Mbela otashi ke ku kwathela okukala wu na oshitopolwa shoye mwene shoka ho longo?
1. Oshitopolwa shopaumwene oshike?
1 Oshitopolwa shopaumwene oshike? Oto vulu okukala wu na oshitopolwa shopaumwene shi li popepi naampoka ho zi ngele egongalo lyeni oli na oshitopolwa oshinene. Embo Organized, epandja 103 otali yelitha tali ti: “Okukala wu na oshitopolwa shopaumwene shoka shi li popepi nangoye otashi ke ku kwathela wu kale ho longitha ethimbo olindji miilonga yomomapya. Oto vulu wo okupula aauvithi yalwe ya ka longe pamwe nangoye koshitopolwa shoye.”
2. Ongiini to vulu okukala wu na ondjele mokulonga koshitopolwa shopaumwene nosho wo okwaambidhidha ongundu yeni yiilonga yomomapya?
2 Ambidhidha ongundu yiilonga yomomapya: Ngele owu na oshitopolwa shoye mwene shi li popepi naampoka ho longo, oto vulu okukala ho kutha ombinga muukalele nopethimbo lyomwiha nenge manga inoo ya kegumbo, tashi vulika to ka longa pamwe nomuuvithi ngoka ha longo popepi nangoye. Ngele owa kala wu na oshitopolwa shi li popepi negumbo lyaandjeni, otamu vulu okukala hamu ka longa ko nando okongulohi noyaandjeni. Ngele kapu na elongekidho lyiilonga yomomapya, oshi li nawa wu galikane Jehova e ku wilike manga inoo tameka okuuvitha. (Fil. 4:6) Kakele kaashono, owu na okukala wu na ondjele shi na ko nasha nethimbo ndyono ho longo koshitopolwa shoye naandyoka ho longo pamwe nongundu yeni yiilonga yomomapya. Oshi li nawa okukala ho ya kelongekidho lyiilonga yomomapya momahuliloshiwike uuna aamwatate oyendji haye ya okwaambidhidha ongundu yiilonga yomomapya.
3. Okukala wu na oshitopolwa shopaumwene oku na uuwanawa washike?
3 Omauwanawa: Ngele owu na oshitopolwa shopaumwene, oho kala aluhe wu na mpoka to ka longa uuna ethimbo lyoye tali shi pitike. Oto vulu okulonga ethimbo olindji miilonga yokuuvitha noitashi ke ku pula ethimbo olindji okuya koshitopolwa. Shika ohashi gandja ompito kuyamwe ya vule okukutha uukwathelikokolindjila nenge uukokolindjila wondjigilile. Uuna wa mona mo aanegumbo tayu ulike ohokwe, ohashi kala oshipu okuninga omaishunoko nokukonakona nayo Ombiimbeli, molwaashoka ayehe oye li moshitopolwa shimwe. Aauvithi oyendji oya mona kutya okukala ye na oshitopolwa shopaumwene ohashi ya kwathele okutseyathana nawa naanegumbo nokukala yi inekelwa kaanegumbo mboka, unene tuu ngele oshitopolwa oye shi longo olundji manga inaaye shi shunitha ko, opo shi ka gandjwe kuyalwe. Mbela okulonga moshitopolwa shopaumwene otaku ke ku kwathela nosho wo yaandjeni mu gwanithe po nawa oshilonga sheni? — 2 Tim. 4:5.