Kwathela aaposi yi ilonge kombinga yaJehova
1. Jesus okwa li u ulukile ngiini aaposi olukeno?
1 Sho ku na owala omasiku gontumba manga Jesus inaa dhipagwa, okwa li a tsakaneke aaposi yaali sho taya zi muJeriko. Aaposi oya li yi igidha taya ti: ‘Omuwa, tu sila ohenda!’ Nonando uudhigu mboka Jesus a li ta ka pita muwo owa li we mu gwilila po, okwa thikama, e ti ithana aalumentu mboka ye ye kuye. Okwa li e ya aludha. (Mat. 20:29-34) Ongiini tatu vulu okuholela olukeno lwaJesus?
2. Ongiini tatu vulu okuuvithila omuposi kehe mpoka twa tsakanene naye?
2 Ya kwathela: Ngele owa tsakaneke omuposi, kutya nduno openi, mu lombwela kutya ongoye lye e to mu kwathele. Petameko otashi vulika a ka kale e ku limbililwa, molwaashoka aaposi ohaya kengelelwa olundji. Ihe otashi vulika a kale e ku mangulukila ngele oto popi naye newi lyuukuume nowu na ohokwe muye. Dhimbulukwa kutya uuposi inawu faathana, naashoka osho hashi ningitha kutya ekwatho li thike peni wa pumbwa oku mu pa. Ngele we mu kwathele, oto vulu oku mu lombwela kutya oho longo aantu kombinga yOmbiimbeli. Mu leshela omanyolo ngaashi Episalomi 146:8 nenge Jesaja 35:5, 6. Ngele oha lesha oondanda dhoshiposi, mu pula ngele okwa hala oshileshomwa shi li moondanda ndhoka shoka tashi mu kwathele i ilonge oshindji kombinga yOmbiimbeli. Oto vulu wo wu mu kwathele a tape iikwamawi ko-jw.org. Ngele oku na okompiuta ndjoka yi na opolohalama hayi lesha oondanda ndhoka tadhi ya kosikilina, ote ke ku pandula ngele we mu pilintile iitopolwa mbyoka yi li ko-jw.org pamwe niileshomwa mbyoka hayi vulu okutapwa molupe lwo-RTF (Rich Text Format). — Tala oshimpungu: “Uuna to kwathele omuposi . . . ”
3. Ongiini tatu vulu okukonga aaposi moshitopolwa shetu?
3 Konga aaposi: Ihatu tsakaneke naanaa aaposi uuna tatu longo egumbo negumbo, molwaashoka oyendji yomuyo ihaya kala ya manguluka okupopya naantu mboka kaaye ya shi. Onkee ano, otu na okuninga oonkambadhala tu ‘pule’ nenge tu konge aaposi, opo tu ya uvithile. (Mat. 10:11) Mbela oho longo nomuntu ngoka omuposi nenge ho sikola naye? Ninga oonkambadhala wu mu uvithile. Ngele moshitopolwa sheni omu na osikola yaaposi, ya faalela iileshomwa yoshiposi ya ka tule mongulumambo yawo. Mbela owu shi omuntu gumwe ngoka e na omukwanezimo omuposi? Mbela moshitopolwa sheni omu na omahangano nenge omandiki ngoka haga kwathele aaposi? Yelithila aakwanezimo yawo, nenge ngoka ha yakula oongodhi, nenge omuwiliki kutya Oonzapo dhaJehova odhi na ohokwe onene yokukwathela aaposi. Ya etela iileshomwa yoshiposi nenge iikwamawi. Ya ulukila omauvaneko ngoka ge li mOmbiimbeli kutya masiku Kalunga ota ka tsikulula aaposi. Oto vulu wo wu ya ulukile okavidio ko-jw.org ke na oshipalanyolo: “Without It, I Would Feel Lost” hoka ke na oshimoniwa shomulumentu gumwe omuposi ngoka a mona uuwanawa mOmbiimbeli yoshiposi. Ngele owa yelitha kutya omolwashike we ya wu mu talele po, shika otashi ke ku pa ompito wu ka kwatathane naantu mboka aaposi.
4. Oshike tatu ilongo moshimoniwa shomumwameme Janet?
4 Omumwameme Janet ngoka naye omuposi okwa li a talele po endiki lyaaposi esiku limwe. Okwa tameke oonkundathana nomukiintu gumwe omugundjuka ngoka naye omuposi. Omumwameme Janet okwe mu lombwele a ti: “Sho Jesus a li a aludha aaposi, osha li owala euliko kutya ote ke shi ningila aaposi ayehe.” Oya lesha pamwe Ehololo 21:3, 4 naJanet okwe mu yelithile nkene Uukwaniilwa waKalunga tawu ka gwanitha po euvaneko ndyoka. Omukiintu okwa li a kumwa, opo ihe okwa ti: “Inandi uva nando onale omuposi ta popi oshinima shika. Aanameho oyendji oyi itaala kutya ngele omuntu omuposi, nena oku na okukala a ninga sha shoka sha puka nenge oohekulululwa oyo ye na shoka ya ningile.” Omumwameme Janet okwa li a tumine omukiintu ngoka embo Omalongo gOmbiimbeli moondanda dhoshiposi. Ngashingeyi ohaya konakona pamwe naye Ombiimbeli lwaali moshiwike.
5. Omayambeko geni tatu vulu okumona, ngele otwa kala tu na ohokwe maaposi ngaashi Jesus?
5 Tse katu na siku tu aludhe aaposi ngaashi Jesus a li e shi ningi. Ihe otatu vulu okukwathela ayehe mboka omadhiladhilo gawo ga tsikithwa kukalunga kuuyuni mbuka yu uve ko oshili yOmbiimbeli. Mokati kawo omwa kwatelwa naaposi. (2 Kor. 4:4) Jesus okwa li a aludha aalumentu aaposi yaali popepi naJeriko. Oshike sha li she mu inyengitha? Ombiimbeli otayi ti kutya “okwe ya sile ohenda.” (Mat. 20:34) Ngele natse ohatu ulukile aaposi olukeno ngaashi Jesus, otatu ka kwathela yamwe yomuyo yi ilonge kombinga yaJehova ngoka ta ka hulitha po uuposi thiluthilu. Oshinima sha tya ngawo otashi vulu ku tu etela enyanyu.