“Paulus okwa hambelele Kalunga nokwa tsuwa omukumo”

Sho egongalo lyokuRoma lya li lyu uvu kutya Paulus ote ya, ongundu yaamwatate oya li ye ende ookilometa 64 ye ke mu tsakaneke. Ohole yawo yeiyambo oya li ya gumu ngiini Paulus? Ombiimbeli otayi ti: “Sho e ya mono, okwa hambelele Kalunga nokwa tsuwa omukumo.” (Iil 28:15) Nonando okwa li a tseyikila ha ladhipike omagongalo ngoka a li ha talele po, oshikando shino sho a li onkwatwa, oye a li tsuwa omukumo. — 2Kor 13:10.

Kunena, aatonatelishikandjo ohaya talele po omagongalo, opo ya tse aamwahe omukumo. Ngaashi owala hashi ningilwa aapiya yaKalunga ayehe, omathimbo nomathimbo, aatonatelishikandjo nayo ohaya kala ya vulwa, ya gwililwa po kiimpwiyu noya teka omukumo. Oshikando tashi ya omutonatelishikandjo nomukulukadhi gwe taya talele po egongalo lyeni, oshike to vulu okuninga wu ya kumike, opo mu ‘tsaathane omukumo’? — Rom 1:11, 12.

• 

  Ambidhidha okugongala kwiilonga yomomapya. Ohashi tsu omutonatelishikandjo omukumo uuna aauvithi taya ningi omaiyambo ya ambidhidhe omaipyakidhilo gomoshiwike shoka shi ikalekelwa. (1Tes 1:2, 3; 2:20) Oto vulu okukutha uukwathelikokolindjila omwedhi ngoka ta talele po. Oto vulu okulonga nayo muukalele nenge wu ye nagumwe komukonakoni gwoye. Ohaya nyanyukilwa okulonga pamwe naauvithi ya yoolokathana mwa kwatelwa mboka aape nenge mboka haya dhiladhila kutya kaye shi aauvithi ya pyokoka.

• 

  Ya yakula. Oto vulu okupa omutonatelishikandjo nomukulukadhi gwe ehala lyokukala nenge wu ya hiye kokulya. Shoka otashi ulike kutya owu ya hole. Inaya tegelela wu ya ningile oshindji. — Luk 10:38-42.

• 

  Pulakena e to tula miilonga omayele ngoka ta gandja. Omutonatelishikandjo ohe tu kwathele pahole tu mone nkene tatu vulu okuhwepopala mokulongela Jehova kwetu. Omathimbo gamwe otashi vulika e tu pe omayele ga kwata miiti. (1Kor 5:1-5) Ohashi mu nyanyudha ngele tatu vulika kugo notatu ga landula. — Heb 13:17.

• 

  Kala ho pandula. Lombwela omutonatelishikandjo nosho wo omukulukadhi gwe nkene omaiyambo gawo hage ku tsu omukumo. Oto vulu oku shi ninga pakana nenge wo mu nyolele ontumwafo nenge okakalata. — Kol 3:15.