Omolwashike Kalunga ihaa yamukula omagalikano agehe?
Tate gwetu gwomegulu, Jehova Kalunga, okwa hala nokwa nyanyukwa okuuva omagalikano getu taga zi komutima. Ihe opu na iinima yimwe tayi vulu oku mu keelela kaa yamukule omagalikano getu. Iinima mbyoka oyini noshike tu na okukaleka momadhiladhilo uuna tatu galikana? Yimwe yomuyo oyo mbika yi li mOmbiimbeli.
“Ngele tamu galikana, inamu endulula iinima ya faathana.” — Mateus 6:7, yelekanitha NW.
Jehova ina hala tu kale twa kopela omagalikano momutse nenge hatu ga lesha momambo. Pehala lyaashono, okwa hala tu kale hatu galikana tashi zi komutima. Dhiladhila owala nkene to ka kala wa lulilwa ngele kuume koye ohe ku lombwele owala oshinima sha faathana, ohali ka sha ohali ka toka. Ookuume kopothingo ohaya popi ya manguluka notashi zi komutima. Uuna tatu galikana kuTate gwetu gwomegulu tatu popi iitya yetu yene, otashi ulike kutya otwe mu tala ko e li kuume ketu.
“Nuuna tamu indile, itamu pewa, oshoka omalalakano geni omawinayi.” — Jakob 4:3.
Itatu ka tegelela Kalunga a yamukule omagalikano getu ngele otwe mu pula iinima mbyoka tu shi kutya ina hala tu yi ninge nenge tu kale tu na. Pashiholelwa, mbela Jehova ota ka yamukula ngaa omudhani gwomashina ngoka te mu pula e mu pe elago, ngele Okwa indika aantu ya yande olwiho nosho wo okwiitaala miinima yontumba mbyoka anuwa hayi etele aantu elago? (Jesaja 65:11; Lukas 12:15) Osha yela kutya itatu ka tegelela Jehova a yamukule omagalikano ga tya ngaaka! Opo Kalunga e tu yamukule uuna tatu galikana kuye, otu na okushilipaleka kutya shoka tatu mu pula oshi li metsokumwe naashoka te tu lombwele mOmbiimbeli.
“Ngoka ta thitike omakutsi ge kaa uve ompango, negalikano lye olyo iihuna.” — Omayeletumbulo 28:9.
Pethimbo lyOmbiimbeli, Kalunga ka li a yamukula omagalikano gaamboka ya li ihaaya vulika koompango dhe dhuuyuuki. (Jesaja 1:15, 16) Kalunga iha lunduluka. (Maleaki 3:6) Ngele otwa hala Kalunga a yamukule omagalikano getu, otu na okuninga ngaashi tatu vulu tu kale hatu vulika koompango dhe. Ongiini nduno ngele monakuziwa otwa ninga iinima iiwinayi? Mbela shoka osha hala okutya Kalunga ita ka pulakena nando kutse? Hasho nando! Kalunga ote ke tu dhimina po pahole ngele otwi iyele ombedhi, e tatu ningi ngaashi tatu vulu tu mu nyanyudhe. — Iilonga 3:19.