Mbela owa hala okuninga eindilo kOsikola yAauvithi yUukwaniilwa?

Mbela owu li pokati komimvo 23 no 65 nowu li miilonga yethimbo lyu udha? Mbela uukolele woye owu li nawa noto vulu oku ka longa kehe pamwe mpoka pu na ompumbwe onene? Ngele eyamukulo lyoye oeeno komapulo ngaka, mbela owa dhiladhila ngaa okuninga eindilo kOsikola yAauvithi yUukwaniilwa? Okuza sho osikola ndjoka ya tameke, aaihokani omayovi nosho wo aamwatate naamwameme mboka kaaye li mondjokana, oya ninga eindilo kosikola ndjika. Ihe otwa pumbwa unene aamwatate mboka inaaya hokana ya ninge eindilo. Pula Jehova e ku pe ehalo wu mu nyanyudhe nowu holele Omwana. (Eps 40:8; Mat 20:28; Heb 10:7) Opo nduno tala ngele owu na iinakugwanithwa yontumba mbyoka wu na okugwanitha po, ngaashi yuukwanegumbo, iilonga nenge oongunga. Ngele osho, mbela ito vulu okuninga omalongekidho opo wu vule okukala wa gwana?

Aamwatate naamwameme mboka ya dheulwa mosikola ndjoka oya ka longela Jehova momikalo dhini nopeni? Yamwe oya tuminwa ya ka longele kiitopolwa hoka haku popiwa omalaka kaage shi gawo nenge ya ka gandje uunzapo womontaneho miilando iinene. Yamwe oya ka longa ye li aakwatheli yaatonatelishikandjo, aatonatelishikandjo nenge aatumwa yomomapya. Sho to dhiladhila kombinga yiinima mbyoka to ka vula okumona miilonga yaJehova, dhiladhila kiikala yomuhunganeki Jesaja ngoka a ti: “Otandi yi! Tuma ndje!” — Jes 6:8.

TALA OKAVIDIO AATUMWA YOMOMAPYA, AANIILONGA METEYO, E TO YAMUKULA OMAPULO NGAKA:

• 

  Aatumwa yomomapya ohaya hogololwa ngiini?

• 

  Aatumwa yomomapya ohaya longo iilonga yini iiwanawa?

• 

  Iilonga yuutumwa ohayi eta omayambeko geni?