Okuhwepopaleka uunkulungu wetu muukalele — Okuuvitha momahala goongeshefa

Omolwashike sha simana?: Molwaashoka aantu oyendji ohaya longo ethimbo alihe, oshi li nawa tu ya faalele etumwalaka lyUukwaniilwa komahala hoka haya longele. Okuuvitha momahala goongeshefa otaku vulu okukala kunyanyudha notaku tompola, molwaashoka aantu aluhe opo to ya adha nohayu ungaunga naantu nawa, oshoka oye ya tala ko ongookastoma dhawo. Opo tu shi pondole, otwa pumbwa okulongitha oondunge dhokuyoolola, okuzala omizalo dhi shi okutalwa nokwiiyopaleka nawa. (2 Kor. 6:3) Onkee ano, omutonateli gwiilonga oku na okutala kutya lungapi momahala goongeshefa mu na okulongwa, noolye ye na oku ka longa mo.

Nkene tatu vulu oku shi ninga:

Ilongekidha efalomo efupi. Ngele otwa popi ethimbo ele nomuniilonga, otashi vulika kaatu ka pewe we ompito yokupopya naye oshikando tashi landula.
Tala kutya ethimbo lini ewanawa nokuya komahala goongeshefa ndyoka aantu haya kala inaayi ipyakidhila unene, ngaashi ngele opo ya patulula.
Popya tango nomutonateli gwiilonga. Kala omunambili nowa nyanyukwa. Oto vulu okutya: “Otatu mu talele po paufupi piilonga yeni, molwaashoka komagumbo ihatu mu adha ko.” Popya naye paufupi, e to mu pe okafo, iifo nenge iileshomwa yilwe. Opo kaatu lyalyakanithwe naalandithi, oshi li nawa kaatu pule omayambidhidho, kakele uuna twa pulwa kutya iilonga yetu ohayi yambidhidhwa ngiini.
Ngele omutonateli gwiilonga omunambili, natu pule epitikilo tu popye naaniilonga paufupi. Pomahala gamwe goongeshefa, oshi li nawa okupula omutonateli gwiilonga ngele otatu vulu okuthiga iileshomwa pehala lyokuthuwila.
Longitha oondunge dhokuyoolola e to kala ho tivuka. Pashiholelwa, ngele omuniilonga ota popi nookastoma nenge i ipyakidhila, tegelela a mane, opo wu popye naye.

Kambadhala oku shi ninga momwedhi ngu:

PElongelokalunga lyUukwanegumbo weni tali landula, idheuleni efalomo paufupi ndyoka tashi vulika to ka longitha uuna tamu mu longa momahala goongeshefa.