Gamena eiyuvo lyoye
1. Oshigongi shetu shesiku lyi ikalekelwa shomumvo gwiilonga 2013 oshi na oshipalanyolo shini, nosha longekidhwa nelalakano lyashike?
1 Esiku kehe ohatu kala twa taalelwa koonkalo ndhoka tadhi vulu oku tu ningitha tu nyateke eiyuvo lyetu. Nomolwaashono oshigongi shetu shesiku lyi ikalekelwa shomumvo gwiilonga 2013, shoka tashi ka tameka me 1 Septemba 2012, shi na oshipalanyolo “Gamena eiyuvo lyoye.” (1 Tim. 1:19) Oshigongi shika osha longekidhwa nelalakano lyoku tu kwathela tu dhiladhile muule kombinga yankene hatu longitha omagano ngaka omawanawa twa pewa kOmushiti gwetu.
2. Omapulo ga simana geni taga ka yamukulwa poshigongi?
2 Tala ngele oto ka mona omayamukulo gomapulo taga landula: Poshigongi otapu ka yamukulwa omapulo gaheyali ga simana kombinga yeiyuvo:
• Iinima yini tayi vulu okunyateka eiyuvo lyetu?
• Ongiini tatu vulu okudheula eiyuvo lyetu?
• Ongiini tatu vulu okuyanda okukala tu na ondjo yombinzi yomuntu?
• Okudhiladhila nokukatuka metsokumwe nomakotampango gOmbiimbeli otaku holola shike kombinga yetu?
• Ongiini tatu vulu okuyanda okweehameka yalwe ngele tashi ya piinima ya kwatela mo eiyuvo?
• Aagundjuka, ongiini tamu vulu okwiidhidhimika uuna tamu thiminikwa mu longe shoka inaashi uka?
• Mboka ye etha eiyuvo lyawo li wilikwe kombepo ondjapuki ohaya mono omalaleko nuuyamba geni?
3. Oshigongi otashi tu etele uuwanawa washike?
3 Kekwatho lyaJehova otatu vulu okukondjitha oonkambadhala dhaSatana dhokunyateka eiyuvo lyetu. Tate yetu gwomegulu omunahole ote tu lombwele okupitila mOohapu dhe nomehangano lye ta ti: “Ondjila oyo ndjika. Yi landuleni.” (Jes. 30:21) Oshigongi shika osho omukalo gumwe moka Jehova te tu wilike. Onkee ano, ninga omalongekidho wu ka kale po esiku alihe. Kala to pulakene nawa nokudhiladhila nkene wu na okutula uuyelele mboka miilonga. Kundathaneni maandjeni kombinga yuuyelele mboka wa popiwa koshigongi. Okutula miilonga shoka twa longwa poshigongi, otashi ke tu nyatipaleka tu tsikile ‘okukala tu na eiyuvo ewanawa’ notashi ke tu kwathela kaatu pukithwe mondjila komainyanyudho gopakathimbo guuyuni waSatana. — 1 Pet. 3:16.