Omagalikano otaga vulu oku ku kwathela ngiini?

Pamela okwa li a kwatwa kuuvu wa kwata miiti nokwa li a kongo ekwatho lyopaunamiti. Ihe, okwa li wo a galikana kuKalunga e mu pe oonkondo i idhidhimikile onkalo ye ndjoka ondhigu. Egalikano olye mu kwathela ngaa?

Pamela okwa ti: “Pethimbo lyepango lyandje lyokankela, olundji onda li handi kala nda tila. Ihe sho nda galikana kuJehova Kalunga, onda li ndu uvite nda ngungumana nonda li te vulu okudhiladhila nawa. Ohandi kala natango tandi ehama, ihe egalikano ohali kwathele ndje ndi kale ndi na etaloko ewanawa. Uuna aantu ya pula ndje kutya ondi li po ngiini, ohandi ti: ‘Kandi uvite nawa, ihe onda nyanyukwa!’”

Oshoshili kutya ihatu kala twa tegelela tu kwatwe kuuvu wa kwata miiti opo tu galikane. Atuheni ohatu adhika komaudhigu, omanene nenge omashona, nolundji ohatu kala tu uvite twa pumbwa ekwatho tu ungaunge nago. Egalikano otali vulu ngaa oku tu kwathela?

Ombiimbeli otayi ti: “Uudhigu woye u fala kOmuwa, oye te ku popile; ihe etha aayuuki ya sindike.” (Episalomi 55:22) Oohapu ndhoka itadhi tu hekeleke tuu! Ongiini nduno egalikano tali vulu oku ku kwathela? Uuna to galikana kuKalunga momukalo ngoka a hokwa, ote ku pe shoka wa pumbwa wu ungaunge nuudhigu woye. — Tala oshimpungu “Nkene omagalikano taga vulu oku ku kwathela.”

Nkene omagalikano taga vulu oku ku kwathela

Ombili yopamadhiladhilo

“Oompumbwe dheni dhi tseyithileni Kalunga momagalikano geni agehe. . . . Nombili yaKalunga, ndjoka yi vule uunongo auhe wopantu, otayi gamene oomwenyo dheni nomadhiladhilo geni muKristus Jesus.” (Aafilippi 4:6, 7) Uuna wa lombwele Kalunga shoka to ipula nasho, ote ku kwathele wu kale wa ngungumana nowu katuke pandunge uuna wa lulilwa.

Uunongo wa za kuKalunga

“Ngele oku na gumwe gwomune a pumbwa oondunge, ne dhi indile kuKalunga, oye note dhi mu pe. Oshoka Kalunga ke shi omundalapata, ihe oha pe ayehe nopwaa na omanyenyeto.” (Jakob 1:5) Uuna tatu thiminikwa, ihatu ningi aluhe omatokolo omawanawa. Ngele owa galikana kuKalunga e ku pe uunongo, ota vulu e ku dhimbulukithe omakotampango ogendji ngoka taga vulu oku ku kwathela ge li mOohapu dhe, Ombiimbeli.

Oonkondo nehekeleko

“Ngame otandi vulu shaa shoka, oshoka . . . ota koleke ndje.” (Aafilippi 4:13) Molwaashoka Jehova Kalunga omunankondoadhihe, ota vulu oku ku pa oonkondo ndhoka wa pumbwa wu ungaunge nuudhigu woye nenge e ku kwathele muudhigu mboka. (Jesaja 40:29) Ombiimbeli otayi popi wo Jehova kutya ‘oKalunga kehekeleko alihe.’ (NW) Ota vulu oku tu hekeleka “muudhigu wetu auhe.” — 2 Aakorinto 1:3, 4.

OTO KA GALIKANA NGAA?

Jehova ihe ku thiminike wu galikane kuye. Pehala lyaashono, ote ku hiya pahole wu shi ninge. (Jeremia 29:11, 12) Ihe ongiini ngele monakuziwa owa li wu uvite kutya omagalikano goye kaga li ga yamukulwa? Ino uva nayi nenge wu teke omukumo. Aavali mboka ye hole oyana, otashi vulika kaaye ya kwathele moshinima shoka ya hala nenge pompito mpoka ye shi hala. Otashi vulika aavali mboka ye na po oshinima shilwe shi li nawa. Ihe opu na oshinima shoka haya ningi aluhe: Aavali mboka ye hole oyana, oha ye ya kwathele.

Jehova Kalunga, ngoka oye lela omuvali omunahole, okwa hala wo oku ku kwathela. Ngele owa konakona nuukeka omayele gomOmbiimbeli ngoka twa zi nokukundathana, e to ningi ngaashi to vulu wu ga tule miilonga, Kalunga ota ka yamukula omagalikano goye momukalo gwa dhenga mbanda. — Episalomi 34:15; Mateus 7:7-11.