Longitha okambo “Tseya shoka shi li mOohapu dhaKalunga” — wu tameke oonkundathana
1. Oshilongitho shini oshipe shomuukalele twa mona?
1 Ongiini tatu vulu okulongitha oshilongitho shika oshipe uuna tatu ilongekidha omafalomo gomuukalele? Molwaashoka oshitopolwa shika omanyolo gasho oga tulwa mo nale kohi yiipalanyolo yOmbiimbeli, ngaashi yi li membo Reasoning, oshilongitho shoka otashi vulu okukwathela mokutameka oonkundathana.
2. Ongiini tatu vulu okulongitha okambo “Tseya shoka shi li mOohapu dhaKalunga” muukalele?
2 Oto vulu okulongitha epulo 8 e to ti: “Otatu talele po aantu ooyakwetu paufupi molwaashoka aantu oyendji ohayi ipula kutya ‘Mbela otu na okupa Kalunga ombedhi sho aantu taya mono iihuna?’ [Miitopolwa yimwe, ohashi kala shi li nawa wu ulukile omunegumbo epulo.] Oto ti ngiini? [Tegelela a yamukule.] Ombiimbeli otayi gandja eyamukulo tali mbilipaleke kepulo ndyoka.” Lesheni okuza mOmbiimbeli momwene ovelise yimwe nenge odhindji dhomoovelise ndhoka dhe etwa po e tamu dhi kundathana. Ngele omunegumbo oku ulike ohokwe, oto vulu oku mu ulukila omapulo 20 ngoka ge li mefalomo ngoye to mu pula a hogolole po limwe mu li kundathane moshikando tashi landula. Nenge oto vulu oku mu pa shimwe shomiileshomwa yetu yokuninga ekonakonombiimbeli mbyoka yi na uuyelele wa gwedhwa po kombinga yaashoka mwa kundathana.
3. Ongiini tatu vulu okulongitha okambo “Tseya shoka shi li mOohapu dhaKalunga” tu tameke oonkundathana miitopolwa moka mu na aantu mboka kaaye shi Aakriste?
3 Epulo 4, 13 sigo 17 otali vulu okukwathela unene tuu uuna tatu uvitha miitopolwa moka mu na aantu mboka kaaye shi Aakriste. Pashiholelwa, oto vulu okulongitha uuyelele mboka wu li mepulo 17 e to ti: “Otatu talele po paufupi omaukwanegumbo tu li aakwathi yoshigwana. Mbela ito shi zimine kutya omaukwanegumbo oge na omashongo ogendji kunena? [Tegelela a yamukule.] Aaihokani oyendji oya kwathelwa koohapu ndhika tadhi ti: “Omukiintu kehe oku na okusimaneka omulumentu gwe.” [Ino pumbwa okupopya kutya oohapu ndhoka odha zi mAaefeso 5:33. Ngele oto popi nomukiintu, oto vulu okutotha oohapu ndhoka dhi li mAaefeso 5:28.] Mbela sho to tala okutula miilonga omayele ngoka otaku ke eta uuwanawa mondjokana?”
4. Oshike to vulu okuninga pehulilo lyoonkundathana nomuntu ngoka kee shi Omukriste?
4 Pehulilo lyoonkundathana dheni, ninga omalongekidho opo mu tsikile nadho oshikando shilwe. Tashi vulika wu ninge omalongekidho wu popye kombinga yOmanyolo galwe okuza pepulo ndyoka wa pula. Pethimbo tali opalele, lombwela omunegumbo kutya uuyelele mboka wa kala nokukundathana naye owa za mOmbiimbeli. Shi ikolelela koonkundathana dheni dha tetekele nosho wo etaloko lye lyOmbiimbeli, mu pa oshileshomwa shoka wu wete kutya otashi mu opalele.—Tala oshigwedhelwako shoka shi li mUukalele Wetu wUukwaniilwa waDesemba 2013.