Landula oshiholelwa shomupolofeti Sefanja
1. Omupolofeti Sefanja okwa li monkalo ya tya ngiini, nokwe tu tulila po oshiholelwa shini oshiwanawa?
1 Omimvo 2 600 nasha dha ka pita, Aajuda oya li haya longele oshikalunga Baal ya manguluka. Pethimbo mpoka omukwaniilwa omwiinayi Amon, opo owala a adhika a dhipagwa. Omukwaniilwa omugundjuka Josia oye a li ta lele oshilongo. (2 Ondjal. 33:21–34:1) Jehova okwa li a tumu Sefanja a ka lombwele oshigwana etumwalaka Lye lyepangula. Sefanja otashi vulika a li omumbala, nenge tu tye gwomezimo lyaawa yAajuda. Ihe nonando ongaaka, okwa li a popi shu ukilila etumwalaka lyepangulo kaaleli Aajuda. (Sef. 1:1; 3:1-4) Atuheni otu na okukala aalaadhi ngaashi Sefanja. Katu na okweetha aakwanezimo ya ye moshipala okulongela kwetu Jehova. (Mat. 10:34-37) Sefanja okwa li a popi kombinga yashike, noshizemo osha li shini?
2. Otu na okuninga shike, opo tu ka hupithwe mesiku lyondjahi yaJehova?
2 Kongeni Jehova: Jehova oye awike ta ka hupitha aantu mesiku lyondjahi ye. Onkee ano, Sefanja okwa li a ladhipike Aajuda komeho yethimbo ya konge Jehova, ya konge uuyuuki neifupipiko. (Sef. 2:2, 3) Otu na okuninga sha faathana kunena. Natu ladhipikeni aantu ya konge Jehova, ngaashi Sefanja a li e shi ningi. Ihe tse otu na okukala twa tokola twa mana mo ‘kaatu shune monima e tatu etha okulandula Jehova.’ (Sef. 1:6) Opo tu mu konge otu na okukala hatu konakona Oohapu dhe nuukeka, noku mu pula megalikano e tu kwathele. Ohatu kongo uuyuuki mokukala twa yogoka pamikalo. Ohatu kongo eifupipiko mokuvulika nomokutula nziya miilonga omalombwelo ngoka haga zi kehangano lyaJehova.
3. Omolwashike tu na okukala netaloko ewanawa uuna tu li muukalele?
3 Iizemo iiwanawa: Etumwalaka lyaSefanja olya li li inyengitha Aajuda yamwe ya ninge omalunduluko. Yamwe oya li ya tameke okukonga Jehova, unene tuu Josia ngoka a li omugundjukaelela. Konima yethimbo Josia okwa li a ningi oshikonga oshinene shokuhanagula po iikalunga muJuda. (2 Ondjal. 34:2-5) Oombuto ndhoka natse hatu kunu kunena ohadhi gwile pomavi gi ili nogi ili. Dhimwe omoondjila, piipale, moongwena nadhimwe omevi ewanawa e tadhi eta iiyimati. (Mat. 13:18-23) Otu na einekelo lya kola kutya Jehova ota ka tsikila nokuyambeka oonkambadhala ndhoka tatu ningi sho tatu andjaganeke oombuto dhUukwaniilwa. — Eps. 126:6.
4. Omolwashike tu na ‘okutegelela esiku lyaJehova’?
4 Aajuda yamwe oya li taya dhiladhila kutya Jehova ke na siku a ka katuke onkatu. Ihe okwa li a gandja eshilipaleko kutya esiku lye enene oli li popepi. (Sef. 1:12, 14) Mboka taya kongo ekwatho kuye oyo owala taya ka hupithwa. (Sef. 3:12, 17) Omanga twa ‘tegelela esiku lyaJehova’ Kalunga omunene, natu kale twa nyanyukwa sho tatu mu longele tu na uukumwe. — Sef. 3:8, 9.