Mbela owu wete omaukwatya gaKalunga, nonando iha monika?

Uuna to tala ongala yomalwaala ga yoolokathana, eyalelo lyu udha oonyothi nenge epopomo lyegwo lyomeya, mbela iho kala wu wete iilongankondo yOmushiti? Iinima yomeshito mbyoka ye tu dhingoloka ohayi tu hololele nawa omaukwatya ge, nonando iha monika. (Rom 1:20) Okutala nokudhiladhila kwaashoka tu wete otatu vulu okumona oonkondo dhaKalunga, ohole ye, uunongo we nuuyuuki we. Otatu vulu wo okumona kutya oha gandja. — Eps 104:24.

Iinima yimwe yini yomeshito lyaJehova ho mono esiku kehe? Nokuli nonando oho kala mondoolopa, otashi vulika ho mono uudhila nenge omiti. Ngele ohatu konakona nawa eshito lyaJehova, otashi vulu oku tu kwathela kaatu kale tu na iimpwiyu. Otashi tu kwathele wo tu gandje eitulomo kiinima mbyoka ya simanenena. Otashi vulu wo okukoleka eitaalo lyetu muJehova kutya ota vulu oku tu sila oshimpwiyu sigo aluhe. (Mat 6:25-32) Ngele owu na aanona, ya kwathela ya kale ye shi omaukwatya gaJehova ga dhenga mbanda. Sho tatu ende tatu tseya nawa iinima yomeshito mbyoka ye tu dhingoloka, otatu ka hedha lela popepi naJehova. — Eps 8:3, 4.

TALA OKAVIDIO ESHITO OTALI HOLOLA ESIMANO LYAJEHOVA — UUYELELE NOMALWAALA E TO YAMUKULA OMAPULO NGAKA:

• Ongiini uuyelele hawu tu kwathele tu mone omalwaala ga yoolokathana?

• Oshike hashi ningitha omalwaala ga kale ga fa taga adhima nenge taga lundulukile momalwaala galwe?

• Omolwashike hatu mono omalwaala ga yoolokathana meyalelo?

• Iinima yini wa mona popepi negumbo lyaandjeni yi na omaalwaala taga hokitha okutala?

• Omolwashike twa pumbwa okukutha ethimbo tu konakone iinima meshito?