Natu Holeleni Eitaalo Lyawo
1. Oshike tatu ka konakona moshiwike sho 19 Kotoba pEkonakonombiimbeli lyEgongalo?
1 Moshiwike sho 19 Kotoba 2015 otatu ka konakona embo Natu Holeleni Eitaalo Lyawo pEkonakonombiimbeli lyEgongalo. Membo ndika omu na omahokololo gopaMbiimbeli taga popi aalumentu naakiintu 14, mboka ya li ye na eitaalo. Omahokololo ngoka oga longekidhwa momukalo ngoka tagu tu kwathele tu kale tu ya wete momadhiladhilo getu ye li aantu yolela, mboka ya li ya tsakaneke omashongo, sho taya longele Jehova. Membo moka otatu adha mo wo iiyilongomwa ya za momahokololo ngoka, mbyoka tayi tu kwathele tu holele eitaalo lyawo kunena. — Heb. 6:12.
2. Hokolola iinima yimwe membo Natu Holeleni Eitaalo Lyawo.
2 Uuyelele mboka tatu adha mo: Membo omu na uualita nosho wo oshuuliki shethimbo lyiiningwanima. Iinima mbyoka otayi ke tu kwathela tu tseye kutya omuntu ngoka a popiwa mehokololo okwa li ko pethimbo lini nopeni a li ha kala. Pehulilo lyontopolwa kehe opu na okampungu ke na oshipalanyolo, “Dhiladhila komapulo ngaka . . . ,” ngoka tage ke tu kwathela tu tedhatedhe komahokololo ngoka, opo tu vule okutula miilonga shoka twi ilonga mo. Membo omu na wo omathano ga mbapekwa, ga yela nawa noga konakonwa nawa, ngoka ga mwenyopaleka omahokololo ngoka.
3. Oshike tatu vulu okuninga, opo tu mone uuwanawa mokukonakona embo ndika?
3 Nkene tatu vulu okumona mo uuwanawa: Otatu kumagidhwa petameko lyontumwafo ya za kOlutuwiliki noohapu ndhika: “Kala ando wa fa wu wete iinima mbyoka tayi popiwa mo; kala wa fa opo wu li. Kambadhala okukala wu uvite ngaashi aantu mboka ya popiwa mOmbiimbeli ya li yu uvite, nowa fa wu wete shoka ya li ye wete. Yelekanitha nkene ya li yi inyenge, sho iinima mbyoka tayi ningwa nankene to ki inyenga ngele ando owa yi monkalo ya fa ndjoka.” Eeno, okukala twa fa tu wete shoka sha popiwa momahokololo, itashi ti kutya otu na okutengeneka. Pehala lyaashono, otu na okukala twa fa tu wete shoka omahokololo ngoka ga nwethwa mo taga ti nokuuvila uukwawo wanankali aantu mboka ya popiwa mo. Oku shi ninga otaku pula ethimbo nokutedhatedha. (Neh. 8:8) Ngele omwa hulilile pokati kontopolwa oshikando sha zi ko, omukwateli komeho ne endulule shoka mwa ningile, ta longitha oosekonde 30 nenge 60. Pehulilo ota vulu okupula epulo limwe nenge gaali geendululo, ngele oshileshwa kashi na okampungu kedhina “Dhiladhila komapulo ngaka . . . ”
4. Omolwashike twa pumbwa okukonakona embo Natu Holeleni Eitaalo Lyawo?
4 Otu li muuyuni mboka tawu kambadhala aluhe esiku kehe okunkundipaleka eitaalo lyetu, momukalo gwontumba nogwongandi. Embo ndika nosho wo iitopolwa mbyoka hayi holoka mOshungolangelo, mbyoka ya kankamena kulyo, oyi li omagano ga za kuJehova gokukoleka eitaalo lyetu. (Jak. 1:17) Opo tu mone mo uuwanawa mulyo, natu kale hatu kala aluhe pEkonakonombiimbeli lyEgongalo nokuninga omatyokosha ngaashi tashi vulika, sho tali konakonwa.