Holela omupolofeti Habakuk
1. Omolwashike tashi vulika tu kale tu uvite ngaashi omupolofeti Habakuk?
1 Sho uukolokoshi tawu ende tawu indjipala momudhingoloko gwetu, otashi vulika tu kale tu uvite ngaashi omupolofeti Habakuk, ngoka a pula Jehova a ti: “Omolwashike to talitha ndje omalwa? Sigo uunake to idhidhimikile iilonga yuukolokoshi?” (Hab. 1:3; 2 Tim. 3:1, 13) Ngele otwa kala nokutedhatedha ketumwalaka lyaHabakuk nokoshiholelwa she shuudhiginini otashi ke tu kwathela tu idhidhimike sho twa tegelela esiku lyaJehova lyepangulo. — 2 Pet. 3:7.
2. Ongiini tatu vulu okuulika kutya otu na eitaalo kunena?
2 Kala wu na eitaalo: Pehala lyokukala ti ipe uusama, Habakuk okwa kala a tonata pambepo nokwa kala i ipyakidhila. (Hab. 2:1) Jehova okwe mu shilipaleke kutya oohapu Dhe otadhi ka gwanithwa pethimbo lyo opala nonokutya “aayuuki otaa ka kala ko, oshoka oyi inekela Kalunga.” (Hab. 2:2-4) Shika mbela otashi ti shike kAakriste mboka ye li ko pethimbo lyehulilo? Osha simana noonkondo okukala tu shi lela kutya ehulilo otali ya, pehala lyokukala tu shi kutya uunake. Eitaalo ohali tu inyengitha tu kale twa tonata nokukala twa pititha komeho iilonga yuukalele. — Heb. 10:38, 39.
3. Omolwashike tu na okukala twa nyanyukwa sho tatu longele Jehova?
3 Kala wa nyanyukwa omolwaJehova: Sho Gog yaMagog ta ka ponokela oshigwana shaJehova, eitaalo lyetu otali ka makelwa. (Hes. 38:2, 10-12) Omaipumomumwe ohage e ta uudhigu, nokuli nokwaamboka oyo ya sindana. Iikulya otashi vulika yi ka kale ya pumba. Omalukalwa otashi vulika ga yonuke po, nonkalo otashi vulika yi nayipale. Otatu ka ninga po shike uuna twa adhika kuudhigu? Habakuk okwa li a tegelela uudhigu, ihe okwa kala a tokola a kale a nyanyukwa sho ta longele Jehova. (Hab. 3:16-19) “Enyanyu ndyoka Omuwa te li gandja” otali ke tu kwathela tu idhidhimikile omamakelo ngoka tage ke tu adha monakuyiwa. — Neh. 8:10; Heb. 12:2.
4. Enyanyu lini tatu vulu okukala tu na ngashingeyi nosho wo monakuyiwa?
4 Aantu mboka taya ka hupithwa kuJehova pethimbo lyepangulo ndyoka tali ya, otaya ka tsikila okulongwa oompango dhaKalunga dhokukalamwenyo. (Hab. 2:14) Mboka taya ka yumuka nayo otaye ki ilonga kombinga yaJehova. Nokuli nongashingeyi, natu tsikile okulongitha ompito kehe tu lombwele yalwe kombinga yaJehova nosho wo yiilonga ye iikumithi! — Eps. 34:1; 71:17.