Landula oshiholelwa shomupolofeti Mika
1. Mika otashi vulika a li hi ipula nepulo lini, nomolwashike okuuvitha kwe kaakwa li osima yowala?
1 ‘Uuyuni mbuka wa yonuka otawu ke ya uunake pehulilo?’ Omupolofeti Mika naye otashi vulika a li hi ipula nepulo ndyoka sho tu uvitha etumwalaka lyaJehova li na sha nokupangulwa kwezimo lyaIsrael nolyaJuda. Okuuvitha kwaMika kakwa li osima yowala, oshoka oohapu dhaJehova dhi na sha nehanagulo lyaSamaria odha li dha gwanithwa pethimbo lye, momumvo 740 K.E.N. (Mika 1:6, 7) Nokonima, Jerusalem osha li sha hanagulwa po momumvo 607 K.E.N. (Mika 3:12) Ongiini tatu vulu okuholela Mika sho twa tegelela esiku enene lyaJehova lyepangulo?
2. Omolwashike tu na okwiidhidhimika sho twa tegelela esiku enene lyaJehova, nongiini tatu vulu oku shi ninga?
2 Kala omwiidhidhimiki: Omupolofeti Mika okwa nyola a ti: “Ihe ngame otandi tegelele OMUWA; ondi inekela Kalunga, ngoka ta hupitha ndje.” (Mika 7:7) Mika kali owala a mwena a tegelela ehulilo. Ihe okwa kala i ipyakidhila ta longele Jehova. Manga twa tegelela esiku lyaJehova, otu na okukala tatu longo iilonga tayi ulike kutya otwi ‘iyapulila Kalunga notwe mu igandjela.’ (2 Pet. 3:11, 12) Eidhidhimiko lyaJehova ohali kwathele oohandimwe yi itedhulule. (2 Pet. 3:9) Onkee ano, natu taambeni nomutima aguhe sho tatu ladhipikwa tu holele aapolofeti mboka ya kala nokwiidhidhimika. — Jak. 5:10.
3. Omolwashike tu na okwiindila Jehova e tu pe ombepo ye ondjapuki?
3 Inekela moonkondo dhaJehova: Nonando Mika okwa li a taalela omashongo miinakugwanithwa ye, okwa li i inekela moonkondo dhaJehova opo e yi gwanithe po. (Mika 3:8) Jehova oku shi kutya otwa pumbwa ekwatho lye, nomolwaashoka te tu ladhipike mOohapu dhe tu li konge. Oha gandja oonkondo dhe nehalo ewanawa kwaamboka ya loloka, opo ya gwanithe po iinakugwanithwa yawo yopambepo. (Eps. 84:5, 7; Jes. 40:28-31) Mbela ngoye oshe ku ningilwa nale pauhandimwe sho to longele Jehova? Oho pula ngaa Jehova aluhe e ku pe ombepo ye ondjapuki yi ku nkondopaleke? — Luk. 11:13.
4. Ongiini onkalamwenyo yaMika yi li oshiholelwa oshiwanawa kutse kunena?
4 Okulonga ehalo lyaJehova okwa li oshinima sha simanenena monkalamwenyo ayihe yaMika. Okwa li a tokola okukala omudhiginini nonando okwa li mokati kaantu ya hutuka. Sha faathana, ohatu makelwa esiku kehe tu ethe po uudhiginini wetu. Onkee ano, natu kale twa tokola toko ‘okulongela nokuvulika kuJehova Kalunga ketu aluhe sigo aluhe.’ — Mika 4:5, yelekanitha NW.