Kwathela omukonakoni a ninge ehumokomeho noku ninginithwe — Oshitopolwa 1

1. Aakorinto aatiyali 3:1-3, otaye tu kwathele ngiini tu kale twa lenga uuthembahenda wokukonakona naantu Ombiimbeli noya ninginithwe? (Tala ethano lyokombanda.)

OHO KALA wu uvite ngiini uuna omukonakonimbiimbeli gwomegongalo lyeni a ninginithwa? Odhoshili kutya omutima gwoye ohagu kala tagu hunga kenyanyu. (Mat. 28:19) Shimwe ishewe, ngele ongoye wa konakona nomulongwa ngoka omupe, ohashi kala lela shinyanyudha uuna a ninginithwa! (1 Tes. 2: 19, 20) Aalongwa mboka opo ya ninginithwa, oye li “ontumwafo yepopilo” (NW) kwaamboka ya konakona nayo nosho wo kegongalo alihe. — Lesha 2 Aakorinto 3:1-3.

2. (a) Epulo lini lya simana tatu ka kundathana, nomolwashike? (b) Ekonakonombiimbeli oshike? (Tala enyolo lyopevi.)

² Oshinyanyudha lela okumona kutya omimvo ne dha ka pita, konyala opwa li pwa lopotwa omakonakonombiimbelib ge li 10 000 000, omwedhi kehe muuyuni awuhe. Momimvo odho tuu ndhoka, konyala aantu ye li 280 000 oya li ya ninginithwa ye li Oonzapo dhaJehova noye li wo aalongwa aape yaJesus Kristus. Ongiini tatu vulu okukwathela aakonakonimbiimbeli omamiliyona mboka ya ninginithwa? Jehova natango ota tsikile okupa aantu ompito ya ninge Oonzapo dhe. Onkee ano, ohatu ningi ngaashi tatu vulu tu ya kwathele ya ninge ehumokomeho noya ninginithwe. Ethimbo ndyoka lya thigala ko eshona noonkondo! — 1 Kor. 7:29a; 1 Pet. 4:7.

3. Oshike tatu ka kundathana moshitopolwa shika, shi na ko nasha nokuninga omakonakonombiimbeli?

³ Molwaashoka okuninga aantu aalongwa okwa simanenena ngashingeyi, Olutuwiliki olwa li lwa pula iitayimbelewa, shoka shi na okuningwa po, opo aakonakonimbiimbeli yetu ya ninge ehumokomeho noya ninginithwe. Moshitopolwa shika naashoka tashi ka landula ko, otatu ka tala shoka tatu vulu okwiilonga kiimoniwa yaakokolindjila, aatumwa naatonatelishikandjo.c (Omayel. 11:14; 15:22) Otaya ka yelitha shoka tatu vulu okuninga nosho wo aakonakonimbiimbeli yetu, opo okukonakona nayo Ombiimbeli ku kale taku ti sha. Moshitopolwa shika otatu ka kundathana iinima itano mbyoka omukonakoni e na okuninga, opo a ninge ehumokomeho noku ninginithwe.

NINGA OMAKONAKONOMBIIMBELI OSHIWIKE KEHE

4. Oshike tu na okundhindhilika kombinga yokukonakona naantu owala paufupi?

⁴ Aamwatate naamwameme oyendji ohaya ningi omakonakonombimbeli piiyelo yaakonakonimbiimbeli yawo. Nonando shoka ohashi kwathele omunegumbo a kale e na ohokwe mOmbiimbeli, olundji oonkundathana ndhoka ohadhi kala paufupi, notashi vulika kaadhi kale hadhi ningwa oshiwike kehe. Opo omunegumbo a tsikile okukala e na ohokwe, aamwatate naamwameme yamwe, ohaya pula omunegumbo onomola yongodhi ye, opo ya kale haye mu dhengele nenge ye mu tumine omatumwalaka kombinga yenyolo lyontumba. Oonkundathana ndhoka otashi vulika dhi tsikile uule woomwedhi kaapu na okuninga ekonakonombiimbeli tali ti sha. Mbela omukonakoni ota ka ninga ngaa ehumokomeho, ngele ndyoka olyo owala ethimbo hi itulile po a konakone Oohapu dhaKalunga? Hasho naanaa.

5. Shi ikolelela kuLukas 14:27-33, Jesus okwa tsu omuthindo shike, shoka tashi vulu oku tu kwathela miilonga yetu yokuninga aantu aalongwa?

⁵ Pompito yimwe Jesus okwa li a gandja ethaneko kombinga yaashihe shoka sha kwatelwa mo mokuninga omulongwa gwe. Methaneko ndyoka, okwa popi kombinga yomuntu ngoka a hala okutunga oshungo nosho wo omukwaniilwa ngoka a hala okuya kiita. Jesus okwa ti kutya omutungi oku na “okukuutumba tango, a yalule kutya otayi pula shi thike peni,” opo e yi mane. Okwa ti wo kutya omukwaniilwa oku na ‘okukuutumba manga, a dhiladhile,’ opo a mone ngele etangakwiita lye otali ka sindana. (Lesha Lukas 14:27-33.) Sha faathana, Jesus okwa li e shi kutya omuntu ngoka a hala a ninge omulongwa gwe, okwa li e na okudhiladhila muule kwaashihe shoka sha kwatelwa mo moku mu landula. Omolwetompelo ndyono, otwa pumbwa okuladhipika aakonakonimbiimbeli yetu ya kale haya konakona kehe oshiwike. Ongiini tatu vulu oku shi ninga?

6. Oshike tashi vulika twa pumbwa okukambadhala okuninga, opo aakonakoni yetu ya hume komeho?

⁶ Otatu vulu okutameka noku gwedha ko kethimbo ndyoka hatu konakona nayo. Kehe ethimbo tatu ka talela po omukonakoni gwetu, otatu vulu okukala hatu kundathana naye Enyolo lyontumba lya gwedhwa po. Uuna i igilile okukundathana nangoye uule wethimbo, mu pula ngele opu na ehala lyontumba mpoka tamu vulu okukuutumba mu tsikile noonkundathana dheni. Eyamukulo lye otali ku ulika kutya ekonakonombiimbeli olya simana shi thike peni kuye. Opo a ninge ehumokomeho mbala, mokweendela ko kwethimbo oto vulu oku mu pula ngele okwa hala okukala hamu konakona lwaali moshiwike. Ihe otwa pumbwa okuninga oshindji, kaashi shi owala okukala hatu konakona naakonakoni yetu lwaali moshiwike.

ILONGEKIDHILA EKONAKONO KEHE

7. Ongiini to vulu okwiilongekidhila nawa ekonakonombiimbeli kehe?

⁷ Wu li omulongi gwaantu, owa pumbwa okwiilongekidhila nawa ekonakonombiimbeli kehe. Oto vulu okukala ho lesha uuyelele mboka tamu ka kundathana nosho wo omanyolo. Ndhindhilika iitsa mbyoka ya simana. Dhiladhila muule kombinga yoshipalanyolo shuuyelele mboka tamu ka kundathana, uupalanyolo uushona, omapulo, omanyolo ngoka ge na “okuleshwa,” omathano nosho wo uuvidio mboka tawu vulu okukwathela omukonakoni u uve ko oshikundathanwa nawa. Opo nduno, wu na omukonakoni gwoye momadhiladhilo, tedhatedha komeho yethimbo nkene to ke mu yelithila uuyelele mboka momukalo omupu nogwa yela, opo e wu uve ko nuupu noku wu tule miilonga. — Neh. 8:8; Omayel. 15:28a.

8. Oohapu dhomuyapostoli Paulus ndhoka dhi li mAakolossa 1:9, 10, otadhi tu longo shike shi na ko nasha nokugalikana kombinga yaakonakoni yetu?

⁸ Okwiilongekidha okwa kwatela mo okugalikana kuJehova kombinga yomukonakoni nosho wo oompumbwe dhe. Pula Jehova e ku kwathele wu kale ho longo aantu Ombiimbeli momukalo ngoka tagu ya gumu komutima. (Lesha Aakolossa 1:9, 10.) Ipula ngele opu na oshinima shontumba shoka omukonakoni ta ka mona oshidhigu okuuva ko nenge okutaamba ko. Ino dhimbwa kutya elalakano lyoye, oku mu kwathela a ninge ehumokomeho noku ninginithwe.

9. Ongiini to vulu okukwathela omukonakonimbiimbeli gwoye i ilongekidhile ekonakonombiimbeli lye? Shi yelitha.

⁹ Ohatu kala tu na einekelo kutya ngele omukonakoni okwa kala ha konakona pandjigilile, nena ota ka kala a pandula shoka Jehova naJesus ya ninga, nota ka kala wo a hala okwiilonga oshindji. (Mat. 5:3, 6) Opo omukonakoni a mone mo uuwanawa mekonakono lye, okwa pumbwa okugandja eitulomo kwaashoka ti ilongo. Opo wu mu kwathele e shi ninge, mu yelithila nkene sha simana okwiilongekidhila ekonakono kehe, mokulesha komeho yethimbo shoka tamu ka kundathana, noku tale nkene ta vulu okutula miilonga shoka ti ilongo. Ongiini to vulu oku mu kwathela i ilongekidhe? Ilongekidha oshikundathanwa shontumba pamwe naye, opo a mone nkene hashi ningwa.d Mu yelithila nkene e na okumona omayamukulo ga yela, e to mu ulukile wo nkene okutenda iitya nenge omatumbulo ngoka ga tsuwa omuthindo, taku vulu oku mu kwathela a dhimbulukwe omayamukulo. Opo nduno, mu pula a yamukule niitya ye mwene. Ngele okwe shi ningi, oto ka vula okumona kutya shoka tamu kundathana oku shi uvite ko shi thike peni. Ihe opu na oshinima shimwe ishewe shoka to vulu okuladhipikila omukonakoni gwoye a ninge.

LONGA OMUKONAKONI GWOYE A KALE HA POPI NAJEHOVA ESIKU KEHE

10. Omolwashike okulesha Ombiimbeli esiku kehe kwa simana, nomukonakoni oku na okuninga shike, opo okulesha kwe Ombiimbeli ku kale taku ti sha?

¹⁰ Kakele owala kokukonakona oshiwike kehe, omukonakoni ota ka mona mo uuwanawa, ngele oha ningi iinima yontumba kuye mwene kehe esiku. Okwa pumbwa okukala ha popi naJehova. Ongiini ta vulu oku shi ninga? Omokupulakena nokupopya naJehova. Ota vulu okupulakena kuKalunga mokulesha Ombiimbeli kehe esiku. (Jos. 1:8; Eps. 1:1-3) Mu ulukila nkene e na okulongitha “Elandulathano lyokulesha Ombiimbeli” ndyoka hali vulu okutapwa kepandja lyetu lyokointaneta, jw.org.e Opo wu mu kwathele a mone mo uuwanawa owundji melesho lye lyOmbiimbeli, mu ladhipika a kale ha tedhatedha kwaashoka Ombiimbeli tayi mu longo kombinga yaJehova, nankene ta vulu okutula miilonga shoka ti ilongo. — Iil. 17:11; Jak. 1:25.

11. Omukonakoni ota vulu ngiini okwiilonga okugalikana momukalo gu uka, nomolwashike sha simana a kale ha galikana kuJehova pandjigilile?

¹¹ Ladhipika omukonakoni gwoye a kale ha popi naJehova okupitila megalikano esiku kehe. Uuna to tameke naasho to hulitha ekonakonombiimbeli lyeni, kala ho galikana tashi zi komutima, nokutumbula wo edhina lyomukonakoni gwoye momagalikano ngoka. Uuna ta pulakene komagalikano goye, ote ki ilonga nkene e na okugalikana tashi zi komutima, nokuukitha omagalikano ge kuJehova Kalunga, okupitila medhina lyaJesus Kristus. (Mat. 6:9; Joh 15:16) Dhiladhila nkene okulesha Ombiimbeli esiku kehe, ano okupulakena kuJehova nosho wo okugalikana, ano okupopya naJehova, taku ka kwathela omukonakoni gwoye, a hedhe popepyeelela naKalunga. (Jak 4:8) Ngele okwa kala ha ningi iinima mbyoka esiku kehe, otashi ke mu kwathela a thike poshitsa shokwiiyapulila Jehova nokuninginithwa. Oshike ishewe tashi vulu oku mu kwathela?

KWATHELA OMUKONAKONI GWOYE A KALE E NA EKWATATHANO NAJEHOVA

12. Ongiini to vulu okukwathela omukonakoni a kale e na ekwatathano naJehova?

¹² Shoka omukonakoni ti ilongo pekonakonombiimbeli lye, ke na owala okukala e shi uvite ko, ihe oshi na wo okuguma omutima gwe. Omolwashike sha pumbiwa? Omolwaashoka omutima gwetu ngoka gwa kwatela mo omahalo getu nomaiyuvo, ohagu tu ningitha tu katuke oonkatu. Jesus okwa li ha longo aantu iinima oyindji noya li ye hole okupulakena kuye. Ihe aantu oya li wo haye mu landula, molwaashoka shoka a li he ya longo, osha li hashi ya gumu komitima. (Luk. 24:15, 27, 32) Omukonakoni gwoye okwa pumbwa okukala a tala ko Jehova e li Omuntu gwolela ngoka ta vulu okukala e na ekwatathano naye noku mu tala ko wo a fa He, Kalunga ke naKuume ke. (Eps. 25:4, 5) Uuna tamu konakona, kala ho tsu omuthindo omaukwatya omawanawa gaKalunga ketu, Jehova. (Eks. 34:5, 6; 1 Pet. 5:6, 7) Kutya nduno otamu kundathana shike, kala ho gandja eitulomo kuukwatya waJehova, opo omukonakoni gwoye a mone kutya Jehova omuntu a tya ngiini. Kwathela omukonakoni a kale e na olupandu omolwomaukwatya omawanawa gaJehova, ngaashi ohole ye, uunambili nolukeno. Jesus okwa ti kutya “oshipango oshinene noshotango,” osho “hola Omuwa Kalunga koye.” (Mat. 22:37, 38) Kambadhala okukokeka ohole yokuhola Kalunga momutima gwomukonakoni gwoye.

13. Gandja oshiholelwa shankene to vulu okukwathela omukonakoni i ilonge omaukwatya gaJehova.

¹³ Uuna tamu kundathana nomukonakoni gwoye, mu yelithila kutya omolwashike wu hole Jehova. Shoka otashi vulika shi kwathele omukonakoni a mone kutya naye okwa pumbwa okukala e na ekwatathano naJehova. (Eps. 73:28) Pashiholelwa, mbela moshileshomwa nenge menyolo ndyoka tamu kundathana omwa popiwa sha kombinga yaJehova shoka she ku guma komutima, ngaashi ohole ye, uunongo, uuyuuki nenge oonkondo dhe? Ngele osho, shi tseyithila omukonakoni gwoye kutya ndyoka olyo limwe lyomomatompelo ogendji wu hole Tate yetu gwomegulu. Opu na ishewe oshinima shilwe shoka omukonakonimbiimbeli kehe e na okuninga, opo a kale a gwana okuninginithwa.

LADHIPIKA OMUKONAKONI GWOYE A KALE HA GONGALA

14. Aahebeli 10:24, 25, otaye tu lombwele shike shi na ko nasha nokugongala hoka taku vulu okukwathela omukonakonimbiimbeli a ninge ehumokomeho?

¹⁴ Atuheni otwa hala aakonakoni yetu ya ninge ehumokomeho noya ninginithwe. Omukalo gumwe gwa simana tatu vulu oku ya kwathela ye shi ninge, omo ku ya ladhipika ya kale haya gongala negongalo. Aauvithi mboka ya pyokoka ohaya ti kutya aakonakoni mboka haye ya kokugongala pandjigilile, oyo unene haya ningi ehumokomeho mbala. (Eps. 111:1) Aauvithi yamwe ohaya yelithile aakonakoni yawo kutya ngele oya hala okwiilonga oshindji kombinga yOmbiimbeli oya pumbwa wo okukala haye ya kokugongala. Lesha Aahebeli 10:24, 25 pamwe nomukonakoni gwoye e to mu yelithile omauwanawa ngoka ta ka mona ngele okwa kala he ya kokugongala. Mu ulukila okavidio: Oshike hashi ningwa pokugongala kwOonzapo dhaJehova?f Mu kwathela a kale a tala ko okuya kokugongala ku li oshinima sha simanenena monkalamwenyo.

15. Oshike tatu vulu okuninga tu ladhipike omukonakonimbimbeli a kale ha gongala pandjigilile?

¹⁵ Oshike to vulu okuninga ngele omukonakoni gwoye ine enda ko natango kokugongala nenge he ya ko owala omalupita? Mu hokololela nohamu kombinga yoshinima shontumba shoka wi ilonga pokugongala opo kwa zi ko. Shoka otashi vulu oku mu ladhipika e ye kokugongala, shi vulithe owala okukala ho mu hiya e ye. Mu pa Oshungolangelo nenge Okafo Onkalamwenyo yopaKriste niilonga yetu yokuuvitha, hoka taka konakonwa omwedhi ngoka. Mu ulukila shoka tashi ka kundathanwa pokugongala taku landula, e to mu pula kutya oshitopolwa shini e wete oshihokithi unene kuye. Shoka omukonakoni gwoye te ki ilonga pokugongala kwe kwotango, itashi vulu okuyelekwa naashoka i ilonga pokugongala kwomalongelokalunga galwe. (1 Kor. 14:24, 25) Pokugongala ota ka tsakaneka po wo yalwe mboka ye li oshiholelwa oshiwanawa shoka ta vulu okulandula, notaye ke mu kwathela wo a ninge ehumokomeho sigo a ninginithwa.

16. Oshike sha pumbiwa, opo ekonakonombiimbeli li kwathele omukonakoni a ninge ehumokomeho noku ninginithwe, noshike tatu ki ilonga moshitopolwa tashi landula?

¹⁶ Omomukalo guni tatu vulu okukala hatu konakona naakonakoni yetu, opo ya ninge ehumokomeho e taya ninginithwa? Otatu vulu okukwathela omukonakoni kehe a kale a tala ko ekonakonombiimbeli li li oshinima sha simana, moku mu ladhipika a kale ha konakona oshiwike kehe noku kale hi ilongekidha aluhe. Natu kale wo hatu ladhipike aakonakonimbiimbeli yetu ya kale haya popi naJehova esiku kehe, noya kale ye na ekwatathano ewanawa naye. Natu kale hatu ya ladhipike ya kale haye ya kokugongala. (Tala oshimpungu “Shoka aakonakonimbiimbeli ye na okuninga, opo ya ninge ehumokomeho noya ninginithwe.”) Ihe ngaashi oshitopolwa tashi landula tashi ke shi yelitha, opu na iinima itano mbyoka tatu vulu okuninga, opo aakonakoni yetu ya ninge ehumokomeho e taya ninginithwa.