Oolye taya ka kala ye na ohokwe miitopolwa mbyoka yi li miifo yetu?
1. Uuna tatu lesha Oshungolangelo no-Awake! paumweni, oshike tu na okutala, nomolwashike?
1 Oshungolangelo no-Awake! oya nuninwa aantu ayehe muuyuni. Onkee ano, iitopolwa yayo ayihe ohayi kala yi na iipalanyolo yi ili noyi ili. Sho tatu lesha oshitopolwa kehe paumwene, natu tale kutya oolye tashi vulika ya kale ye na ohokwe musho, opo tu ya pe oshifo shoka.
2. Iitopolwa yini ya kundathanwa miifo yetu tashi vulika yi kale ya hokiwa kuyalwe?
2 Mbela Oshungolangelo ndjoka opo ya piti otayi kundathana oshitsa shontumba okuza mOmbiimbeli shoka wa li to kundathana pamwe nomuniilonga omukweni? Mbela omu na oshitopolwa tashi popi kombinga yonkalamwenyo yaanegumbo shoka tashi vulika shi kwathele omupambele gwoye? Mbela owu na gumwe ngoka wu shi ta dhiladhila okuya koshilongo shimwe shoka sha popiwa mo-Awake!? Mbela opu na iitopolwa yimwe miifo yetu tayi opalele aanangeshefa yontumba nenge iikondo yepangelo yimwe mbyoka yi li moshitopolwa shetu? Pashiholelwa, oshifo shoka tashi kunduthana omashongo ngoka aakulupe haya kala ya taalela otashi vulika shi kale sha hokiwa kaaniilonga momagumbo gaakulupe. Omahangano ngoka haga kale ke po elandulathano otashi vulika ga kale ge na ohokwe moshikundathanwa shoka tashi popi kombinga yomiyonena.
3. Hokolola oshimoniwa shoka tashi ulike kutya oshi li nawa okugandja iifo mbyoka tu wete kutya otashi vulika tayi opalele aantu yontumba kondandalunde.
3 Iizemo: Aaihokani yamwe moSouth Africa, mboka ye li Oonzapo, sho ya mono o-Awake! yaKotoba 2011 yi na oshipalanyolo: “How to Raise Responsible Children,” oya li ya dhengele koosikola 25 ndhoka dhi li moshitopolwa moka egongalo lyawo hali longo. Oosikola 22 odha li dha taamba iifo mbyoka noku yi pa aalongwa yadho. Natango aaihokani yalwe moshilongo shoka oya li wo ya ningi oshinima sha faathana noya li ya gandja iifo poosikola moshitopolwa shawo. Aalongisikola posikola yimwe oya li ya longitha iifo mbyoka melandulathano lyootundi dhawo dhokoshiwike nosho wo dhokulesha. Aaihokani mboka oya li ya hokolole omutonatelishikandjo iimoniwa mbyoka nokwa li a ladhipike omagongalo moshikandjo she ge shi ninge. Oshitayimbelewa osha li sha yakula oombestelinga odhindji dhiifo ya gwedhwa po. Onkee ano, oshifo shoka osha li shi na okupilintululwa.
4. Omolwashike twa hala okutaandelitha iifo kaantu oyendji muuyuni ngaashi tashi vulika?
4 Iifo yetu ohayi kundathana kutya omolwashike iinima yontumba tayi ningwa noshike tatu ilongo mo. Ohayi ukitha eitulomo ketumwalaka lyOmbiimbeli nosho wo kUukwaniilwa waKalunga. Oyo owala iifo kombanda yevi moka mu na “elaka etoye lyehupitho.” (Jes. 52:7) Onkee ano, otwa hala oku yi taandelitha muuyuni awuhe ngaashi tashi vulika. Omukalo omwaanawa oku shi ninga okwiipula kutya: ‘Oolye taya ka kala ye na ohokwe miitopolwa mbyoka yi li miifo yetu?’