mehangano. (Iil. 20:28) Osikola ndjika ohayi ningwa omalupita konima yoomvula dhontumba shi ikwatelela ketokolo lyOlutuwiliki.

• Ethimbo ndyoka hayi kutha: Moomvula opo dha piti aakuluntugongalo oya kala haya kala po esiku netata omanga aayakuligongalo haya kala po esiku limwe.

• Ehala: Olundji opOshinyanga shUukwaniilwa nenge pOshinyanga shIigongi.

• Iitegelelwa: Omuntu oku na okukala omukuluntugongalo nenge omuyakuligongalo.

• Nkene to vulu okwiinyolitha: Aakuluntugongalo naayakuligongalo mboka ya gwanitha po iitegelelwa ohaya hiywa komutonatelishikandjo.

Osikola yAakuluntugongaloa

• Elalakano: Okukwathela aakuluntugongalo ya vule okugwanitha po iinakugwanithwa yawo megongalo.

• Ethimbo ndyoka hayi kutha: Omasiku gatano.

• Ehala: Ohashi tokolwa koshitayimbelewa ihe olundji opOshinyanga shUukwaniilwa nenge pOshinyanga shIigongi.

• Iitegelelwa: Omuntu oku na okukala omukuluntugongalo.

• Nkene to vulu okwiinyolitha: Oshitayimbelewa ohashi hiya aakuluntugongalo mboka ya gwanitha po iitegelelwa.

Osikola yAatonateli Aayendi nAakulukadhi Yawob

• Elalakano: Okukwathela Aatonatelishikandjo nAatonateli yIitopolwa ya vule okusila nawa oshimpwiyu omagongalo ‘nohaa ihepeke mokuuvitha nomokulonga aantu’ mboka ye li mesiloshimpwiyu lyawo. — 1 Tim. 5:17; 1 Pet. 5:2, 3.

• Ethimbo ndyoka hayi kutha: Oomwedhi mbali.

• Ehala: Oshitayimbelewa osho hashi tokola.

• Iitegelelwa: Omuntu na kale Omutonatelishikandjo nenge Omutonateli gwOshitopolwa.

• Nkene to vulu okwiinyolitha: Oshitayimbelewa osho hashi hiya aatonateli aayendi mboka ya gwanitha po iitegelelwa naakulukadhi yawo.

Osikola yOmbiimbeli yOkudheula Aamwatate Inaaya Hokanac

• Elalakano: Okudheula aakuluntugongalo nosho wo aayakuligongalo mboka inaaya hokana opo ya pewe ishewe iinakugwanithwa yilwe. Oyendji pehulilo lyosikola ohaya tuminwa ya ka longe komahala hoka ku na ompumbwe yaauvithi miilongo yawo. Yamwe ohaya tumwa kiilongo yilwe ngele oya tseyithile oshitayimbelewa kutya oyi ilongekidha oku shi ninga.

• Ethimbo ndyoka hayi kutha: Oomwedhi mbali.

• Ehala: Oshitayimbelewa osho hashi tokola, ihe olundji opOshinyanga shUukwaniilwa nenge pOshinyanga shIigongi.

• Iitegelelwa: Aamwatate inaaya hokana mboka ye li pokati koomvula 23 no 69, ye na uukolele noya hala okukwathela megongalo nosho wo okuhumitha komeho iilonga yokuuvitha. (Mark. 10:29, 30) Naya kale aakuluntugongalo nenge aayakuligongalo uule womvula mbali nenge dhi vule po.

• Nkene to vulu okuninga eindilo: Piigongi yoshikandjo ohapu kala okugongala kwaamboka ya hala okuya kosikola ndjika, ngele oshitayimbelewa sheni ohashi yi unganeke. Uuyelele wa gwedhwa po ohawu gandjwa pokugongala huka.

Osikola yOmbiimbeli yOkudheula Aaihokani Aakristed

• Elalakano: Okudheula aaihokani ya vule okulongithwa kuJehova nokehangano lye. Oyendji ngele ya piti mosikola ndjika ohaya ka longa komahala hoka ku na ompumbwe yaauvithi moshilongo shawo. Yamwe ohaya tumwa kiilongo yilwe ngele oya tseyithile oshitayimbelewa kutya oyi ilongekidha oku shi ninga.

• Ethimbo ndyoka hayi kutha: Oomwedhi mbali.

• Ehala: Ootundi dhotango odha tameka nale ko Watchtower Educational Center in Patterson, New York, U.S.A. Otayi ka andjaganekelwa miitopolwa yilwe shi ikwatelela ketokolo lyoshitayimbelewa notayi ka kala hayi ningilwa unene tuu pOshinyanga shUukwaniilwa nenge pOshinyanga shIigongi.

• Iitegelelwa: Aaihokani mboka ye li pokati komimvo 25 no 50, ye na uukolele notaya vulu oku ka longa komahala hoka ku na ompumbwe yaauvithi noye na ompepo yeiyambo yokutya “otandi yi! Tuma ndje!” (Jes. 6:8) Naya kale ya hokana uule woomvula mbali nenge dhi vule po noye li miilonga yethimbo lyu udha uule woomvula mbali nenge dhi vule po.

• Nkene to vulu okuninga eindilo: Piigongi yesiku lyi ikalekelwa ohapu kala okugongala kwaamboka ya hala oku ya kosikola ndjika, ngele oshitayimbelewa sheni ohashi yi unganeke. Uuyelele auhe ohawu gandjwa pokugongala huka.

Osikola yOmbiimbeli yoWatchtower yaGilead

• Elalakano: Okudheula aakokolindjila naapiya yalwe yethimbo lyuudha ya ninge aatumwa.

• Ethimbo ndyoka hayi kutha: Oomwedhi ntano.

• Ehala: Watchtower Educational Center, Patterson, New York, U.S.A.

• Iitegelelwa: Aaihokani mboka ya ninginithwa uule woomvula 3 noye li pokati koomvula 21 no 38 sho taya ningi eindilo. Naya kale ya hokana uule woomvula mbali nenge dhi vule po noye li miilonga yethimbo lyu udha uule woomvula mbali nenge dhi vule po. Naya kale wo haya popi Oshiingilisa. Mboka taya ningi eindilo naya kale ye na uukolele. Mboka ye li aakokolindjila kiilongo yilwe (mwa kwatelwa mboka haya ungwaungwa nayo onga aatumwa), aatonateli aayendi, iilyo yuukwanegumbo waBetel, mboka ya li po pOsikola yOkudheula mUukalele, pOsikola yOmbiimbeli yOkudheula Aamwatate Inaaya Hokana nosho wo pOsikola yOmbiimbeli yOkudheula Aaihokani Aakriste ayehe otaya vulu wo okuninga eindilo ngele oya gwanitha po iitegelelwa.

• Nkene to vulu okuninga eindilo: Miitayimbelewa yimwe okugongala kwaamboka ya hala okuya kosikola ndjika ohaku ningwa piigongi yoshikandjo. Uuyelele auhe ohawu gandjwa pokugongala huka. Ngele owa hala okuya kosikola ndjika, ihe poshigongi sheni shoshikandjo kapu na okugongalo kwa tya ngeyi oto vulu okunyolela koshitayimbelewa wu pewe uuyelele wa gwedhwa po.

Osikola yOkudheula Iilyo yOokomitiye dhIitayimbelewa nAakulukadhi Yawo

• Elalakano: Okukwathela mboka ye li iilyo yOkomitiye yOshitayimbelewa ya vule okulonga nawa iilonga yawo yokukwatela komeho muukwanegumbo waBetel, okugandja eitulomo kiilonga nokutonatela iikandjo nosho wo iitopolwa mbyoka yi li kohi yetonatelo lyawo, iilonga yokutoloka, yokunyanyangidha, okutuma iileshomwa nokuwilika iikondo yi ili noyi ili. — Luk. 12:48b.

• Ethimbo ndyoka hayi kutha: Oomwedhi mbali.

• Ehala: Watchtower Educational Center, Patterson, New York, U.S.A.

• Iitegelelwa: Oshilyo shOkomitiye yOshitayimbelewa nenge oshilyo shOkomitiye yOshilongo nenge opo a langekwa po.

• Nkene to vulu okuninga eindilo: Olutuwiliki ohalu hiya aamwatate mboka ya gwanitha po iitegelelwa naakulukadhi yawo.

[Omanyolo gopevi]